ភ្នំពេញៈ មន្ត្រីជំនាញបន្តរកឃើញដេប៉ូប្រេងឥន្ធនៈចំនួន ៥ ទីតាំងបន្ថែមទៀត ដែលលក់ប្រេងកេងបន្លំប្រជាពលរដ្ឋ និងបានបន្តចាត់វិធានការលើម្ចាស់ដេប៉ូទាំងនេះ ក្រោយប្រតិបត្តិការចុះត្រួតពិនិត្យតាមស្ថានីយ និងដេប៉ូប្រេងឥន្ធនៈចំនួន ២៥ ទីតាំងក្នុងខេត្តចំនួន ៤។
កាលពីថ្ងៃទី ៨-៩ ខែមិថុនា មន្រ្តីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រចាំសាខារាជធានី-ខេត្តចំនួន ៤ គឺខេត្តកំពង់ធំ ខេត្តរតនគិរី ខេត្តកំពង់ឆ្នាំង និងរាជធានីភ្នំពេញ បានបន្តចុះត្រួតពិនិត្យស្ថានីយ និងដេប៉ូប្រេងឥន្ធនៈទាំង ២៥ នេះ ក្រែងម្ចាស់អាជីវកម្មប្រព្រឹត្តល្មើសនឹងច្បាប់ស្តីពីកិច្ចការពារអ្នកប្រើប្រាស់។
ក.ប.ប បញ្ជាក់តាមរយៈហ្វេសប៊ុកនាថ្ងៃទី ១០ ខែមិថុនាថា៖ «មន្ត្រីជំនាញបានរកឃើញដេប៉ូប្រេងឥន្ធនៈចំនួន ៥ ទីតាំង ប្រកបអាជីវកម្មមិនស្មោះត្រង់ចំពោះអ្នកប្រើប្រាស់ មិនមានអនុលោមភាពក្នុងធុរកិច្ច។
ដូចនេះ មន្ត្រីយើងបានចាត់វិធានការពិន័យអន្តរការណ៍ស្របតាមច្បាប់ជាធរមាន និងតម្រូវឱ្យធ្វើកិច្ចសន្យាកែតម្រូវចំពោះមន្ត្រីមានសមត្ថកិច្ច»៕