.jpg)
ជនសង្ស័យពាក់ព័ន្ធនឹងគ្រឿងញៀន ត្រូវបាននគរបាលខេត្តប៉ៃលិន ចាប់បញ្ជូនទៅសាលាដំបូងខេត្តប៉ៃលិននៅថ្ងៃទី១៣មិថុនា។ រូបថត នគរបាល
ប៉ៃលិនៈ ជនសង្ស័យប្រុស-ស្រីចំនួន ៦ នាក់ ត្រូវបាននគរបាលប្រឆាំងគ្រឿងញៀនខេត្តប៉ៃលិន បញ្ជូនទៅសាលាដំបូងខេត្ត នៅថ្ងៃទី ១៣ មិថុនា បន្ទាប់ពីចាប់ខ្លួនបាន ២ ថ្ងៃ ពាក់ព័ន្ធនឹងគ្រឿងញៀនប្រភេទអក្សរ WY ជាង ១ ពាន់គ្រាប់ និងប្រភេទម៉ាទឹកកកទម្ងន់ ៣២២,០៣ ក្រាម។
លោក សេង ចិន្តា នាយការិយាល័យប្រឆាំងបទល្មើសគ្រឿងញៀនខេត្តប៉ៃលិន ឱ្យដឹងនៅថ្ងៃទី ១៣ មិថុនាថា ជនសង្ស័យទី១- ឈ្មោះ ឈុន លីហួរ ភេទ ប្រុស អាយុ ៣០ ឆ្នាំ ជាកម្មករ រស់នៅភូមិ អូរតាប្រាង សង្កាត់ ប៉ៃលិន ក្រុងប៉ៃលិន ទី២- ឈ្មោះ មាន ចាន់ ភេទ ប្រុស អាយុ ២៧ ឆ្នាំ រស់នៅ ភូមិ-សង្កាត់ អូរតាវ៉ៅ ក្រុង-ខេត្តប៉ៃលិន។ ទី៣- ឈ្មោះ វុធ គន្ធី ភេទ ស្រី អាយុ ៣៨ ឆ្នាំ រស់នៅ ភូមិ-ឃុំ កំរៀង ស្រុកកំរៀង ខេត្តបាត់ដំបង។
ទី៤- ឈ្មោះ វុធ វ៉ាង ភេទ ប្រុស អាយុ ២៩ ឆ្នាំ រស់នៅភូមិភ្នំកុយ ឃុំសាលាក្រៅ។ ទី៥- ឈ្មោះ ឌួង សង្ហា ភេទ ប្រុស អាយុ ២៤ ឆ្នាំ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន និងឈ្មោះ អ៊ុ ដាលីន ភេទ ស្រី អាយុ ២៤ ឆ្នាំ រស់នៅភូមិភ្នំកុយ ឃុំសាលាក្រៅ ស្រុកសាលក្រៅ ខេត្តប៉ៃលិន។
លោកថ្លែងថា៖ «ក្រុមជនទាំង ៦ នាក់នេះ ខាងជំនាញរបស់ខ្ញុំ បានកសាងសំណុំរឿងបញ្ជូនពួកគេបន្តទៅសាលាដំបូងខេត្តប៉ៃលិន នៅថ្ងៃនេះ (ថ្ងៃទី ១៣ មិថុនា) ហើយ ។ ពួកគេពាក់ព័ន្ធនឹងបទល្មើសជាក់ស្តែង»។
លោកវរសេនីយ៍ទោ ចិន្តា បញ្ជាក់ថា ការងារបង្ក្រាបបទល្មើសគ្រឿងញៀននេះ ធ្វើឡើងកាលពីរសៀលថ្ងៃទី ១១ ខែ មិថុនា ឆ្នាំ ២០២២ បន្ទាប់ពីលោកឧត្តមសេនីយ៍ទោ សេង សុគន្ធ ស្នងការនគរបាលខេត្តប៉ៃលិន និងនគរបាលប្រឆាំងគ្រឿងញៀនរបស់លោកធ្វើការស្រាវជ្រាវ រហូតកំណត់មុខសញ្ញាបាន។ ចំពោះការងារបង្ក្រាបបទល្មើសគ្រឿងញៀននេះ ក៏មានការសម្របសម្រួលពីលោក សេង គីមឡាក់ ព្រះរាជអាជ្ញាអមសាលាដំបូងខេត្តប៉ៃលិនផងដែរ ។
លោកបន្តថា គោលដៅទី១ សមត្ថកិច្ចឃាត់បានជនសង្ស័យ ឈ្មោះ ឈុន លីហួរ បច្ចុប្បន្នរស់នៅភូមិអូរតាប្រាង ជាមួយវត្ថុតាងគ្រឿងញៀនប្រភេទ ម៉ាទឹកកក (ICE) ចំនួន ៥ កញ្ចប់ស្មើ ទម្ងន់ ២៣,៩០ ក្រាម (ថ្នាំសុទ្ធ)។
គោលដៅទី២ គឺសមត្ថកិច្ចឃាត់ខ្លួនបានជនសង្ស័យ ឈ្មោះ មាន ចាន់ រឹបអូសបានគ្រឿងញៀនប្រភេទម៉ាទឹកកក ១ កញ្ចប់ ទម្ងន់ ០,៥៤ ក្រាម និងម៉ូតូ ១ គ្រឿង។ ជនទី៣- ឈ្មោះ វុធ គន្ធី ភេទស្រី ដែលសមត្ថកិច្ចដកហូតបានវត្ថុតាងគ្រឿងញៀន ម៉ាទឹកកក ចំនួន ១១ កញ្ចប់ ទម្ងន់ ២៩៧,៥៩ ក្រាមថ្នាំញៀនប្រភេទ WY ចំនួន ១ ៤០៨ គ្រាប់ ទម្ងន់ ១៣៤,៣៤ ក្រាម ជញ្ជីងថ្លឹងថ្នាំញៀន ១ ព្រមទាំងថង់វេចខ្ចប់ថ្នាំញៀនចំនួន ២ ដុំធំ និងបក្ខពួកចំនួន៣នាក់ទៀត។
បើតាម លោក ចិន្តា ចំពោះវត្ថុតាងគ្រឿងញៀនសរុបរួមមាន ម្សៅក្រាមពណ៌សថ្លាម៉ាទឹកកក (ICE) ទម្ងន់ ៣២២,០៣ ក្រាម (ថ្នាំសុទ្ធ) ថ្នាំញៀនប្រភេទអក្សរ WY ចំនួន ១ ៤០៨ គ្រាប់ ទម្ងន់សរុប ១៣៤,៣៤ ក្រាម (ថ្នាំសុទ្ធ) រថយន្តចំនួន ១ គ្រឿងពណ៌លឿងពាក់ស្លាកលេខ 2A-6243 គោយន្តកន្ត្រៃចំនួន ១ គ្រឿង ម៉ូតូ ២ គ្រឿង និងទូរស័ព្ទចំនួន ៣ គ្រឿង ជញ្ជីងសម្រាប់ថ្លឹងគ្រឿងញៀនចំនួន ២ គ្រឿង រួមទាំងឧបករណ៍សម្រាប់ជក់ថ្នាំញៀន និងថង់វេចខ្ចប់ថ្នាំញៀនចំនួន ២ ដុំធំ៕
