.jpg)
រូបភាព គណៈកម្មាធិការប្រយុទ្ធប្រឆាំងផលិតផលក្លែងក្លាយ
ភ្នំពេញៈ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ជំរុញឱ្យអង្គភាព ក.ប.ប ស្វែងរកបទល្មើសពាក់ព័ន្ធនឹងការធ្វើទីផ្សារបែបពីរ៉ាមីដ និងការលក់បែបទីផ្សារពហុកម្រិត នៅក្នុងកិច្ចប្រជុំលើកទី ៧ របស់គណៈកម្មាធិការជាតិការពារអ្នកប្រើប្រាស់ (គ.ជ.ក.ប.) នាថ្ងៃទី ៩ ខែមិថុនា។
គណៈកម្មាធិការប្រយុទ្ធប្រឆាំងផលិតផលក្លែងក្លាយ (កបប) បានបញ្ជាក់ក្នុងហ្វេសប៊ុកនាថ្ងៃទី ៩ ខែមិថុនា ថា៖ «ឯកឧត្ដម រដ្ឋមន្ត្រីក្រសួងពាណិជ្ជកម្ម [លោក ប៉ាន សូរស័ក្តិ] និងជាប្រធានគណៈកម្មាធិការជាតិការពារអ្នកប្រើប្រាស់ក៏បានជំរុញឱ្យអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ធ្វើការស្វែងរក និងកំណត់បទល្មើសពាក់ព័ន្ធនឹងការធ្វើទីផ្សារបែបពីរ៉ាមីដ និងការលក់បែបទីផ្សារពហុកម្រិត (MLM)»។
កិច្ចប្រជុំលើកទី ៧ បានអនុម័តសេចក្តីព្រាងចំនួន ៣ គឺ សេចក្ដីព្រាងគោលការណ៍ណែនាំស្ដីពីការបង្កើតសមាគមអ្នកប្រើប្រាស់តាមវិស័យ សេចក្ដីព្រាងកម្មវិធីជាតិស្ដីពីកិច្ចការពារអ្នកប្រើប្រាស់ និងសេចក្ដីព្រាងគោលការណ៍ណែនាំស្ដីពីគម្រោងលក់បែបពីរ៉ាមីដ និងការលក់បែបទីផ្សារពហុកម្រិត។
លោក ប៉ាន សូរស័ក្តិ បានជំរុញឱ្យ ក.ប.ប ធ្វើការផ្សព្វផ្សាយឯកសារទាំង ៣ នេះជាសាធារណៈឱ្យបានទូលំទូលាយតាមរយៈបណ្ដាញសង្គមហ្វេសប៊ុក ទូរទស្សន៍ និងគេហទំព័ររបស់ ក.ប.ប៕
