ភ្នំពេញៈ មន្ត្រីនគរបាលចរាចរណ៍ខណ្ឌពោធិសែនជ័យ ១ រូប ដែលបើកម៉ូតូបរទាំងស្រវឹងស្រា ត្រូវបាននគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វើការពិន័យដោយផ្អាកពីការងារចំនួន ៣ ខែ។ នេះបើតាមគេហទំព័រស្នងការដ្ឋាននគរបាលរាជធានីភ្នំពេញ។
យោងតាមគេហទំព័ររបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញបានបង្ហោះក្នុងផេករបស់ខ្លួន នៅថ្ងៃទី ១៤ មិថុនា ឆ្នាំ ២០២២ ថា បន្ទាប់ពីបានឃើញការចុះផ្សព្វផ្សាយនៅលើបណ្តាញសង្គមហ្វេសប៊ុក ទាក់ទងទៅនឹងមន្ត្រីនគរបាលចរាចរណ៍មួយរូប នៃអធិការដ្ឋាននគរបាលខណ្ឌពោធិ៍សែនជ័យ ដែលបានបើកបរម៉ូតូក្នុងស្ថានភាពស្រវឹងរេពេញផ្លូវ ហើយបានធ្វើឱ្យ ប៉ះពាល់ធ្ងន់ធ្ងរដល់កិត្តិយសរបស់មន្ត្រីនគរបាលជាតិ។
ប៉ុន្តែទង្វើនេះ គឺជាទង្វើរបស់បុគ្គល ដែលមន្ត្រីរូបនេះមិនអនុវត្តតាមបទបញ្ជា ក៏ដូចជាវិន័យរបស់កងកម្លាំង ជាពិសេសក្នុងនាមជាមន្ត្រីអនុវត្តច្បាប់។
គេហទំព័របន្តថា៖ «ដូច្នេះដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងគោលការដឹកនាំរបស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកថ្ងៃទី ១៤ ខែ មិថុនា ឆ្នាំ ២០២២ ការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ បានកោះហៅមន្ត្រីរូបនេះ ឱ្យចូលខ្លួនមកធ្វើការបំភ្លឺ ធ្វើកិច្ចសន្យា»។
គេទំព័រដដែលបញ្ជាក់ថា៖ «អនុវត្តវិន័យកងកម្លាំង ដោយសម្រេចចេញលិខិតព្រមានដោយផ្អាកការងារ និងដកបញ្ឈរជើងរយៈពេល ០៣ ខែ ហើយត្រូវបង្ហាញមុខ នៅការិយាល័យបុគ្គលិកជារៀលរាល់ថ្ងៃ»។
បើតាមគេហទំព័រ គឺស្នងការដ្ឋាននគរបាលរាជធានីភ្នំពេញ សូមថ្លែងអំណរគុណ ដល់ប្រជាពលរដ្ឋដែលបានផ្តល់ជាព័ត៌មាន ក៏ដូចជារូបភាពទាក់ទងបញ្ហានេះ។ ជាមួយគ្នានេះ ស្នងការដ្ឋាននគរបាល រាជធានីភ្នំពេញ រីករាយនឹងទទួលនូវការរិះគន់ក្នុងន័យស្ថាបនា៕