កណ្ដាលៈ ស្រេង សុខា អតីតស្នងការរងខេត្តកណ្តាលត្រូវបានកម្លាំងនគរបាលនៃនាយកដ្ឋានព្រហ្មទណ្ឌ ត្រូវបាន ចាប់ខ្លួនបញ្ជូនទៅដាក់ពន្ធនាគារខេត្តកណ្ដាលនៅថ្ងៃទី១២ ខែមិថុនា ក្រោយពីតុលាការសម្រេចកាត់ទោសកំបាំងមុខ កាលពីខែវិច្ឆិកា ឆ្នាំ២០២១។
លោក ង៉េង ជួ ប្រធាននាយកដ្ឋានព្រហ្មទណ្ឌបានប្រាប់ភ្នំពេញប៉ុស្តិ៍នៅថ្ងៃទី១២ មិថុនា ថា ជនជាប់ចោទឈ្មោះ ស្រេង សុខា ជាអតីតស្នងការរងខេត្តកណ្តាលត្រូវបានកម្លាំងនគរបាលនៃនាយកដ្ឋានព្រហ្មទណ្ឌចាប់ខ្លួនបានកាលពីថ្ងៃទី១១មិថុនា ឆ្នាំ ២០២២ហើយលោកបានបញ្ជូនបន្តទៅសាលាដំបូងខេត្ត កណ្តាលនៅថ្ងៃទី១២ មិថុនា ដើម្បីប្រគល់ជូនតុលាការចាត់ការតាមនីតិវិធី។
លោកថ្លែងថា៖«ជនម្នាក់នេះខាងនាយកដ្ឋានព្រហ្មទណ្ឌខ្ញុំបានចាប់ខ្លួនគាត់(ថ្ងៃទី១១មិថុនា)តាមដីកាបង្គាប់ឱ្យចាប់ខ្លួនរបស់តុលាការខេត្តកណ្តាល។យើងបញ្ជូនគាត់ឱ្យខាងតុលាការហើយហើយតុលាការបានឃុំខ្លួនគាត់ហើយ»។
យោងតាមដីកាបង្គាប់ឱ្យចាប់ខ្លួនដែលមានចុះហត្ថលេខាដោយលោករស់ ផុនចាន់និមល ជាចៅក្រមជំនុំជម្រះ នៃតុលាការខេត្ត កណ្តាល កាលពីថ្ងៃទី២៩ ខែ វិច្ឆិកា ឆ្នាំ ២០២១ហើយដែលភ្នំពេញប៉ុស្តិ៍ទើបតែទទួលបាននៅថ្ងៃទី១២ មិថុនា ឆ្នាំ ២០២២ បានសរសេរក្នុងខ្លឹមសារថា ជនជាប់ចោទឈ្មោះ ស្រេង សុខា ហៅ ទ្រី ភេទ ប្រុស អាយុ ៤០ ឆ្នាំជនជាតិខ្មែរ សញ្ជាតិខ្មែរ មានរបរជានគរបាល។ ត្រូវបានផ្តន្ទាទោសដាក់ពន្ធនាគារកំណត់រយៈពេល ១ឆ្នាំ ៦ខែ ពីបទប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត ប្រព្រឹត្តនៅភូមិកោះគរ សង្កាត់រការខ្ពស់ ក្រុង តាខ្មៅ ខេត្ត កណ្តាល កាលពីថ្ងៃទី៣០ ខែ កក្កដា ឆ្នាំ ២០២០ ជាបទល្មើសព្រហ្មទណ្ឌដែលមានចែង និងផ្តន្ទាទោសស្របតាមបញ្ញត្តិមាត្រា ២៥៣ នៃច្បាប់ភូមិបាល។
បើតាមមន្ត្រីនគរបាលខេត្ត កណ្តាលមួយរូបស្នើសុំមិនឱ្យបញ្ចេញឈ្មោះបានឱ្យដឹងនៅថ្ងៃទី១២ មិថុនា ថា អតីត លោកស្នងការរង ស្រេង សុខា ម្នាក់នេះ បានបង្កបញ្ហាតាំងពីជំនាន់ លោកម៉ៅ ភិរុណ ជាអភិបាលខេត្តកណ្តាលម្ល៉េះ ដោយ ជនម្នាក់នេះបានបញ្ជាឱ្យចៅសង្កាត់រការខ្ពស់ស៊ីញ៉េ រឿងដីបឹងទទឹងថ្ងៃនៅក្នុងភូមិកោះគរ សង្កាត់ រការខ្ពស់ ក្រុង តាខ្មៅ យក ដីរដ្ឋជាង ២០ ហិកតា ក្នុងដីរដ្ឋសរុបជាង ៤០ ហិកតាយកទៅកាន់កាប់។
បន្ទាប់មក ជនរូបនេះក៏ត្រូវបានលោក សខេង រដ្ឋមន្ត្រីក្រសួងមហាផ្ទៃចេញលិខិតមួយច្បាប់ចុះថ្ងៃទី២១ខែ មេសា ឆ្នាំ ២០២០ផ្អាកការងារជាស្នងការរងបណ្តោះអាសន្នហើយត្រូវបានលោកឈឿន សុចិត្ត ស្នងការនគរបាលខេត្ត កណ្តាល មានចំណាត់ការបន្តមករហូតមានដីកាតាមចាប់ខ្លួននេះ៕