.jpg)
រូបភាព កងទ័ពជើងគោកនៃកងយោធពលខេមរភូមិន្
ភ្នំពេញៈ ចិនផ្តល់អំណោយឆត្រយោងចំនួន ៤០០ ឆត្រដល់កម្ពុជាកាលពីថ្ងៃទី ១០ ខែមិថុនា ដែលពិធីប្រគល់ទទួលធ្វើឡើងរវាងលោក ថាង ហាវ អនុព័ន្ធយោធាចិនប្រចាំនៅកម្ពុជា និងលោក ចាប ភក្តី មេបញ្ជាការរងកងទ័ពជើងគោក និងជាមេបញ្ជាការបញ្ជាការដ្ឋានទ័ពពិសេសនៅឯបញ្ជាការដ្ឋានទ័ពពិសេស។
លោក ចាប ភក្តី ថ្លែងក្នុងពិធីប្រគល់ទទួលថា កងទ័ពនៃប្រទេសទាំង ២ កម្ពុជា-ចិនមានទំនាក់ទំនងល្អ និងប្រកាន់ខ្ជាប់នូវយុទ្ធសាស្ត្រគ្រប់ជ្រុងជ្រោយក្នុងការទំនាក់ទំនងរវាងកងទ័ព និងរដ្ឋាភិបាលនៃប្រទេសទាំង ២ ដែលទំនាក់ទំនងនេះមានតាំងពីយូរលង់ណាស់មកហើយ។
នេះជាលើកទី ៣ ហើយដែលបញ្ជាការដ្ឋានទ័ពពិសេសបានទទួលអំណោយឆត្រពីកងទ័ពរំដោះប្រជាជនចិន ដោយលើកទី ១ ទទួលបានឆត្រប្រភេទធីណាញ ( T-9 ) ចំនួន ២០ ឆត្រ លើកទី ២ ទទួលបានឆត្រប្រភេទ ភីហ្វរ ( P-4 ) ចំនួន ៧០ ឆត្រ លើកទី ៣ នេះទទួលបានឆត្រប្រភេទ ធីណាញ (T-9) ចំនួន ៣០០ ឆត្រ ប្រភេទឆត្របញ្ជា ៥០ ឆត្រ និងប្រភេទឆត្រស្ពតស្រ៊ីឌី (Sport 3D ) ចំនួន ៥០ ឆត្រ។
លោក ចាប ភក្តី ថ្លែងថា កងទ័ពរំដោះប្រជាជនចិនជានិច្ចកាលតែងតែជួយដល់ប្រទេសកម្ពុជា និងកងយោធពលខេមរភូមិន្ទលើគ្រប់វិស័យ ដោយឡែកជួយដល់បញ្ជាការដ្ឋានទ័ពពិសេសនូវគ្រឿងយោធថូបករណ៍ជាច្រើនទៀតសំដៅពង្រឹង និងពង្រីកកិច្ចសហប្រតិបត្តិការគ្រប់ជ្រុងជ្រោយ ពិសេសរវាងកងទ័ពពិសេសទាំង ២ កម្ពុជា-ចិនឱ្យកាន់តែរឹងមាំថែមទៀត។
លោកថ្លែងថា៖ «បញ្ជាការដ្ឋានទ័ពពិសេសសង្ឃឹម និងមានជំនឿជឿជាក់ថា កងទ័ពរំដោះប្រជាជនចិននៅតែបន្តជួយឧបត្ថម្ភជ្រោមជ្រែងគ្រប់បែបយ៉ាងដល់បញ្ជាការដ្ឋានទ័ពពិសេសទាំងស្មារតីសម្ភារ ដែលចាំបាច់ដល់ការបណ្តុះបណ្តាលធនធានមនុស្សប្រកបដោយសក្តានុពលលើវិស័យការពារជាតិមាតុភូមិកម្ពុជា។
លោក ថាង ហាវ អនុព័ន្ធយោធាចិនប្រចាំនៅកម្ពុជាថ្លែងក្នុងពិធីនេះថា បញ្ជាការដ្ឋានទ័ពពិសេសនៃប្រទេសកម្ពុជាជានិច្ចកាលតែងតែចូលរួមសហការណ៍យ៉ាងស្អិតរមួតជាមួយកងទ័ពពិសេសរំដោះប្រជាជនចិន ពិសេសនៅក្នុងលំហាត់នាគមាសរវាងកងទ័ពរំដោះប្រជាជនចិន និងកងយោធពលខេមរភូមិន្ទមុនព្រឹត្តិការណ៍ការរីករាលដាលនៃជំងឺកូវីដ ១៩៕
