ភ្នំពេញៈ លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានថ្លែងប្រាប់កាសែត ភ្នំពេញប៉ុស្តិ៍នៅថ្ងៃទី១២ ខែមិថុនា ថា ក្រុមមន្ត្រីអនុវត្តច្បាប់ចរាចរណ៍ផ្លូវគោក ធ្វើការផាកពិន័យតែទៅលើស្លាកលេខយានជំនិះណាដែលបាត់អត្តសញ្ញាណទាំងស្រុងតែប៉ុណ្ណោះ ដោយការផាកពិន័យនេះមិនអនុវត្តទៅលើស្លាកលេខយានជំនិះណា ដែលនៅសម្គាល់បានអត្តសញ្ញាណនោះទេ។
លោក ស ថេត ថ្លែងថា៖ «សមត្ថកិច្ចផាកពិន័យលុះត្រាតែស្លាកលេខនោះរលុបទាំងស្រុង បាក់បែកទាំងស្រុក ឬដាក់បិទបាំងទាំងស្រុកប៉ុណ្ណោះ ប៉ុន្តែបើផ្ទុយពីនេះដូចជាស្នាម ឬឆ្កូត ដែលនៅអាចកំណត់អត្តសណ្ណាណសម្គាល់បានគឺសមត្ថកិច្ចមិនផាកពិន័យនោះទេ»។
ទោះយ៉ាងណាក៏ដោយ លោក ស ថេត អះអាថា កន្លងមក សមត្ថកិច្ចមានការផាកពិន័យទៅលើយានជំនិះណាដែលបានពាក់ស្លាកលេខបន្លំ ដើម្បីធ្វើចរាចរណ៍នៅលើដងផ្លូនប៉ុណ្ណោះ។
ការថ្លែងរបស់មន្ត្រីមានសមត្ថកិច្ច បានធ្វើឡើងក្រោយពីមាន បុគ្គលម្នាក់ថតវីដេអូ Tik Tok បង្ហោះនៅក្នុងបណ្ដាញសង្គម ដោយបង្ហាញសារពីនគរបាលផាកពិន័យម៉ូតូចាប់ពី១២ម៉ឺនរៀលឡើងទៅ ឱ្យតែផស្លាកលេខសម្គាល់យានជំនិះនោះ ស្នាមប្រឡាក់ ឬឃើញមិនសូវច្បាស់ ខុសទ្រង់ទ្រាយដើម ឆ្កូត ហើយធ្វើចរាចរណ៍នៅលើផ្លូវ ដែលបានបង្កនូវភាពចលាចលមួយឬក៏ផ្អើលដល់សាធារជន។
ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញកាលពីថ្ងៃទី១០ ខែមិថុនានេះ បានស្រាយបំភ្លឺថា វីដេអូនោះជាការផ្សព្វផ្សាយព័ត៌មានមិនពិត ដែលធ្វើឱ្យប្រជាពលរដ្ឋមានការយល់ច្រឡំ ជាពិសេសគោលបំណងអាក្រក់ក្នុងការបំពុលបរិយាកាសសង្គម ជាពិសេសក្នុងន័យបង្ខូចកិត្តិយស ដល់សមត្ថកិច្ចនគរបាលចរាចរណ៍ផ្លូវគោក ដែលជាអ្នកអនុវត្តច្បាប់។
សេចក្តីបំភ្លឺបន្តថា៖« បុគ្គលរូបនេះបានធ្វើការផុសផ្សព្វផ្សាយនៅលើបណ្តាញសង្គម TikTok ថាសមត្ថកិច្ចនឹងធ្វើការផាកពិន័យចំពោះយានយន្តណាដែលពាក់ផ្លាកមានស្នាមប្រឡាក់ ឆ្កូត ។ល។ ចំពោះការចុះផ្សព្វផ្សាយនោះដោយគ្មានការពិត ខ្វះការយល់ដឹងអំពីច្បាប់ចរាចរណ៍ផ្លូវគោកនៃព្រះរាជាណាចក្រកម្ពុជា»។
ក្រសួងសាធារណការ និងដឹកជញ្ជូន បានបកស្រាយបំភ្លឺថា ចំពោះស្លាកលេខ ដែលរលុប ឬឆ្កូតតិចតួចអាចកំណត់អត្តសញ្ញាណយានជំនិះបាន មិនតម្រូវឱ្យធ្វើការប្តូរនោះទេ។
ក្រសួងបន្តថា៖« ចំពោះស្លាកលេខយានជំនិះបាក់ រហែក រលុប អក្សរឬលេខ ឬត្រូវប្តូរថ្មី អាចធ្វើការស្នើសុំប្តូរស្លាកលេខថ្មីបាន ប៉ុន្តែរក្សាស៊េរី និងលេខនៅដដែល»៕
វីដេអូ៖