.jpg)
បាត់ដំបងៈ លោកវរសេនីយ៍ឯក ចាន់ សុធី នាយការិយាល័យនគរបាលចរាចរណ៍ផ្លូវគោកបានដឹកនាំកម្លាំងក្នុងការិយាល័យល្បាតចល័តតាមដងផ្លូវក្នុងក្រុងបាត់ដំបង ឃាត់បានរថយន្តធុនតូចនិងធុនធ្ងន់ចំនួន ៨ គ្រឿង ដែលល្មើសការហាមចូលក្នុងក្រុង និងដឹកសំពីងសំពោងនៅ ថ្ងៃទី ១១ ខែ មិថុនា ឆ្នាំ ២០២២ នេះ។
លោកវរសេនីយ៍ឯក ចាន់ សុធី នាយការិយាល័យនគរបាលចរាចរណ៍ផ្លូវគោកបានឱ្យដឹងថា ក្នុងការឃាត់រថយន្តធុនធំបើកបរល្មើសស្លាកសញ្ញាចូលក្រុង និងរថយន្តដឹកសំពីងសំពោងចំនួន ៨ គ្រឿងនោះមានរថយន្តធុនធ្ងន់ ៥ គ្រឿង និងរថយន្តដឹកសំពីងសំពោង ៣ គ្រឿង។ បច្ចុប្បន្ន រថយន្តនិងអ្នកបើកបរត្រូវបានសមត្ថកិច្ចនាំមកការិយាល័យដើម្បីអនុវត្តតាមច្បាប់ស្តីពីចរាចរណ៍ផ្លូវគោក។
លោកនាយការិយាល័យនគរបាលចរាចរណ៍ផ្លូវគោកបានឱ្យដឹងទៀតថា ប្រតិបត្តិការនេះធ្វើឡើងដោយអនុវត្តតាមយោបល់បញ្ជាដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាយោបល់របស់លោកវរសេនីយ៍ឯក ប៉ូវ វណ្ណឌី ស្នងការរងផែនការងារសណ្តាប់ធ្នាប់ផងដែរ៕
