ភ្នំពេញៈ ជប៉ុនស្នើសុំឱ្យកម្ពុជាចាត់អង្គភាពស៊ីម៉ាក់ឱ្យបន្តជួយគាំទ្រដល់ការហ្វឹកហ្វឺនផ្នែកសកម្មភាពមីនដល់នាយទាហានកូឡុំប៊ីរយៈពេល ៣ ឆ្នាំទៀត ចាប់ពីឆ្នាំ ២០២៣ ដល់ឆ្នាំ ២០២៥ បន្ទាប់ពីជប៉ុនយល់ព្រមតាមសំណើថ្មីរបស់កូឡុំប៊ីឱ្យបន្តជួយគាំទ្រដល់ការហ្វឹកហ្វឺននេះ។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) សរសេរនៅលើហ្វេសប៊ុកនាថ្ងៃទី ៩ ខែមិថុនា ថា រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានគាំទ្រអង្គភាពស៊ីម៉ាក់ក្នុងការផ្តល់ការហ្វឹកហ្វឺនពង្រឹងសមត្ថភាព ជំនាញ និងចែករំលែកបទពិសោធលើវិស័យមីនរវាងប្រទេសកម្ពុជា និងកូឡុំប៊ី។
លោកបន្តថា ចាប់ពីឆ្នាំ ២០១០ ដល់ខែមិថុនា ឆ្នាំ ២០២២ នេះ អង្គភាពស៊ីម៉ាក់បានផ្ដល់ការហ្វឹកហ្វឺនជំនាញសកម្មភាពមីនដល់នាយទាហានកូឡុំប៊ីបានចំនួន ២ ដំណាក់កាល ដែលចែកចេញជា ១០ វគ្គ និងសិក្ខាកាមចូលរួមមានចំនួនជាង ១៨០ នាក់។
លោក ហេង រតនា សរសេរថា ដោយមើលឃើញពីភាពជោគជ័យក្នុងការហ្វឹកហ្វឺនកន្លងមក រដ្ឋាភិបាលកូឡុំប៊ីបានដាក់សំណើសុំជាថ្មីដល់រដ្ឋាភិបាលជប៉ុនឱ្យបន្តជួយគាំទ្រដល់ការហ្វឹកហ្វឺនដល់នាយទាហានកូឡុំប៊ីសម្រាប់រយៈពេល ៣ ឆ្នាំទៀត ចាប់ពីឆ្នាំ ២០២៣ ដល់ឆ្នាំ ២០២៥។
លោកបន្តថា៖ «រដ្ឋាភិបាលជប៉ុនយល់ព្រមតាមសំណើថ្មីនេះ និងបានស្នើសុំឱ្យរដ្ឋាភិបាលនៃព្រះរាជាណាចក្រកម្ពុជាចាត់អង្គភាពស៊ីម៉ាក់ឱ្យបន្តការហ្វឹកហ្វឺនជូនតាមសំណើរបស់រដ្ឋាភិបាលកូឡុំប៊ី។ ដើម្បីសម្រេចបាននូវគម្រោងថ្មីនេះ គណៈប្រតិភូអង្គភាពស៊ីម៉ាក់ និងធ្វើដំណើរទៅប្រទេសកូឡុំប៊ីនៅចុងខែមិថុនានេះ»។
កាលពីថ្ងៃទី ៩ ខែមិថុនា វគ្គហ្វឹកហ្វឺនជូននាយទាហានផ្នែកសកម្មភាពមីននៃក្រសួងការពារជាតិកូឡុំប៊ីលើប្រធានបទស្តីអំពី «ការគ្រប់គ្រងគុណភាព និងបទដ្ឋានប្រតិបត្តិការ» ត្រូវបានបិទបញ្ចប់នៅទីបញ្ជាការស៊ីម៉ាក់ភ្នំពេញ។
ពិធីបិទវគ្គនេះក៏មានការចូលរួមពីលោកស្រី Ana Miria Prieto ឯកអគ្គរាជទូតប្រទេសកូឡុំប៊ីប្រចាំកម្ពុជា លោក Okada Naoya លេខាទី ២ នៃស្ថានទូតជប៉ុនប្រចាំកម្ពុជា និងលោក Yanagawa Shinji អនុប្រធាន JICA។
វគ្គហ្វឹកហ្វឺននេះមានរយៈពេល ២ សប្តាហ៍ គិតចាប់ពីថ្ងៃទី ៣០ ឧសភា ដល់ថ្ងៃទី ៩ ខែមិថុនា ឆ្នាំ ២០២២ ដែលមាននាយទាហានជាសិក្ខាកាមចូលរួមចំនួន ១៥ រូប៕