ភ្នំពេញៈ ក្នុងរយៈពេល ៣០ ឆ្នាំកន្លងមកនេះ សាលាភូមិន្ទរដ្ឋបាលបានបណ្តុះបណ្តាលមន្ត្រីរាជការចំនួន ១៦ ៦០៦ អង្គ/នាក់។
សាលាភូមិន្ទរដ្ឋបាលចាត់ទុកថា សមិទ្ធផលទាំងនេះបានឆ្លុះបញ្ចាំងពីផលវិជ្ជមាន និងដំណើរបន្តឆ្ពោះទៅមុខនៃកិច្ចខិតខំប្រឹងប្រែងក្នុងការអភិវឌ្ឍធនធានមនុស្សសម្រាប់វិស័យសាធារណៈ។
សាលាភូមិន្ទរដ្ឋបាលបញ្ជាក់ក្នុងសេចក្តីប្រកាសព័ត៌មាននាថ្ងៃទី ៩ ខែមិថុនា ថា៖ «ចាប់តាំងពីឆ្នាំ ១៩៩២ រហូតមកទល់ពេលនេះ សាលាភូមិន្ទរដ្ឋបាលបានបណ្តុះបណ្តាលមន្ត្រីរាជការសរុបចំនួន ១៦ ៦០៦ អង្គ/នាក់ ដែលមានទាំងវគ្គបណ្តុះបណ្តាលរយៈពេលវែង និងវគ្គបណ្តុះបណ្តាលរយៈពេលខ្លី»។
សេចក្តីប្រកាសព័ត៌មានបន្តថា៖ «សមិទ្ធផលទាំងអស់នេះបានឆ្លុះបញ្ចាំងឱ្យឃើញពីផលវិជ្ជមាន និងដំណើរបន្តឆ្ពោះទៅមុខនៃកិច្ចខិតខំប្រឹងប្រែងក្នុងការកសាង និងការអភិវឌ្ឍធនធានមនុស្សសម្រាប់វិស័យសាធារណៈ និងបានសបញ្ជាក់ផងដែរពីជំហររបស់រាជរដ្ឋាភិបាលក្នុងការគាំទ្រដល់ការបណ្តុះបណ្តាលសមត្ថភាព មន្ត្រីរាជការនៃរាជរដ្ឋាភិបាលក្នុងមុខតំណែងដឹកនាំ និងគ្រប់គ្រងអង្គភាពនៅគ្រប់កម្រិត»។
ប្រភពដដែលបញ្ជាក់ថា លោកនាយករដ្ឋមន្ត្រី ហ៊ុន សែន នឹងធ្វើជាអធិបតីភាពក្នុងពិធីបិទវគ្គបណ្តុះបណ្តាល ឆ្នាំ ២០២០-២០២១ និងពិធីបើកវគ្គបណ្តុះបណ្តាល ឆ្នាំ ២០២២ របស់សាលាភូមិន្ទរដ្ឋបាលនៅថ្ងៃទី ១៣ ខែមិថុនា នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ រាជធានីភ្នំពេញ។
សាលាភូមិន្ទរដ្ឋបាលបញ្ជាក់ថា ព្រឹត្តិការណ៍នៃការប្រារព្ធពិធីនេះជាលើកទី ១ ហើយសម្រាប់សាលាភូមិន្ទរដ្ឋបាល បន្ទាប់ពីស្ថានភាពនៃជំងឺកូវីដ ១៩ នៅកម្ពុជាបានធូរស្បើយ ហើយការរស់នៅ និងការប្រកបការងារប្រចាំថ្ងៃរបស់ប្រជាជនទូទៅបានវិលត្រឡប់មកប្រក្រតីភាពឡើងវិញស្ទើរតែទាំងស្រុង៕