.jpg)
មន្ត្រីរដ្ឋាករទឹកស្វយ័ត រៀបចំតបណ្តាញទឹកស្អាតនៅតំបន់ព្រៃស ខណ្ឌដង្កោ រាជធានីភ្នំពេញ កាលពីឆ្នាំ ២០២១។ រូបថត រដ្ឋាករទឹកស្វយ័តភ្នំពេញ
ភ្នំពេញៈ រដ្ឋាករទឹកស្វយ័តក្រុងភ្នំពេញ កំពុងដោះស្រាយបញ្ហាខ្វះខាតទឹកស្អាតប្រើប្រាស់នៅតំបន់សង្កាត់ព្រៃស ឱ្យបានរួចរាល់ មុនរដូវប្រាំងឆ្នាំក្រោយ ខណៈតំបន់នេះមានប្រជាពលរដ្ឋប្រមាណជាង ២ ម៉ឺនគ្រួសារ ប្រឈមការខ្វះខាតទឹកស្អាតប្រើប្រាស់។ នេះបើតាមអគ្គនាយករដ្ឋាករទឹកស្វយ័តក្រុងភ្នំពេញ។
លោក ឡុង ណារ៉ូ អគ្គនាយក រដ្ឋាករទឹកស្វយ័តក្រុងភ្នំពេញ ថ្លែងក្នុងសន្និសីទសារព័ត៌មានស្ដីពី «បច្ចុប្បន្នភាពក្នុងការផ្គត់ផ្គង់ទឹកស្អាតនៅភូមិសាស្ត្ររាជធានីភ្នំពេញ» កាលពីថ្ងៃទី ៩ ខែមិថុនា នៅទីស្ដីការគណៈរដ្ឋមន្ត្រីថា អ្វីដែលរដ្ឋាករទឹកស្វយ័តកំពុងប្រមើលមើល និងកំពុងសិក្សា គឺនៅសង្កាត់ព្រៃស ត្រង់ចន្លោះផ្លូវជាតិលេខ ២ និងផ្លូវជាតិលេខ ៣ ដែលជាតំបន់ផ្តល់សេវារបស់រដ្ឋាករទឹក។ តាមការប៉ាន់ប្រមាណ ប្រហាក់ប្រហែលនឹងតំបន់កំបូល និងតំបន់ឈូកវ៉ា២ដែរ ដែលតំបន់នេះមានប្រមាណ ២-៣ ម៉ឺនអតិថិជន ដែលកំពុងខ្វះទឹក។
លោកថ្លែងថា៖ «ដូច្នេះដើម្បីឱ្យតំបន់ ដែលខ្វះសម្ពាធទឹកឱ្យមានសម្ពាធឡើងវិញ យើងត្រូវយកប្រភពទឹកពីតំបន់ផ្សេងមកបញ្ចូលនៅតំបន់ដែលខ្វះ។ រាល់ថ្ងៃ យើងកំពុងធ្វើការងារនេះយ៉ាងសស្រាក់សស្រាំបំផុត ដើម្បីសំដៅធានាថា រដូវប្រាំងឆ្នាំក្រោយតំបន់នេះពលរដ្ឋលែងខ្វះទឹកប្រើប្រាស់។ ពួកខ្ញុំកំពុងធ្វើការងារលើតំបន់នេះពីឥឡូវនេះទៅ»។
បើតាមលោកអគ្គនាយក នារដូវវស្សានេះ ពលរដ្ឋមានទឹកស្អាតប្រើប្រាស់គ្រប់គ្រាន់ ពីព្រោះទឹកទន្លេកើនឡើងខ្ពស់សមត្ថភាពផលិតទឹកស្អាតរបស់រដ្ឋាករទឹក អាចបូមទឹកកើនឡើងដល់ជាង ៦ សែន ៥ ម៉ឺនម៉ែត្រគុបជារៀងរាល់ថ្ងៃ។ រដូវវស្សានេះ រដ្ឋាករទឹកអាចបូមទឹកកើនឡើងបានប្រមាណ ៥-៦ ម៉ឺនម៉ែត្រគុប ក្នុង ១ ថ្ងៃ ដែលធ្វើឱ្យសម្ពាធទឹកមានការឡើងខ្ពស់អាចផ្គត់ផ្គង់គ្រប់គ្រាន់។ បើទឹកទន្លេកាន់តែឡើងខ្ពស់ថែមទៀត សមត្ថភាពផលិតកាន់តែកើនឡើងខ្ពស់ថែមទៀត។
លោកបញ្ជាក់ថា៖ «ដូច្នេះមានតែតំបន់ព្រៃសនេះមួយទេ ដែលយើងត្រូវធ្វើ ហើយដែលមានអតិថិជនប្រមាណ ២-៣ ម៉ឺនអតិថិជន។ យើងកំពុងរៀបចំដំណើរការសកម្មភាពធ្វើការងារ (Advance Action) ពីឥឡូវទៅហើយ ដើម្បីពិនិត្យមើលទីតាំងដែលខ្វះខាតទឹក»។
លោក ឡុង ណារ៉ូ ឱ្យដឹងថា បច្ចុប្បន្ន រដ្ឋាករទឹក មានបច្ចេកវិទ្យាថ្មី ហៅថា Water Calibration។ បច្ចេកវិទ្យានេះអាចយកសម្ពាធនៃការប្រើប្រាស់ទឹករបស់ប្រជាពលរដ្ឋនៅតាមតំបន់នានា ដែលមានបច្ចុប្បន្ន ដាក់ចូលទៅក្នុងប្រព័ន្ធកុំព្យូទ័រ ហើយប្រព័ន្ធកុំព្យូទ័រនឹងគណនាឃើញតំបន់ណាដែលមានសម្ពាធទឹកខ្សោយ ឬខ្វះទឹកសម្រាប់ធ្វើការដោះស្រាយ។
លោក ខាត់ សុខៃ ចៅសង្កាត់ព្រៃស ប្រាប់ ភ្នំពេញ ប៉ុស្ដិ៍ នៅថ្ងៃទី ១៣ មិថុនាថា សង្កាត់ព្រៃសមានភូមិចំនួន ១២ និងមានប្រជាពលរដ្ឋប្រមាណ ៤ ពាន់គ្រួសារ ក្នុងនោះមានពលរដ្ឋប្រមាណ២០ គ្រួសារ ដែលជាអ្នកមករស់នៅថ្មីមិនទាន់បានតបណ្ដាញទឹកស្អាតប្រើប្រាស់រួចរាល់នោះទេ។
លោកបានឱ្យដឹងថា ប្រជាពលដ្ឋនៅតំបន់សង្កាត់ព្រៃស បានតបណ្ដាញទឹកស្អាតរបស់រដ្ឋាករទឹកស្វយ័តក្រុងភ្នំពេញរួចរាល់គ្រប់ភូមិ តាំងពីឆ្នាំ២០២០។
លោកបញ្ជាក់ថា៖ «ទឹកនៅពេលយប់បានចេញគ្រាន់បើបន្តិច នៅពេលថ្ងៃទឹកចេញខ្សោយ។ភូមិមួយចំនួនប្រើស្ទើតែមិនកើត ទាល់តែយប់បានមានទឹកប្រើ»។
លោក សុខៃ បង្ហាញការសប្បាយចិត្ដ ក្រោយឮដំណឹងថា រដ្ឋាករទឹកកំពុងដោះស្រាយបញ្ហាខ្វះខាតទឹកនៅតំបន់សង្កាត់ព្រៃសនេះ ដោយសង្ឃឹមថា រដូវប្រាំងឆ្នាំក្រោយ នឹងលែងខ្វះខាតទឹកស្អាតប្រើប្រាស់ទៀត៕
