ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាឱ្យអាជ្ញាធរខេត្ដនៅតាមបឹងទន្លេសាប ពន្លឿនការអនុវត្ដបទបញ្ជាឱ្យកាត់ឆ្វៀលដីបឹងនេះដល់ប្រជាពលរដ្ឋរស់នៅជាក់ស្ដែងយូរឆ្នាំ និងបន្តដាំដុះកូនឈើលើផ្ទៃដីដែលបានរឹបអូសមកវិញ ហើយថែរក្សាដីបឹងទន្លេសាបឱ្យបានគង់វង្សលែងមានការកាប់ទន្ទ្រាន។ លោកបញ្ជាបែបនេះក្នុងពិធីប្រគល់សញ្ញាបត្រ និងបើកវគ្គសិក្សាថ្មីដល់សិស្សសាលាភូមិន្ទរដ្ឋបាលនាថ្ងៃទី ១៣ ខែមិថុនា។
នៅពេលអញ្ជើញជាអធិបតីក្នុងពិធីនោះ លោកប្រាប់ទៅអាជ្ញាធរពាក់ព័ន្ធបឹងទន្លេសាបត្រូវអនុវត្តបទបញ្ជា ឬសារ ដែលលោកបានបញ្ជូនទៅឱ្យហើយនោះត្រូវធ្វើឱ្យបានលឿន និងត្រូវមានការទទួលខុសត្រូវចំពោះប្រជាពលរដ្ឋ។ នេះស្ថិតក្នុងវិធីចាត់ចែង ដែលមិនត្រូវមើលស្រាល ហើយលោកត្រូវយកការទទួលខុសត្រូវចំពោះមុខប្រជាពលរដ្ឋ និងចំពោះមុខភាពគង់វង្សនៃបឹងទន្លេសាប។
លោក ហ៊ុន សែន ថ្លែងថា៖ «ឥឡូវអស់លោកធ្វើទៅគ្មានអ្នកណាស្គាល់ភូមិសាស្ត្រជាងអស់លោកទេ។ អស់លោកទៅឆ្វៀលកាត់ចេញពីតំបន់ ៣។ ឥឡូវឧទាហរណ៍ថា នៅកន្លែងហ្នឹង ផ្ទៃដីហ្នឹង គាត់ [ពលរដ្ឋ] កំពុងតែគ្រប់គ្រង ៥ ពាន់ហិកតាយើងកាត់អា ៥ ពាន់ហិកតាឱ្យគាត់ចេញហើយយើងអាចទុកបន្ថែមប្រមាណ ១០ ភាគរយ ឬប៉ុន្មានហិកតាទៀតឱ្យគាត់ទទួលផល ដូចដែលខ្ញុំចុះធ្វើនយោបាយចាស់ សកម្មភាពថ្មី លើវិស័យដីធ្លីនៅឆ្នាំ ២០១២ គឺស្ថានភាពស្បែកខ្លា»។
លោកបញ្ជាក់ថា លោកនឹងមិនរុះរើពលរដ្ឋចេញពីបឹងទន្លេសាបតាមអនុសាសន៍របស់អង្គការ-សង្គមស៊ីវិលមួយចំនួននោះទេ។ លោកប្រាប់ឱ្យអង្គការណាដែលផ្ដល់អនុសាសន៍នោះទៅធ្វើខ្លួនឯងចុះ។ លោកឱ្យដឹងថា កន្លងទៅមានអង្គការមួយចំនួនទាមទារដាក់បឹងទន្លេសាបទៅជាតំបន់អ្វីមួយ ប៉ុន្ដែលោកបដិសេធ។
លោកបញ្ជាក់ថា៖ «ខ្ញុំថាអត់ទេ ខ្ញុំត្រូវឆ្វៀលអាហ្នឹងឱ្យគាត់ [ពលរដ្ឋ]។ ប៉ុន្ដែបើសិនជាថា យើងមាន ប៉ុន្មានកន្លែងហ្នឹង [តំបន់បឹងទន្លេសាប] ឱ្យគាត់ទៅជាព្រៃសហគមន៍ កន្លែងហ្នឹងហើយទុកឱ្យពួកគាត់ថែទាំកន្លែងហ្នឹងល្អជាងគេ។ គាត់ថែទាំ គាត់រកឧសនៅកន្លែងហ្នឹង គាត់អាចចាប់ត្រីនៅកន្លែងហ្នឹង»។
ក្រៅពីការកាត់ឆ្វៀលដីបឹងទន្លេសាប លោកនាយករដ្ឋមន្ដ្រីក៏បានអំពាវនាវ ពលរដ្ឋកុំកាប់ព្រៃ ឬចូលទៅទន្ទ្រានដីព្រៃលិចទឹកបឹងទន្លេសាបបន្ថែមទៀត។
លោកថា៖ «អ៊ីចឹងអស់លោកដើរធ្វើអាហ្នឹង។ អាតំបន់ ២ ខ្លះកាត់ ទៅជាតំបន់ ១ អាតំបន់ ៣ ខ្លះកាត់ទៅជាតំបន់ ២។ ប៉ុន្ដែតំបន់ ៣ ខ្លះ វាអត់នៅជិតតំបន់ ២ វាអត់នៅជិតគេ វានៅកណ្ដាលឯណោះ អ៊ីចឹងឆ្វៀលវាទៅ។ កុំឱ្យគាត់រស់នៅដោយមិនដឹងថា អនាគតអញត្រូវគេជម្លៀសទៅណា។ អាហ្នឹងទើបការដឹកនាំជាក់ស្ដែងនិយម»។
តាមការបង្ហាញរបស់លោកគ្រាន់តែនៅតំបន់កំពង់ភ្លុក (ខេត្ដសៀមរាប) ដីចម្ការ និងភូមិខ្លះមានប្រជាពលរដ្ឋរស់នៅតាំងពីឆ្នាំ ១៨៥២ ឬតាំងពីឆ្នាំ ១៧០០-១៦០០ ។ ដូច្នេះលោកក៏បានណែនាំឱ្យអាជ្ញាធរខេត្ដត្រូវកាត់ឆ្វៀលដីនោះឱ្យដល់ប្រជាពលរដ្ឋ ទោះបីតំបន់នោះស្ថិតនៅតំបន់ ៣ ក្តី ពីព្រោះតំបន់នោះពលរដ្ឋបានរស់នៅ និងកាន់កាប់ជាក់ស្ដែងជាយូរឆ្នាំមកហើយ។ លោកបញ្ជាក់ថា៖ «ហើយត្រូវធ្វើណា ធ្វើឱ្យជាក់ស្ដែងមិនមែននិយាយមុនបោះឆ្នោត ក្រោយបោះឆ្នោតអត់ធ្វើទេវើយ ប្រយ័ត្នប្រជាជនថាបោក»។
ជាមួយគ្នានេះ លោកថា មានចំណុច ២ ដែលលោកត្រូវនិយាយ ទី ១ ដីដែលរឹបអូសពីអ្នកដែលកាប់ថ្មីៗនេះដាំដើមឈើរួចហើយនៅតែបន្តដាំ ការពារឱ្យបាន។ ទី ២ កុំឱ្យមានការកាប់ទន្ទ្រានបន្ថែមត្រូវមើល។ លោកប្រាប់អាជ្ញាធរខេត្តដែលត្រូវបានផ្តល់អំណាចឱ្យហើយនោះ កុំងាកមករករដ្ឋមន្ដ្រីកសិកម្ម រដ្ឋមន្ដ្រីធនធានទឹក រដ្ឋមន្ដ្រីបរិស្ថាន រដ្ឋមន្ដ្រីក្រសួងដែនដី នគរូបនីយកម្មតទៅទៀត។
តាមអនុក្រឹត្យលេខ ១១១ អនក្រ.បក ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៧ ឧសភា បានសម្រួលផ្ទៃដីទំហំ ៣ ៤៤៨ ហិកតា ៧៧ អា ស្ថិតក្នុងភូមិសាស្ត្រខេត្តពោធិ៍សាត់ចេញពីតំបន់ ៣ នៃបឹងទន្លេសាប ដែលកំណត់ដោយអនុក្រឹត្យលេខ ១៩៧ អនក្រ.បក ចុះថ្ងៃទី ២៩ ខែសីហា ឆ្នាំ ២០១១ បញ្ចូលមកតំបន់ ២ ប្រគល់ជូនប្រជាពលរដ្ឋចំនួន ១ ៦៥៨ គ្រួសារ ប្រើប្រាស់ និងអាស្រ័យផល។
អភិបាលខេត្តពោធិ៍សាត់ លោក ជាវ តាយ មិនអាចទាក់ទងសុំការបញ្ជាក់រឿងដីធ្លីនៅបឹងទន្លេសាបបានទេនៅថ្ងៃទី ១៣ មិថុនា។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្ស លីកាដូ គាំទ្រអនុសាសន៍របស់លោក ហ៊ុន សែន។
លោកថ្លែងថា៖ «ពីព្រោះប្រជាពលរដ្ឋត្រូវការដី ដើម្បីបង្កបង្កើនផល។ កាលណាទុកយូរ ហើយរាជរដ្ឋាភិបាលបានសន្យាតាំងពីមុនបោះឆ្នោត អ៊ីចឹងពួកគាត់រង់ចាំ ដោយអន្ទះសាក្នុងការទទួលបានដីដែលត្រូវកាត់ឆ្វៀល និងបណ្ណកម្មសិទិ្ធ។ ពលរដ្ឋត្រូវការដីសម្រាប់បង្កបង្កើនផល ចំពោះដីដែលអាចធ្វើកម្មសិទ្ធិបាន ហើយដីខ្លះជាដីអាស្រ័យផលសម្រាប់ពួកគាត់។ អ៊ីចឹងវាជារឿងមួយចាំបាច់ដែរ។ ពីព្រោះវាទាក់ទងនឹងជីវភាពរស់នៅរបស់ប្រជាពលរដ្ឋ ដែលធ្លាប់ប្រើប្រាស់ និងអាស្រ័យផលជាយូរមកហើយ»៕
វីដេអូ៖