ភ្នំពេញៈ គិតតាំងពីឆ្នាំ ២០០១ មកដល់បច្ចុប្បន្ន សិស្សជាង ១ ៧០០ នាក់ នៅវិទ្យាល័យអប់រំពិសេសទាំង ៥ បានទទួលឧបករណ៍ជំនួយការស្តាប់ ពីបេសកកម្មរបស់លោក ហ្សង់ប៉ូល (Jean Paul Beraha) ដែលជាស្ថាបនិក ESC (Enfants Sourds du Cambodge) ដែលតែងតែមកពិនិត្យសុខភាពត្រចៀក និងផ្តល់ឧបករណ៍ជំនួយការស្តាប់ ដល់កុមារថ្លង់ និងខ្សោយការស្តាប់នៅកម្ពុជា។
ថ្មីៗនេះ លោក ហ្សង់ប៉ូល បានដឹកនាំក្រុមគ្រូពេទ្យស្ម័គ្រចិត្ត ពីប្រទេសបារាំង មកបន្តសកម្មភាពសប្បុរសធម៌របស់ខ្លួនជាលើកទី ៣៨ ដល់កុមារគ ថ្លង់។
លោក ម៉ែន សុវណ្ណ ជានាយកវិទ្យាល័យអប់រំពិសេសច្បារអំពៅ ដែលបានបង្កើតឡើងតាំងពីឆ្នាំ ១៩៩៨ និងបច្ចុប្បន្នមានសិស្សសរុប ១២១ នាក់ កំពុងរៀន បានបង្ហាញពីទឹកចិត្តរីករាយ ដែលបន្តទទួលបានជំនួយ។
លោកសុវណ្ណ បានប្រាប់ ភ្នំពេញ ប៉ុស្តិ៍ថា៖ «សម្រាប់ខ្ញុំវាជារឿងល្អណាស់ ព្រោះក្មេងៗអាចស្ដាប់សំឡេងបាន ព្រោះបើក្មេងមានបញ្ហាត្រចៀកមិនក្បែរធ្ងន់ គាត់អាចឮសឡេងឡាន ម៉ូតូស៊ីផ្លេពេលធ្វើដំណើរឆ្លងផ្លូវ ដែលនេះជាគុណប្រយោជន៍ដ៏សំខាន់មួយ»។
លោក ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិ សម្បទា និងជាអគ្គលេខាធិការ ក្រុមប្រឹក្សាសកម្មភាពជនពិការ បានលើកឡើងថា៖ «យើងអរគុណគាត់ ដែលបានយកសម្ភារទាំងអស់ហ្នឹង មកជួយដល់បងប្អូន ដែលមានពិការភាព ជាពិសេសអ្នកគរថ្លង់នៅកម្ពុជាយើង។ យើងចាត់ទុកថា កាយវិការនៃការជួយជាអំណោយសប្បុរសធម៌ក្តីជាបច្ចេកទេសក្ដី គឺបានចំណេញទៅដល់ផលប្រយោជន៍របស់បងប្អូន ដែលមានពិការភាពនៅកម្ពុជាយើង។ យើងលើកទឹកចិត្តឱ្យសប្បុរសជនដទៃ ក៏ដូចជាគាត់នៅតែបន្តកិច្ចការនេះ»។
លោក ហ្សង់ប៉ូល បានរំឭកប្រាប់ ភ្នំពេញ ប៉ុស្តិ៍ តាមរយៈការសរសេរឆ្លើយតប អំពីរឿងរ៉ាវ និងគំនិតបំផុសការដែលនាំឱ្យលោកបង្កើត អង្គការ ESC ថា គឺវាកើតឡើងបន្ទាប់ពីជំនួបនៅប្រទេសបារាំងរវាងលោក និងស្ថាបនិកនៃអង្គការគ្រួសារថ្មី លោក បេនីតូ (Benoit Duchateau-Arminjon) ។
លោក បេនីតូ បានបង្កើតសាលាឯកទេសទី១ សម្រាប់ពិការភាពភ្នែកនៅកម្ពុជាក្នុងឆ្នាំ ១៩៩៤ និង ឆ្នាំ ១៩៩៩ គាត់បានបង្កើតសាលាទី១ សម្រាប់កុមារគថ្លង់។
លោក ហ្សង់ប៉ូល បន្ថែមថា៖ «យើងក៏ចង់ចូលរូមចំណែកជួយ ហើយនៅ ខែកក្កដា ឆ្នាំ ២០០១ ក្រុមដំបូងរបស់អ្នកជំនាញផ្នែកសោតទស្សន៍បារាំង បានទៅខេត្តសៀមរាប រាជធានីភ្នំពេញ និងបាត់ដំបង ជាកន្លែងដែលយើងអាចផ្តល់សេវាថែទាំការស្តាប់ដល់សិស្សគថ្លង់។ បន្ទាប់មកនៅខែមីនា ឆ្នាំ ២០០២ យើងបានត្រឡប់មកវិញសម្រាប់បេសកកម្មលើកទី២។ យើងក៏បន្តបេសកកម្មរហូតមកដល់បច្ចុប្បន្ន ដោយមកក្នុង ១ ឆ្នាំ ២ ដង»។
និយាយអំពីដំណើរការសកម្មភាពនៃបេសកកម្មនេះផងដែរ លោក នាយកវិទ្យាល័យអប់រំពិសេសច្បារអំពៅ បានឱ្យដឹងដែរថា មុននឹងធ្វើការប្រគល់ជូនមួយៗ គឺតែងតែមានការត្រួតពិនិត្យ ពីកម្រិតត្រចៀករបស់សិស្សឱ្យបានច្បាស់លាស់។
មុនដំបូង ខាងសាលា បានសហការជាមួយគ្រូពេទ្យត្រចៀកគៀនឃ្លាំង ឱ្យមកសម្អាតអាចម៍ត្រចៀកសិស្ស ឬ បញ្ហាផ្សេងៗ។ បន្ទាប់ពីពិនិត្យហើយ មានមួយក្រុមទៀតវាស់មើលថាការបាត់បង់ការស្ដាប់របស់សិស្សកម្រិតណា។
បន្ទាប់ពីនោះ បានបន្តឱ្យក្រុម លោកហ្សង់ប៉ូល ពិនិត្យម្ដងទៀត និងសម្រេចថា សិស្សម្នាក់នោះ អាចទទួលបានឧបករណ៍ឬមិនបាន។ ព្រោះបើបាត់បង់ធ្ងន់ធ្ងរ បើទោះជាប្រើឧបករណ៍ជំនួយការស្ដាប់យ៉ាងណា ក៏មិនអាចឮបានដែរ។
មកដល់ចំនុចនេះ លោក ហ្សង់ប៉ូល បានបញ្ជាក់ថា ឧបករណ៍ជំនួយការស្ដាប់នេះអាចជួយក្មេងដែលបាត់បង់ការស្ដាប់ លើសពីកម្រិត ១០០ ដេកាប៊ែល។
លោក ក៏បានប្រាប់ពីអ្វីដែលឧបករណ៍ជំនួយការស្ដាប់ នឹងអាចជួយដល់សិស្សគថ្លង់ថា៖ «ឧបករណ៍នេះ អាចឱ្យសិស្សដែលថ្លង់ខ្លាំង អាចស្តាប់ឮសំឡេងបរិស្ថាន ដែលមានសារៈសំខាន់សម្រាប់សុវត្ថិភាព និងសុខុមាលភាពរបស់ពួកគេ»។ សិស្សដែលមានការបាត់បង់ការស្តាប់ធ្ងន់ធ្ងរ ឬមធ្យម អាចស្តាប់ឮសំឡេងនិយាយ ហើយអាចឱ្យពួកគេរៀនពីរបៀបនិយាយ ដោយមានជំនួយពីអ្នកព្យាបាលការនិយាយ។ អ្នកជំនាញទាំងនេះ បង្រៀនអ្នកខ្សោយការស្តាប់អំពីរបៀបកំណត់សំឡេង នៃការនិយាយ និងរបៀបបញ្ចេញសំឡេងនៃការនិយាយ។
ក្រៅពីផ្ដល់ឧបករណ៍ជំនួយក្នុងការស្ដាប់ លោក សុវណ្ណ បានឱ្យដឹងដែរថា គ្រប់សាលាទាំងអស់ក៏មានគ្រូជំនាញមួយៗ ដែលបារាំងបានបណ្ដុះបណ្ដាលឱ្យចេះជួសជុលឧបករណ៍ ពេលមានបញ្ហា។ តែបើម៉ាស៊ីនណា ដែលមានបញ្ហាធ្ងន់ធ្ងរ ទើបទុកឱ្យគាត់មកផ្ដល់ជូនថ្មី ឬជួសជុលឱ្យ ព្រោះ លោកហ្សង់ប៉ូល បាននាំក្រុមការងារមកកម្ពុជា១ឆ្នាំ ២ដង។
ប៉ុន្តែលោក ហ្សង់ប៉ូល បានបញ្ជាក់ថា ឧបករណ៍នេះ នឹងមានប្រសិទ្ធភាពច្រើនជាង ៤ឆ្នាំ បើសិនជាមានការថែរក្សាទុកដាក់បានត្រឹមត្រូវ។
លោកបានឱ្យដឹងដែរថា កន្លងមកលោក បានផ្តល់ឧបករណ៍ជំនួយការស្តាប់ឌីជីថលទំនើបៗរាប់ពាន់គ្រឿង។
លោកថា៖ «ក្នុងអំឡុងពេលបេសកកម្មម្ដងៗ យើងភ្ជាប់មកជាមួយឧបករណ៍ជំនួយការស្តាប់ប្រហែល ៥០០ នៅក្នុងវិទ្យាល័យអប់រំពិសេសចំនួន ៥ នៃប្រទេសកម្ពុជា ដែលស្ថិតនៅក្រោមក្រសួងអប់រំ យុវជន និងកីឡា រួមមាន ភ្នំពេញថ្មី ច្បារអំពៅ កំពង់ចាម សៀមរាប និងបាត់ដំបង»។
លោកបន្ថែមថា៖ «កន្លងមក សិស្សជាង ១ ៧០០ នាក់ ត្រូវបានពួកយើងផ្ដល់ការបំពាក់ដោយឧបករណ៍ជំនួយការស្តាប់ ហើយយើងបាននៅតែបន្តតាមដានពួកគាត់ ចាប់ពីថ្នាក់មត្តេយ្យដល់ថ្នាក់ទី១២ និងសាកលវិទ្យាល័យ រហូតដល់ពួកគាត់មានការងារធ្វើទៀត»។
លោកទទួលបានការបិរច្ចាកដូចជាពី ក្រុមហ៊ុន Amplifon ដែលជាអ្នកដឹកនាំសកលក្នុងការថែទាំសុខភាពសោតទស្សន៍ និងបុគ្គលឯកជនជាច្រើនរយនាក់ទៀត។
លោកបានប្រាប់ពីទស្សនវិស័យ បេសកកម្មរបស់លោក ថា៖ «យើងនឹងផ្តល់ការថែទាំការស្តាប់ដល់កុមារកម្ពុជា ដរាបណារដ្ឋមន្ត្រីក្រសួងអប់រំកម្ពុជា ត្រូវការជំនួយរបស់យើង។ យើងក៏បានចូលរួមក្នុងការបណ្តុះបណ្តាល និងបង្រៀនគ្រូបង្រៀន អ្នកព្យាបាលការនិយាយ និងអ្នកបច្ចេកទេសតាមរយៈ វិទ្យាស្ថានជាតិអប់រំពិសេស (NISE) ផងដែរ»។
លោក ឯម ច័ន្ទមករា ក៏បានឱ្យដឹងដែរថា កន្លងមករដ្ឋាភិបាល ក៏បានបំពេញតួនាទី និងជួយជ្រោមជ្រែង ជនមានពិការភាព និងអង្គការជាច្រើន ហើយក៏នឹងនៅតែបន្តការយកចិត្តទុកដាក់ដល់ពួកគាត់។
លោកបញ្ជាក់បន្ថែមថា៖ «រដ្ឋាភិបាលបានយក អង្គការគ្រួសារថ្មី កម្លាយជាវិទ្យាស្ថានវិទ្យាល័យអប់រំពិសេស ហើយបញ្ចូលឱ្យទៅជាសាលារៀនរបស់រដ្ឋហើយ។ គ្រូដែលបានបង្រៀនប្អូនៗទាំងអស់ហ្នឹង ក៏បានផ្ដល់ក្របខណ្ឌពិសេស សម្រាប់ពួកគាត់ក្លាយជាបុគ្គលិកសិក្សាធិការនៃក្រសួងអប់រំ យុវជន និងកីឡា»។
លោកបន្ថែមថា៖ «ក្រៅពីនេះ រដ្ឋាភិបាលនៅបន្តការជួយឧបត្ថម្ភទៅលើ ការបង់ថ្លៃទឹក ថ្លៃភ្លើង របស់វិទ្យាល័យច្បារអំពៅក្ដី ឬក៏អង្គការគ្រួសារថ្មី លើថ្លៃរដ្ឋបាលទូទៅ ឬប្រាក់បៀវត្សរបស់គ្រូបង្រៀននៅទីនោះ។ សម្ភារក៏ត្រូវបាន ក្រសួងអប់រំថែម ដូចជាម៉ាស៊ីនអក្សរប្រ៊ែល បំពាក់បន្ថែមសម្រាប់អ្នកពិការភ្នែក និងមានឧបករណ៍ជំនួយផ្សេងៗទៀត សម្រាប់អ្នកពិការគថ្លង់»៕