.jpg)
ភ្នំពេញៈ ក្រសួងការពារជាតិវៀតណាមកំពុងរៀបចំកំណត់ហេតុ ដើម្បីធ្វើការចុះហត្ថលេខានាពេលខាងមុខលើការចងសម្ព័ន្ធមេត្រីភាពរវាងកងពលតូចលេខ ៧០ នៃកងទ័ពជើងគោកកម្ពុជា និងបញ្ជាការដ្ឋានរដ្ឋធានីហាណូយនៃកងទ័ពប្រជាជនវៀតណាម។
កាលពីថ្ងៃទី ៩ ខែមិថុនា លោក ប្រាក់ សុវណ្ណា មេបញ្ជាការរងកងទ័ពជើងគោក បានជួបជាមួយលោក Tran Van Tam ប្រធានការិយាល័យអនុព័ន្ធយោធាវៀតណាមប្រចាំនៅកម្ពុជា។
កងទ័ពជើងគោកនៃកងយោធពលខេមរភូមិន្ទបានឱ្យដឹងតាមរយៈហ្វេសប៊ុកនាថ្ងៃទី ១០ ខែមិថុនាថា ភាគីទាំង ២ បានពិភាក្សាអំពីកិច្ចសហប្រតិបត្តិការរវាងកងទ័ពនៃប្រទេសទាំង ២ លើការបណ្តុះបណ្តាលធនធានមនុស្សដល់កងយោធពលខេមរភូមិន្ទនូវមុខជំនាញផ្សេងៗ ទាំងសិក្ខាកាម និងគ្រូយោធាចារ្យ។
ភាគីទាំង ២ ក៏បានធ្វើការពិភាក្សាអំពីការផ្លាស់ប្តូរដកបទពិសោធពីរបៀបសរសេរប្រវត្តិសាស្ត្រ សង្គ្រាមផងដែរ។
ហ្វេសប៊ុកដដែលបញ្ជាក់ថា៖ «ទាក់ទងទៅនឹងការស្នើសុំឱ្យមានការចងសម្ព័ន្ធមេត្រីភាពរវាងកងពលតូចលេខ ៧០ កងទ័ពជើងគោក [កម្ពុជា] ជាមួយបញ្ជាការដ្ឋានរដ្ឋធានីហាណូយ នៃកងទ័ពប្រជាជនវៀតណាម ក្រសួងការពារប្រទេសវៀតណាម បានយល់ព្រម និងបានកំពុងរៀបចំកំណត់ហេតុ ដើម្បីធ្វើការចុះហត្ថលេខានាពេលខាងមុខ»។
លោក ប្រាក់ សុវណ្ណា បានអរគុណដល់កងទ័ពប្រជាជនវៀតណាម ដែលបានបន្តជួយដល់កងយោធពលខេមរភូមិន្ទជាបន្តបន្ទាប់។
លោកបានលើកឡើងអំពីការបន្តពង្រឹង និងពង្រីកកិច្ចសហប្រតិបត្តិការជាមួយគ្នាឡើងវិញរវាងកងទ័ពប្រទេសទាំង ២ កម្ពុជា-វៀតណាម ក្រោយពីបានខកខានអស់រយៈពេល ២ ឆ្នាំ ដោយសារវិបត្តិនៃជំងឺកូវីដ ១៩៕
