.jpg)
សៀមរាបៈ អាជ្ញាធរខេត្តសៀមរាបបានបើកកិច្ចពិភាក្សាពីការត្រៀមបម្រុងស្បៀងសង្គ្រោះបន្ទាន់ ដើម្បីឆ្លើយតបករណីមានគ្រោះមហន្តរាយទឹកជំនន់ និងគ្រោះរាំងស្ងួត ឬឧប្បត្តិហេតុផ្សេងៗកើតឡើង បន្ទាប់ពីខេត្តនេះមានភ្លៀងធ្លាក់ជាប់គ្នាជាបន្តបន្ទាប់ដែលធ្វើឱ្យតំបន់ទំនាបលិចទឹកយូរថ្ងៃ។
កិច្ចប្រជុំពិភាក្សាត្រៀមស្បៀងសង្គ្រោះបន្ទាន់នេះ ធ្វើឡើងកាលពីថ្ងៃទី ១០ ខែមិថុនា នៅសាលាខេត្តសៀមរាប។
រដ្ឋបាលខេត្តសៀមរាបបានឱ្យដឹងតាមហ្វេសប៊ុកថា៖ «[នៅ] តំបន់ស្រែវស្សា ឬស្រូវដំឡើងទឹក ស្ថានភាពប្រែប្រួលអាកាសធាតុបណ្ដាលឱ្យមានភ្លៀងធ្លាក់ជាប់គ្នាជាបន្តបន្ទាប់ក្នុងដំណាក់កាលប្រជាកសិករ ចាប់ផ្ដើមភ្ជួររាស់ សាបព្រោះស្រូវ ធ្វើឱ្យតំបន់ទំនាប លិចទឹកយូរថ្ងៃមានការរលួយខូចនូវគ្រាប់ពូជ ហើយកន្លែងមួយចំនួនទៀតកសិករមិនអាចចូលទៅចូលភ្ជួររាស់បានដោយសារទឹកច្រើន»។
ប្រភពដដែលបញ្ជាក់ថា នៅតំបន់ស្រែប្រាំង ឬស្រែប្រដេញទឹកក្នុងខេត្តនេះ ក៏មានការដកហូតដីព្រៃលិចទឹកនៅតំបន់ ៣ នៃបឹងទន្លេសាប និងការកាត់ឆ្វៀលជូនប្រជាពលរដ្ឋដែលអាស្រ័យផលផងដែរ៕
