ភ្នំពេញៈនគរបាលព្រហ្មទណ្ឌកម្រិតស្រាលរាជធានីភ្នំពេញបានកសាងសំណុំរឿងបញ្ជូនបុរសសង្ស័យម្នាក់និងវត្ថុតាងដាវសាមូរ៉ៃចំនួន១៩១ដើមទៅសាលាដំបូងរាជធានីភ្នំពេញនៅថ្ងៃទី១២ មិថុនា បន្ទាប់ពីចាប់ខ្លួនបាន២ថ្ងៃនៅភូមិត្នោតជ្រំ សង្កាត់បឹងទំពុន២ ខណ្ឌមានជ័យ ករណីបង្ហោះលក់ដាវសាមូរ៉ៃតាមអនឡាញ។
លោក ប៊ុន សត្យា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍នៅថ្ងៃទី១២ មិថុនាថា បុរសជាជនសង្ស័យឈ្មោះ ទីវ ឈុនទី អាយុ២៤ឆ្នាំ ស្នាក់នៅបណ្តោះអាសន្នក្នុងបន្ទប់ជួលនៃផ្ទះលេខ៣៧០ ក្នុងភូមិត្នោតជ្រំ២ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
លោកបន្តថា ជនសង្ស័យរួមទាំងវត្ថុតាងត្រូវបានសមត្ថកិច្ចរបស់លោកដែលទទួលបានការអនុញ្ញាតពីលោកឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញធ្វើសន្និសីទសារព័ត៌មានបង្ហាញមុខជាសាធារណៈនៅថ្ងៃទី១២ មិថុនា មុនបញ្ជូនបន្តទៅសាលាដំបូងរាជធានីភ្នំពេញដើម្បីចាត់ការបន្តតាមផ្លូវច្បាប់។ ចំពោះដាវនោះគឺមុតណាស់បើកាប់ដៃគឺត្រូវដាច់ដៃហើយ។
លោកថ្លែងថា៖«ករណីបុរសសង្ស័យខាងលើខ្ញុំបានបញ្ជូនទៅតុលាការរាជធានីភ្នំពេញនៅថ្ងៃនេះហើយ(ថ្ងៃទី១២ មិថុនា)បន្ទាប់ពីបង្ហាញមុខជាសាធារណៈ។ជនសង្ស័យពាក់ព័ន្ធការជួញដូរអាវុធខុសច្បាប់និងលក់ដូរអាវុធខុសច្បាប់»។
បើតាមលោក សត្យា ជនសង្ស័យត្រូវបានសមត្ថកិច្ចរបស់លោកស្រាវជ្រាវនិងឃាត់ខ្លួននៅម៉ោងប្រមាណជា៤រសៀលថ្ងៃទី១០ មិថុនា ឆ្នាំ២០២២ នៅម្តុំស្ថាននីយប្រេងឥន្ទនៈPTTក្នុងភូមិសាស្ត្រសង្កាត់ស្ទឹងមានជ័យទី២ ខណ្ឌមានជ័យ ខណៈជនសង្ស័យកំពុងលក់ដាវ១ដើមឱ្យអតិថិជនក្នុងតម្លៃ៥០ដុល្លារ។បន្ទាប់មកសមត្ថកិច្ចលោកបានឱ្យជនសង្ស័យនាំទៅបន្ទប់ជួលក្នុងភូមិត្នោតជ្រំ២ ហើយឆែកឆេររកឃើញដាវនៅទាំងស្រោមថ្មីៗចំនួន១៩០ដើម
ទៀត។ជនសង្ស័យបានប្រើគណនីហ្វេសប៊ុកឈ្មោះ Seven Tii និងតាមផេកឈ្មោះ Seven Cambosamoria ដើម្បីផ្សព្វផ្សាយលក់ដាវរបស់ខ្លួន។
ជនសង្ស័យ ទីវ ឈុនទី បានប្រាប់ដល់ក្រុមអ្នកសារព័ត៌មានក្នុងពេលបង្ហាញមុខជាសាធារណៈនៅថ្ងៃទី១២មិថុនាថា ដាវសាមូរ៉ៃ នេះគឺគាត់បានបញ្ជាទិញពីក្រុងប៉ោយប៉ែត្រ ខេត្តបន្ទាយមានជ័យ ដែលទំនិញនេះគាត់ដឹងថា គេយកមកពីប្រទេសថៃ ហើយម៉ូយផ្ញើបន្តតាមរថយន្តឈ្នួលមកឱ្យគាត់នៅរាជធានីភ្នំពេញ។ គាត់លក់ដាវសាមូរ៉ៃក្នុង១ដើមតម្លៃពី៥០ទៅ៦០ដុល្លារអាមេរិកនិងទើបតែលក់បាន១០ដើមប៉ុណ្ណោះហើយគាត់លក់ឱ្យអតិថិជនសម្រាប់ដាក់តាំងតែប៉ុណ្ណោះ។
ជនសង្ស័យឆ្លើយថា៖«បើខ្ញុំដឹងថាលក់ទៅវាខុសច្បាប់ខ្ញុំមិនលក់ទេ ខ្ញុំអត់ដឹងថាខុសច្បាប់ទេ។អតិថិជនដែលទាក់ទងទិញដាវពីខ្ញុំភាគច្រើនជាអតិថិជនមានវ័យចំណាស់ទេ គាត់ទិញដាវនេះសម្រាប់យកទៅដាក់តាំងនៅអាសនៈ តែខ្ញុំមិនឃើញក្មេងស្ទាវមកទិញដាវខ្ញុំទេ ព្រោះវាថ្លៃ»។
ពាក់ព័ន្ធនឹងករណីនេះ លោកសេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិតបានថ្លែងនៅថ្ងៃទី១២មិថុនា ថា បញ្ហានេះបណ្តាលមកពីបុគ្គលខ្លួនឯងមិនបានសិក្សាពីសីលធម៌ គុណធម៌ក្នុងសង្គម ហើយបុគ្គលនោះមិនបានធ្វើការងារមួយដែលសមរម្យ។ការពិតទៅការលក់សម្ភារដូចជាដាវសាមូរ៉ៃឬវត្ថុដែលអាចបង្កឱ្យមានគ្រោះថ្នាក់ដល់ជីវិតមនុស្សឬក៏ប៉ះពាល់ដល់បញ្ហាផ្សេងៗក្នុងសង្គមគឺជារឿងមួយមិនល្អនោះទេ។
លោកបានបន្តថានេះជាទង្វើខុសច្បាប់ ហើយការដែលអាជ្ញាធរបានចាត់វិធានការចំពោះបញ្ហានេះជារឿងសមរម្យដោយលោកក៏សូមលើកទឹកចិត្តដល់អាជ្ញាធរមានសមត្ថកិច្ច គួរតែពិចារណាធ្វើការណែនាំលើបុគ្គលម្នាក់នេះដើម្បីឱ្យគាត់បានសិក្សាឬស្វែងយល់អំពីច្បាប់ទម្លាប់ហើយឱ្យគាត់សន្យាជាលាយលក្ខណ៍អក្សរហើយចុះហត្ថលេខាឬមានស្នាមផ្តិតមេដៃដើម្បីកុំឱ្យគាត់ប្រព្រឹត្តទង្វើបែបនេះទៅថ្ងៃក្រោយទៀត។
លោកបន្ថែមថា៖«សមត្ថកិច្ចអប់រំឬឱ្យគាត់លាឈប់ពីរបរណាដែលនាំឱ្យមានបញ្ហាទៅដល់ការងារពាក់ព័ន្ធនឹងផ្លូវច្បាប់។អ៊ីចឹងសម្រាប់ខ្ញុំកត្តាទាំងអស់នេះគឺវាកើតចេញពីការចង់រកលុយឱ្យបានលឿនហើយចង់ពង្រីកទីផ្សាររបស់គាត់ទេហើយប្រហែលជាគាត់គ្មានបំណងអ្វីដែលធ្វើឱ្យប៉ះពាល់ដល់សង្គមជាតិទេ គ្រាន់តែគាត់គិតថាបណ្តាញសង្គមងាយឱ្យគាត់ចាប់យកអតិថិជនឬក៏ពង្រីកទីផ្សារសម្រាប់ខ្លួនគាត់»។
លោកបន្តទៀតថា ចំពោះការអនុវត្តរបស់អាជ្ញាធរមានសមត្ថកិច្ច ជាពិសេសគឺកងកម្លាំងប្រដាប់អាវុធនិងមន្ត្រីនគរបាលគួរតែពង្រឹងទៅលើបញ្ហានេះ។ជាពិសេសគួរតែផ្សព្វផ្សាយឱ្យបានទូលំទូលាយនូវព័ត៌មានណាដែលគួរផ្សព្វផ្សាយនៅទីសាធារណៈនិងព័ត៌មានណាដែលមិនគួរបង្ហោះលក់ផលិតផលដែលច្បាប់ហាមឃាត់ដើម្បីកុំឱ្យកើតមានបញ្ហាដដែលៗបន្តទៀត។
បើតាមលោក សុជាតិ សមត្ថកិច្ចគួរតែចាត់វិធានការស្វែងរកគោលដៅធំ ហើយអប់រំយុវជនឬក៏ក្មេងៗឬក៏អ្នកប្រកបរបរអាជីវកម្មផ្នែកការលក់សម្ភារដូចជា ដាវសាមូរ៉ៃ កាំបិត កាំភ្លើង ដែលនាំឱ្យប៉ះពាល់ដល់សន្តិខុសសង្គម ឬផ្លូវច្បាប់។មន្ត្រីមានសមត្ថកិច្ចគួរតែផ្សព្វផ្សាយពីផលប៉ះពាល់ដល់សុវត្ថិភាពរបស់អ្នកលក់ដែលគាត់មិនទាន់យល់ថារបស់ណាដែលលក់ទៅខុសច្បាប់និងរបរណាដែលលក់ទៅត្រូវច្បាប់។
លោកបានបញ្ជាក់ថា៖ «សមត្ថកិច្ចគួរបន្តនូវការយកចិត្តទុកដាក់ហើយសូមកុំឱ្យមន្ត្រីខាងកងកម្លាំងរបស់យើងដែលទទួលបន្ទុកការអនុវត្តឬក៏ចាត់វិធានការតឹងរ៉ឹងលើបញ្ហានេះជាប់ពាក់ព័ន្ធជាមួយនឹងជនល្មើសឬក៏អាចថាស្ថិតនៅពីក្រោយខ្នងការជួញដូរឬការជួយសម្រួលក្នុងការចែកចាយ កាំបិត ដាវសាមូរ៉ៃ អីជាដើម»៕
វីដេអូ៖