.jpg)
កិច្ចសន្ទនា រវាងមន្ត្រី សង្គមស៊ីវិល និងយុវជនក្នុងតំបន់នៅខេត្តកំពត កាលពីថ្ងៃទី១០ មិថុនា ។ រូបថត ក្រសួងយុត្តិធម៌
កំពតៈមន្រ្ដីជាន់ខ្ពស់ក្រសួងយុត្តិធម៌និងតំណាងអង្គការសង្គមស៊ីវិល យុវជនកម្ពុជានិងយុវជនមកពីប្រទេសក្នុងតំបន់ចំនួន២៦រូបបានសន្ទនាគ្នាដើម្បីផ្លាស់ប្ដូរទស្សនៈនិងមតិយោបល់អំពីតួនាទីសង្គមស៊ីវិលនិងការចូលរួមរបស់យុវជនក្នុងកិច្ចការនយោបាយនិងការអភិវឌ្ឍប្រទេសដើម្បីបង្កើនកិច្ចសហការរួមគ្នាអភិវឌ្ឍប្រទេស។
កិច្ចសន្ទនានេះធ្វើឡើងរយៈពេល៣ថ្ងៃចាប់ពីថ្ងៃទី១០ ខែមិថុនា ឆ្នាំ២០២២ ដល់ថ្ងៃទី១២មិថុនា នៅខេត្តកំពត ដែលរៀបចំនិងឧបត្ថម្ភដោយមូលនិធិរបស់អាល្លឺម៉ង់ Konrad Adenauer Stinting ក្រោមប្រធានបទផ្សេងៗគ្នា។
ក្នុងនោះមានកិច្ចសន្ទនាអំពីស្ថានភាពនិងតួនាទីសង្គមស៊ីវិលនៅកម្ពុជានិងក្នុងសង្គមប្រជាធិបតេយ្យដទៃទៀត។ តួនាទីនិងការចូលរួមរបស់យុវជនក្នុងកិច្ចការនយោបាយនៅកម្ពុជានិងក្នុងសង្គមប្រជាធិបតេយ្យដទៃទៀតនិងទំនាក់ទំនងរវាងរដ្ឋាភិបាលនិងសង្គមស៊ីវិលនិងបញ្ហាប្រឈមនៅកម្ពុជានិងក្នុងសង្គមប្រជាធិបតេយ្យដទៃទៀត។
លោក ជិន ម៉ាលីន រដ្ឋលេខាធិការក្រសួងយុត្តិធម៌ ថ្លែងប្រាប់ភ្នំពេញ ប៉ុស្ដិ៍ នៅថ្ងៃទី១២ មិថុនាថា លោកបានចូលរួមជាវាគ្មិនក្នុងកិច្ចសន្ទនាជាមួយតំណាងមកពីសង្គមស៊ីវិលនិងយុវជនមកពីបណ្ដាប្រទេសក្នុងតំបន់អាស៊ាន ទាក់ទងនឹង «អំពីតួនាទីសង្គមស៊ីវិល និងការចូលរួមរបស់យុវជនក្នុងកិច្ចការនយោបាយ»។
លោកថ្លែងថា នេះគឺជាកិច្ចសន្ទនាថ្នាក់តំបន់រៀបចំដោយមូលនិធិរបស់ អាល្លឺម៉ង់ Konrad Adenauer Stinting ។ ក្នុងកិច្ចសន្ទនានេះមានវាគ្មិនមកពីតំណាងអង្គការសង្គមស៊ីវិលនិងមានយុវជនចូលរួមមកពីបណ្ដាប្រទេសក្នុងតំបន់អាស៊ានចំនួន៥ ទៀត រួមជា មួយយុវជនកម្ពុជាសរុប ២៦រូប។
លោកបញ្ជាក់ថា៖«តាមរយៈកិច្ចសន្ទនានេះគឺយើងជជែកគ្នាអំពីតួនាទីរបស់យុវជនថាតើយុវជនមានតួនាទីអ្វីខ្លះក្នុងកិច្ចការនយោបាយ ក្នុងការអភិវឌ្ឍប្រទេសនៅកម្ពុជា និងការដកបទពិសោធនៅតាមបណ្ដាប្រទេសជិតខាងក្នុងតំបន់»។
លោកបន្តថា៖«ក្នុងនោះក៏បានពិភាក្សាអំពីតួនាទីរបស់សង្គមស៊ីវិលថាតើសង្គមស៊ីវិល បានដើរតួនាទីសំខាន់អ្វីខ្លះ ក្នុងកិច្ចការនយោបាយនិងការអភិវឌ្ឍប្រទេសជាតិ ហើយបញ្ហាប្រឈមរវាងទំនាក់ទំនងសង្គមស៊ីវិលថា តើធ្វើយ៉ាងម៉េចដើម្បីឱ្យបង្ខិតការយល់ខុសគ្នា ភាពមិនទុកចិត្ដគ្នារវាងរាជរដ្ឋាភិបាលនិងសង្គមស៊ីវិលឱ្យកាន់តែមានគម្លាតតូចហើយអាចធ្វើការសហការគ្នាបានដើម្បីឈានទៅការអភិវឌ្ឍប្រទេសរួមគ្នា»។
លោកស្រី ស៊ិន ពុទ្ធារី នាយិកាប្រតិបត្តិ អង្គការគណៈកម្មាធិការសហប្រតិបត្តិការដើម្បីកម្ពុជា (គ.ស.ក) ដែលបានចូលរួមជាវាគ្មិនក្នុងកិច្ចសន្ទនានេះបានលើកឡើងថា សង្គមស៊ីវិលជឿថា ការផ្ដល់ឱកាសឱ្យយុវជន និងការកសាងសមត្ថភាពរបស់ពួកគេនឹងផ្ដល់ឱ្យពួកគេនូវជម្រើសក៏ដូចជាកិច្ចសហប្រតិបត្ដិការល្អនៅក្នុងកិច្ចការងារគោលនយោបាយ កិច្ចការងារបច្ចេកទេសក្នុងការប្រើប្រាស់ចំណេះដឹងលើការអភិវឌ្ឍប្រទេសនាពេលខាងមុខ។
លោកស្រីថ្លែងថា៖«អ៊ីចឹងយើងជឿជាក់ថា យុវជនគឺជាចលករដ៏សំខាន់នៅក្នុងការធ្វើឱ្យមានការផ្លាស់ប្ដូរជាវិជ្ជមាន សម្រាប់សង្គម និងប្រទេសទាំងមូល»៕
