.jpg)
នគរបាលបង្ហាញជនសង្ស័យនិងវត្ថុតាងគ្រឿងញៀន។ រូបថត នគរបាល
ភ្នំពេញៈ នគរបាលនៃមន្ទីរប្រឆាំងគ្រឿងញៀនបានបញ្ជូន បុរសជនសង្ស័យ ២ នាក់ ទៅសាលាដំបូងរាជធានីភ្នំពេញនៅថ្ងៃទី ១៤ មិថុនា ក្រោយពីចាប់ខ្លួនបាន ៤ ថ្ងៃនៅរាជធានីភ្នំពេញ ជាមួយវត្ថុតាងគ្រឿងញៀនចម្រុះជាង ៥៤ គីឡូក្រាម។
លោក ឡឹក វណ្ណៈ នាយកមន្ទីរប្រឆាំងគ្រឿងញៀនបានប្រាប់ ភ្នំពេញ ប៉ុស្តិ៍ នៅថ្ងៃទី ១៤ មិថុនាថា ជនសង្ស័យឈ្មោះប៉ាវ ជាំង ភេទ ប្រុស អាយុ ៣១ ឆ្នាំ ជាជនជាតិចិន និងឈ្មោះ ត្រាវ រិទ្ធារ៉ា ភេទ ប្រុស អាយុ ២៦ ឆ្នាំ ជាជនជាតិខ្មែរ។
លោកថ្លែងថា៖ «ជនសង្ស័យទាំង ២ នាក់នេះ ពាក់ព័ន្ធនឹងអំពើជួញដូរគ្រឿងញៀន។ យើងបានកសាងសំណុំរឿងបញ្ជូនពួកគេទៅតុលាការនៅ (ថ្ងៃទី ១៤ មិថុនា) ដើម្បីឱ្យតុលាការចាត់ការបន្តទៀត»។
លោក អ៊ិន សុង នាយករងមន្ទីរប្រឆាំងគ្រឿងញៀនថ្លែងថា ជនសង្ស័យទាំង ២ នាក់នោះ ជាអ្នកជួញដូរគ្រឿងញៀន ប៉ុន្តែលោកបដិសេធផ្តល់ព័ត៌មានលម្អិតទាក់ទងនឹងប្រតិបត្តិការនៃការបង្ក្រាបបទល្មើសនេះ។
យោងតាមគេហទំព័ររបស់អគ្គស្នងការដ្ឋាននគរបាលជាតិចុះថ្ងៃទី ១៤ មិថុនា ឆ្នាំ ២០២២ បានសរសរថា កាលពីវេលាម៉ោង ១៤ និង ១៥ នាទី ថ្ងៃទី ១០ មិថុនា ឆ្នាំ ២០២២ សមត្ថកិច្ច ចម្រុះបានចុះស្រាវជ្រាវបង្ក្រាបករណីជួញដូរដោយខុសច្បាប់នូវសារធាតុញៀនក្នុង ៤ គោលដៅ។ ប្រតិបត្តិការនេះគឺធ្វើឡើងក្នុងថ្ងៃតែមួយគឺ គោលដៅទី១ នៅចំណុច ភ្លើងស្តុបកោសដូង ស្ថិតនៅក្នុងសង្កាត់ទឹកល្អក់ ៣ ខណ្ឌទួលគោក ឃាត់ខ្លួនជនសង្ស័យបានម្នាក់ និងគ្រឿងញៀនហេរ៉ូអ៊ីន ៧ គីឡូនិងជាង ២៦ ក្រាម។
គោលដៅទី២ គឺនៅចំណុច ផ្លូវ ៣៤៥ ស្ថិតនៅក្នុងភូមិទំនប់ទី១ សង្កាត់ភ្នំពេញថ្មី ខណ្ឌសែនសុខ បានឃាត់រថយន្ត FORD RANGER ១ គ្រឿង ជនសង្ស័យ ១ នាក់ និងមេតំហ្វេតាមីន (ICE) ៣២ គីឡូ និង ៩៦៣ក្រាម, កេតាមីន ១៣ គីឡូនិងជាង ៨ ក្រាម។
គោលដៅទី៣សមត្ថកិច្ចបាន ឆែកឆេរផ្ទះជួលនៅចំណុច ផ្លូវលេខ ២ ក្នុងបូរីកាំកូស៊ីធី សង្កាត់ទួលសង្កែ ខណ្ឌប្ញស្សីកែវ ចាប់យកវត្ថុតាង មេតំហ្វេតមីន (ICE) ជិត ៦៨៩ ក្រាម។
គោលដៅទី៤ គឺសមត្ថកិច្ចបានឆែកឆេរនៅបន្ទប់ជួលលេខ ១៨២៥ អាផាធឺមែនប៉ាវលី នៅ ផ្លូវលេខ ១៣៩ សង្កាត់វាលវង្ស ខណ្ឌ ៧ មករា ចាប់យកវត្ថុតាង មេតំហ្វេតាមីន (ICE) ជាង ៤១៧ក្រាម, ថ្នាំគ្រាប់មេតំហ្វេតាមីនជាង ១៦៤ ក្រាម, ម្សៅកេតាមីនជិត ២១៣ ក្រាម និងម្សៅមិនច្បាស់ ១៩៣ ក្រាម។
ពាក់ព័ន្ធបញ្ហាគ្រឿងញៀននេះដែរ កាលពីថ្ងៃទី ១៣ មិថុនា ឆ្នាំ ២០២២ ក្នុងកិច្ចប្រជុំបូកសរុបលទ្ធផលការងារសម្អាតប្រាក់ជុំទី៩ និងជុំទី១០ និងទិសដៅការងារអនុវត្ត លោក ម៉ក់ ជីតូ អគ្គស្នងការរងនគរបាលជាតិទទួលផែនការងារបង្ក្រាបបទល្មើសគ្រឿងញៀនបានថ្លែងថា ការដាំដុះ ការជួញដូរ ការប្រើប្រាស់ និងការដឹកជញ្ជូនគ្រឿងញៀនឆ្លងកាត់ នៅតែមាន និងមិនមានការថយចុះដោយរាប់ទាំងពិភពលោក និងតំបន់ផង៕
