.jpg)
រូបភាព រដ្ឋបាលខេត្តកំពង់ចាម
កំពង់ចាមៈ រដ្ឋបាលខេត្តកំពង់ចាមប្តេជ្ញានឹងសហការឱ្យបានល្អប្រសើរជាមួយអង្គការ Cambodia Vision របស់អូស្ត្រាលី ដើម្បីជំរុញឱ្យការពិនិត្យ និងព្យាបាលជំងឺភ្នែក ត្រចៀក ច្រមុះ និងបំពង់កជូនប្រជាពលរដ្ឋឱ្យទទួលបានជោគជ័យ។
ការប្តេជ្ញាបែបនេះធ្វើឡើងក្នុងជំនួបរវាងលោក អ៊ុន ចាន់ដា អភិបាលខេត្តកំពង់ចាម និង ប្រតិភូរបស់អង្គការ Cambodia Vision ដែលដឹកនាំដោយលោកស្រី យ៉ាង ធីតា នៅសាលាខេត្តកំពង់ចាមកាលពីថ្ងៃទី ១០ ខែមិថុនា។
អង្គការ Cambodia Vision គឺជាអង្គការមិនរកកម្រៃតូចមួយរបស់ប្រទេសអូស្ត្រាលី ដែលបង្កើតឡើងដើម្បីផ្ដល់ការព្យាបាល បង្ការភាងងឹត ស្ដារឡើងវិញនូវការស្ដាប់ និងនិយាយទៅតាមតំបន់នៃប្រទេសកម្ពុជា។
អង្គការនេះមានគម្រោងចុះមកពិនិត្យ និងព្យាបាលជំងឺភ្នែក ត្រចៀក ច្រមុះ និងបំពង់កជូនប្រជាពលរដ្ឋនៅក្នុងខេត្តកំពង់ចាម និងប្រជាពលរដ្ឋដែលរស់នៅជាប់ព្រំប្រទល់ខេត្តកំពង់ចាម ដោយឥតគិតថ្លៃនាពេលឆាប់ៗខាងមុខ។
លោក អ៊ុន ចាន់ដា ថ្លែងថា ជំងឺត្រចៀក ច្រមុះ និងបំពង់ក គឺជាជំងឺពិបាកព្យាបាល និងត្រូវការចំណាយថវិកាច្រើន ប្រសិនបើអ្នកជំងឺទៅព្យាបាលនៅមន្ទីរពេទ្យឯកជន។
លោកថ្លែងថា៖ «រដ្ឋបាលខេត្តកំពង់ចាមនឹងធ្វើការសហការឱ្យបានល្អប្រសើរជាមួយអង្គការ Cambodia Vision ក្នុងគោលបំណងជំរុញឱ្យបេសកកម្មខាងលើទទួលបានជោគជ័យយ៉ាងត្រចេះត្រចង់ ក្នុងបុព្វហេតុដើម្បីសុខភាពប្រជាពលរដ្ឋ»៕
