.jpg)
រូបភាព អគ្គស្នងការដ្ឋាននគរបាលជាតិ
បាត់ដំបងៈ ប្រជាពលរដ្ឋម្នាក់ប្រទះឃើញគ្រាប់មីនចំនួន ៤៧ គ្រាប់ នៅពេលទៅឃ្វាលគោនាថ្ងៃទី ៩ ខែមិថុនា នៅភូមិព្រែកជីក ឃុំព្រែកជីក ស្រុករុក្ខគីរី ខេត្តបាត់ដំបង និងបានរាយការណ៍ទៅកាន់សមត្ថកិច្ច។
របាយការណ៍នគរបាលជាតិបញ្ជាក់នាថ្ងៃទី ១០ ខែមិថុនា ថា ប្រជាពលរដ្ឋអាយុ ៦៩ ឆ្នាំម្នាក់ដែលរស់នៅភូមិព្រែកជីកបានទៅឃ្វាលគោ ហើយក៏ប្រទះឃើញយុទ្ធភ័ណ្ឌមិនទាន់ផ្ទុះគ្រាប់មីនប្រភេទ PN2 សញ្ញាលេខបូក ផលិតនៅប្រទេសសូវៀត ចំនួន ៤៧ គ្រាប់ ត្រង់ចំណុចហុងទី ៥ នៃភូមិព្រែកជីក។
របាយការណ៍បញ្ជាក់ថា៖ «ក្រោយទទួលដំណឹង កម្លាំងប៉ុស្តិ៍នគរបាលរដ្ឋបាលព្រែកជីកនៃអធិការដ្ឋាននគរបាលស្រុករុក្ខគីរីបានចុះធ្វើការត្រួតពិនិត្យចំពោះគ្រាប់មីនទាំងនេះ និងបានបន្តរាយការណ៍ជូនដល់អង្គភាពស៊ីម៉ាក់ (CMAC) ដើម្បីយកទៅកម្ទេច»។
អធិការដ្ឋាននគរបាលស្រុករុក្ខគីរីបានថ្លែងអំណរគុណដល់ពលរដ្ឋដែលបានរាយការណ៍ជូនសមត្ថកិច្ចទាន់ពេលវេលា និងបានអំពាវនាវដល់ប្រជាពលរដ្ឋដែលរស់នៅក្នុងមូលដ្ឋានទាំងអស់ឱ្យមានការប្រុងប្រយ័ត្នខ្ពស់នូវយុទ្ធភ័ណ្ឌមិនទាន់ផ្ទុះ ឬអាវុធខូចគុណភាពផ្សេងៗ ហើយត្រូវរាយការណ៍ជាបន្ទាន់ជូនសមត្ថកិច្ច ដើម្បីចៀសវាងការកើតមានគ្រោះថ្នាក់ ដោយសារយុទ្ធភ័ណ្ឌ និងអាវុធទាំងនោះជាយថាហេតុ៕
