ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) នឹងធ្វើការត្រួតពិនិត្យ និងផ្ទៀងផ្ទាត់លទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាថ្ងៃទី ១៣-១៤ ខែមិថុនា។
គ.ជ.ប បញ្ជាក់ក្នុងសេចក្តីជូនដំណឹងនាថ្ងៃទី ១០ ខែមិថុនាថា ចាប់ពីថ្ងៃទី ១០ ដល់ថ្ងៃទី ១៤ ខែមិថុនា គ.ជ.ប ទទួលស្បោង «ឃ» និងកញ្ចប់ «ឃ ពិសេស» ព្រមទាំងសម្ភារឯកសារពាក់ព័ន្ធពីគណៈកម្មការរាជធានី-ខេត្ត រៀបចំការបោះឆ្នោតទាំង ២៥។
គ.ជ.ប បញ្ជាក់ថា៖ «បន្ទាប់ពីបានទទួលសម្ភារ និងឯកសារខាងលើ គ.ជ.ប នឹងធ្វើការត្រួតពិនិត្យ និងផ្ទៀងផ្ទាត់ឡើងវិញនូវលទ្ធផលនៃការបោះឆ្នោតតាមឃុំ-សង្កាត់ទាំងអស់ នាថ្ងៃទី ១៣-១៤ ខែ មិថុនា ឆ្នាំ ២០២២ ចាប់ពីវេលាម៉ោង ៩:០០ នាទីព្រឹកតទៅ នៅទីស្តីការ គ.ជ.ប»។
គ.ជ.ប បន្តថា៖ «សេចក្តីជូនដំណឹងនេះចាត់ទុកជាការអញ្ជើញដល់តំណាងគណបក្សនយោបាយដែលបានចុះបញ្ជីបេក្ខជនឈរឈ្មោះបោះឆ្នោត អ្នកសង្កេតការណ៍ជាតិ និងអន្តរជាតិ ព្រមទាំងអ្នកសារព័ត៌មានជាតិ និងអន្តរជាតិ ចូលរួមសង្កេតមើល និងយកព័ត៌មានកុំបីខាន»៕
វីដេអូ៖