.jpg)
ភ្នំពេញៈ នាយកដ្ឋានប្រឆាំងបទល្មើសបច្ចេកវិទ្យាប្រកាស ឱ្យបង្កើនការប្រុងប្រយ័ត្នក្នុងការប្រើប្រាស់បណ្តាញទំនាក់ទំនងសង្គមហ្វេសប៊ុក ព្រោះក្នុងរយៈពេលថ្មីៗនេះមានជនខិលខូចបង្កើតផេកក្លែងក្លាយដោយប្រើឈ្មោះនិង ឡូហ្គោ របស់ធនាគារ ABA ពិតៗ ដើម្បីផ្សព្វផ្សាយពីការឈ្នះរង្វាន់ទឹកប្រាក់ ២ ម៉ឺនរៀល ដល់អ្នកដែលទាយលេខក្នុងរូបភាពត្រូវចំនួន ១០០ នាក់ដំបូង។
នាយកដ្ឋានប្រឆាំងបទល្មើសបច្ចេកវិទ្យាបានឱ្យដឹងនៅថ្ងៃទី ១១ ខែមិថុនានេះថា ជនខិលខូចបានបង្កើតផេកក្លែងបន្លំធ្វើជាធនាគារ ABA ហើយបានផ្សព្វផ្សាយពីការឈ្នះរង្វាន់ដែលមានចំនួនទឹកប្រាក់ ២០.០០០រៀល ដល់អ្នកដែលបានទាយលេខក្នុងរូបភាពត្រូវចំនួន ១០០ នាក់ដំបូង។
បើតាមការស្រាវជ្រាវរបស់នាយកដ្ឋាន ផេកក្លែងក្លាយទាំងអស់នេះ គឺជាល្បិចរបស់ពួកក្រុមជនខិលខូចដើម្បីបង្កើនចំនួនផេក Like ឬដើម្បីលួចប្រមូលយកទិន្នន័យរបស់អ្នកប្រើប្រាស់។ នៅពេលខ្លះទៀតនោះ ពួកគេនឹងទាមទារឱ្យធ្វើការបង់ប្រាក់បន្តិចបន្តួចដើម្បីឱ្យលោកអ្នកមានការជឿជាក់ ប៉ុន្តែនេះជាល្បិចដើម្បីបោកបញ្ឆោតយកប្រាក់កាស ឬដើម្បីលួចយកលេខប័ណ្ណឥណទានរបស់លោកអ្នកទៀតផង។
នាយកដ្ឋាននេះបញ្ជាក់ថា៖ «សូមណែនាំដល់អ្នកប្រើប្រាស់ទាំងអស់ កុំជឿលើការឈ្នះរង្វាន់ ដែលផ្សព្វផ្សាយតាមរយៈបណ្ដាញទំនាក់ទំនងសង្គមណាមួយនោះ ព្រោះភាគច្រើនវាគឺជាការបោកបញ្ឆោត។ សូមលោកអ្នកកុំចុចនៅលើតំណភ្ជាប់ ឬធ្វើការចែកចាយបន្ត ដែលនាំឱ្យខាតបង់ពេលវេលា ឬប្រាក់កាសរបស់លោកអ្នកតែប៉ុណ្ណោះ»៕
