ភ្នំពេញៈ ថ្លែងក្នុងពិធីសំណេះសំណាលជាមួយគណៈគ្រប់គ្រង សាស្ត្រាចារ្យ និងគរុសិស្សនៃសាលាគរុកោសល្យ និងវិក្រឹតការខេត្តកំពត នាព្រឹកថ្ងៃទី ១១ ខែមិថុនានេះ លោក ហ៊ុន ម៉ានី បានថ្លែងថា ការយល់ច្បាស់ពីចក្ខុវិស័យរបស់ សង្គមជាតិ ការសម្លឹងមើលឱ្យឆ្ងាយ និងយល់ច្បាស់ពីតួនាទីដ៏មានតម្លៃរបស់លោកគ្រូ អ្នកគ្រូម្នាក់ៗចំពោះការអភិវឌ្ឍជាតិជាកត្តាសំខាន់បំផុត។
ខណៈនៃការលើកឡើងពីគុណតម្លៃនៃវិជ្ជាជីវៈគ្រូបង្រៀន លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា ក៏បានលើកឡើងអំពីការកំណត់វិស័យអាទិភាពក្នុងដំណើរការអភិវឌ្ឍប្រទេសជាតិ ហើយសង្កត់ធ្ងន់ថាក្នុងវិស័យនីមួយៗទាមទារនូវធនធានមនុស្សដែលមានសមត្ថភាព។
លោកបញ្ជាក់ថា៖ «ជាក់ស្តែង តាមរយៈ គោលនយោបាយជាតិនានា ជាពិសេសយុទ្ធសាស្ត្រចតុកោណ ដំណាក់កាលទី៤ (២០១៩-២០២៣) រាជរដ្ឋាភិបាលកម្ពុជា បានកំណត់យក «មនុស្ស» ជាអាទិភាពទីមួយ មុនផ្លូវ ភ្លើង ទឹក ដែលការអភិវឌ្ឍធនធានមនុស្ស ប្រាកដណាស់ចេញពីតួនាទីដ៏សំខាន់របស់លោកគ្រូ-អ្នកគ្រូ»។
លោកថាការអប់រំ គឺជាអាទិភាពមួយក្នុងចំណោមអាទិភាពនានាសម្រាប់ការរីកចម្រើនរបស់សង្គមជាតិ គ្រប់កាលៈទេសៈ ចាប់តាំងពីការរំដោះចេញពីរបបប្រល័យពូជសាសន៍ រហូតដល់ដំណាក់កាលចុងក្រោយនៃការរីករាលដាលនៃជំងឺកូវីដ១៩ និងបន្តទៅថ្ងៃអនាគត៕