សៀមរាបៈ អាជ្ញាធរជាតិអប្សរាគ្រោងដាក់ឱ្យដំណើរការវង់ទស្សនាថ្មី ចំនួន ២ ខ្សែ៖ គឺខ្សែទី ១ នៅប្រាសាទចៅសាយទេវតា និងទី ២ នៅប្រាសាទធម្មនន្ទ ដើម្បីលើកតម្លៃប្រាង្គប្រាសាទបុរាណ ដែលភ្ញៀវទេសចរអាចដើរទស្សនាបានគ្រប់ជ្រុងជ្រោយនៃចំណុចសំខាន់ៗរបស់ប្រាសាទ។
លោក យី សុថា មន្ត្រីអាជ្ញាធរជាតិអប្សរាដែលបានដកស្រង់សំដី លោក យូ ចន្ថា ជាមន្ត្រីនាយកដ្ឋានអភិវឌ្ឍន៍វប្បធម៌សារមន្ទីរ បទដ្ឋានបេតិកភណ្ឌ និងជាអ្នកទទួលខុសត្រូវក្រុមការងាររៀបចំខ្សែទស្សនា នៅក្នុងរមណីយដ្ឋានអង្គរ បានឱ្យដឹងថា ខ្សែទស្សនានៅប្រាសាទចៅសាយទេវតា និងប្រាសាទធម្មនន្ទ នឹងត្រូវរៀបចំ ចំនួន ២ ដំណាក់កាល រួមមានទី ១៖ គឺរៀបចំនៅប្រាសាទចៅសាយទេវតា ដើម្បីបង្ហាញទិសដល់ភ្ញៀវឱ្យចូលទស្សនាតាមផ្លូវចូលច្រកខាងកើត ព្រោះកន្លងមក ភ្ញៀវទេសចរដែលមកទស្សនាប្រាសាទនេះ និយមដើរចូលតាមច្រកខាងជើង ជាហេតុធ្វើឱ្យភ្ញៀវមិនបានទស្សនាគ្រប់ជ្រុងជ្រោយនៃចំណុចសំខាន់ៗក្នុងប្រាសាទមួយនេះ។
ដោយឡែកដំណាក់កាលទី ២ ធ្វើក្នុងរយៈពេលវែង គឺនៅពេលដែលគម្រោងរៀបចំតំបន់ទ្វារជ័យរហូតដល់ទំនប់បារាយណ៍ខាងកើតរួចរាល់ វង់ទស្សនាដែលនឹងដាក់ឱ្យដំណើរការនេះ ភ្ញៀវទេសចរត្រូវរក្សាទុកមធ្យោបាយធ្វើដំណើរនូវចំណតខ្លោងទ្វារជ័យ ដោយចាប់ផ្តើមទស្សនាចំណុចសំខាន់ៗ នៅក្នុងប្រាសាទធម្មនន្ទ រួចបន្តដំណើរទស្សនាទៅកាន់សួនបណ្តុះកូនឈើរបស់អាជ្ញាធរជាតិអប្សរា ទស្សនារហាត់ទឹក ដោយភ្ជាប់ជាមួយស្ទឹងសៀមរាប ស្ពានបុរាណ និងបន្ទាប់មកត្រូវបន្តទស្សនាប្រាសាទចៅសាយទេវតាតាមច្រកខាងកើត។
អាជ្ញាធរជាតិអប្សរាបញ្ជាក់ថា៖ «ដោយខ្សែទស្សនាទាំង ២ ខាងលើ គ្រោងដាក់ឱ្យដំណើរការក្នុងពេលឆាប់ៗនេះ ព្រោះបច្ចុប្បន្នក្រុមការងារកំពុងគិតគូររៀបចំ ជាផ្ទាំងព័ត៌មាន បរិយាយអំពីចំណុចសំខាន់ៗនៃរូបចម្លាក់ និងប្រាសាទ ស្លាកសញ្ញាបង្ហាញទិស និងភ្នាក់ងារសម្រាប់ជួយសម្រួលដល់ភ្ញៀវជាដើម»។
អាជ្ញាធរនេះបានឱ្យដឹងទៀតថា ការរៀបចំខ្សែទស្សនាបាននាំមកនូវសុវត្ថិភាពដល់ប្រាសាទលើសពីនេះនឹងនាំឱ្យភ្ញៀវទេសចរបានស្គាល់ច្បាស់ និងទទួលបានបទពិសោធល្អៗពីការទស្សនាប្រាសាទបុរាណ។ ក្នុងន័យនេះ អាជ្ញាធរជាតិអប្សរា សូមលើកទឹកចិត្តដល់ភ្ញៀវទេសចរជាតិ និងអន្តរជាតិ គោរពតាមការណែនាំនៃវង់ទស្សនា ដែលបានរៀបចំឡើង៕