.jpg)
ពលរដ្ឋក្រីក្រទទួលប្រាក់ឧបត្ថម្ភពីរាជរដ្ឋាភិបាលពីខែឧសភាឆ្នាំនេះ។ រូប មូលនិធិជាតិជំនួយសង្គម
ភ្នំពេញៈ អស់រយៈពេល ២ ឆ្នាំមកហើយ ដែលរាជរដ្ឋាភិបាលកម្ពុជាបានដាក់ឱ្យអនុវត្តនូវកម្មវិធីឧបត្ថម្ភសាច់ប្រាក់ជូនពលរដ្ឋក្រីក្រ និងងាយរងគ្រោះក្នុងអំឡុងពេលមានវិបត្តិជំងឺកូវីដ ១៩ ដែលជាកម្មវិធីជំនួយសង្គម។
តាមរយៈកម្មវិធីដែលត្រូវបានដាក់ឱ្យអនុវត្តជាផ្លូវការកាលពីថ្ងៃទី ២៤ ខែមិថុនា ឆ្នាំ ២០២០ រដ្ឋាភិបាលបានចំណាយថវិកាជាង ៦៨ លានដុល្លារជួយដល់ជនងាយរងគ្រោះសរុបជាង ២,៧ លាននាក់នៃគ្រួសារសរុបជាង ៦៨ ម៉ឺនគ្រួសារនៅទូទាំងប្រទេស។
បើគិតត្រឹមថ្ងៃទី ២៤ ឧសភា ឆ្នាំ ២០២២ រដ្ឋាភិបាលបានបន្តបើកប្រាក់ដល់ជនងាយរងគ្រោះសម្រាប់ជុំទី ៩ លើកទី ២ ដែលសរុបមានពលរដ្ឋទទួលបានប្រាក់ឧបត្ថម្ភចំនួន ២៣ លើក។
ក្នុងស្ថានភាពឱនភាពសេដ្ឋកិច្ចដែលបង្កឡើងដោយសារការរាតត្បាតជាសកលនៃជំងឺកូវីដ ១៩ បានរុញច្រានប្រជាពលរដ្ឋកម្ពុជាឱ្យធ្លាក់ចូលទៅក្នុងភាពក្រីក្របន្ថែមទៀត។ ប៉ុន្តែតាមរយៈកម្មវិធីឧបត្ថម្ភសាច់ប្រាក់នេះពលរដ្ឋអាចបន្តរស់រានមានជីវិត និងវិលត្រឡប់ទៅប្រកបរបរចិញ្ចឹមជីវិតប្រចាំថ្ងៃជាប្រក្រតីឡើងវិញគួបផ្សំជាមួយការដាក់ចេញនូវវិធានការរបស់រដ្ឋាភិបាល និងក្រសួងសុខាភិបាលដែលមានប្រសិទ្ធភាព។
ពលរដ្ឋងាយរងគ្រោះជាពិសេសគ្រួសារដែលបានបណ្ណក្រីក្រទាំងមុនកូវីដ និងក្នុងអំឡុងមានវិបត្តិកូវីដបានថ្លែងអំណរគុណដល់រដ្ឋាភិបាលដែលបានយកចិត្តទុកដាក់គិតគូរដោយមិនបណ្តោយឱ្យនរណាម្នាក់ស្លាប់ដោយសារស្រេកឃ្លាន។
អ្នកស្រី ភួង រតនា រស់នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ បានថ្លែងថា អ្នកស្រីទទួលបានបណ្ណក្រីក្រអំឡុងពេលរីករាលដាលជំងឺកូវីដ ១៩ ជាង ១ ឆ្នាំមកហើយដោយក្នុងគ្រួសារអ្នកស្រីទទួលបាន ៣០ ម៉ឺនរៀលក្នុង ១ ខែ។
អ្នកស្រីថា៖ «គ្រួសារខ្ញុំមានសមាជិកច្រើនទទួលបាន ៣០ ម៉ឺនរៀល ឪពុកខ្ញុំពិការ ប្តីខ្ញុំធ្វើសំណង់ ហើយខ្ញុំនៅមើលថែកូន»។ ក្រៅពីនេះអ្នកស្រី រតនា ក៏ទទួលបានប្រាក់ឧបត្ថម្ភដោយឡែកនៅពេលពពោះកូនក្នុងអំឡុងពេលមានកូវីដថែមទៀតផងដែរ។
អ្នកស្រីបន្តថា៖ «ពេលខ្ញុំទម្ងន់ទៅពេទ្យម្តងបាន ៤ ម៉ឺនរៀលរហូតដល់ពេលទៅឆ្លងទន្លេបានលុយ ២០ ម៉ឺនរៀល និងបានលុយធ្វើដំណើរ ហើយបន្ទាប់ពីសម្រាលកូនហើយ ខ្ញុំនាំកូនទៅចាក់ថ្នាំ បានម្តង ៤ ម៉ឺនរៀល»។
អ្នកស្រីបានថ្លែងទាំងទឹកភ្នែករលីងរលោងអួលដើមក និងបានបញ្ចេញអារម្មណ៍ក្តុកក្តួលអរគុណដល់រដ្ឋាភិបាលថា ការផ្តល់ជំនួយនេះពិតជាបានជួយសម្រាលបន្ទុកក្នុងគ្រួសារអ្នកស្រីលើការចំណាយ ទឹក ភ្លើង និងទិញម្ហូបអាហារប្រចាំថ្ងៃ។
ជាមួយគ្នានេះដែរ អ្នកស្រី ចែម អន ដែលរស់នៅក្នុងសហគមន៍ ព្រែកតាគង់ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ បានថ្លែងដែរថា សម្រាប់សហគមន៍នេះមានពលរដ្ឋរស់នៅចំនួន ៤៩៦ គ្រួសារ ក្នុងនោះអ្នកទទួលបានបណ្ណក្រីក្រប្រមាណ ៥០ គ្រួសារ។
អ្នកស្រីបានឱ្យដឹងថា ពលរដ្ឋដែលរស់នៅក្នុងសហគមន៍គឺភាគច្រើនមានជីវភាពខ្វះខាត ប្រឈមនឹងការអត់ឃ្លាន ប៉ុន្តែដោយសារទទួលបានការឧបត្ថម្ភពីរដ្ឋាភិបាល ជាពិសេសក្នុងអំឡុងពេលបិទខ្ទប់ គឺបានជួយសម្រាលបន្ទុកពួកគេបានមួយកម្រិតថែមទៀត។
អ្នកស្រីបញ្ជាក់ថា៖ «ដូច្នេះពលរដ្ឋមិនសូវជួបការលំបាកខ្លាំង ឬខ្វះខាតច្រើនប៉ុន្មានដែរ ដោយសាររាជរដ្ឋាភិបាលបានជួយជ្រោមជ្រែង។ គ្រួសារខ្លះសមាជិកច្រើនបានរហូតដល់ ៣០ ម៉ឺនរៀល បន្ថែមពីនេះអ្នកអត់មានបណ្ណក្រីក្រ ខាងចៅសង្កាត់ គាត់ចុះមកជួយដោះស្រាយជីវភាពខ្វះខាត អត់ឱ្យប្រជាជនដេកស្លាប់ទេ»។ ជាមួយគ្នានេះដែរ អ្នកស្រីសំណូមពរចង់ឱ្យរាជរដ្ឋាភិបាលបន្តផ្តល់នូវការឧបត្ថម្ភសាច់ប្រាក់យ៉ាងហោចណាស់ ១ ឆ្នាំទៀត ដើម្បីឱ្យពលរដ្ឋមានលទ្ធភាពវិលទៅរកភាពប្រក្រតីវិញ។
លោក ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម និងជាប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ចអតីតយុទ្ធជន និងយុវនីតិសម្បទាបានថ្លែងថា រាជរដ្ឋាភិបាលបានយកចិត្តទុកដាក់ខ្ពស់ និងបានឆ្លើយតបទាន់ពេលវេលាតាមរយៈកម្មវិធីឧបត្ថម្ភសាច់ប្រាក់ដល់គ្រួសារក្រីក្រផង និងអ្នកស្លាប់ដោយសារកូវីដផង។
លោកបានថ្លែងថា៖ «រដ្ឋាភិបាលកំពុងតែអនុវត្តកម្មវិធីផ្ទេរសាច់ប្រាក់ដោយទទួលបានជោគជ័យ ដែលរដ្ឋាភិបាលចំណាយរហូតដល់ជាង ៦៨ លានដុល្លារដែលបានអនុវត្តជុំទី ៩ លើកទី ២ ដែលគឺជាការគិតគូររបស់រដ្ឋាភិបាល»។
លោកបញ្ជាក់ថា មកដល់ម៉ោងនេះ បញ្ហាក្រីក្រត្រូវបានដោះស្រាយ ដោយការផ្ទេរសាច់ប្រាក់តាមរយៈការធ្វើបណ្ណក្រីក្រទៅតាមការស្នើសុំ និងកម្មវិធីជួយដល់កុមារ និងស្ត្រីមានផ្ទៃពោះថែមទៀតផង។
លោកថា៖ «បើកាលពីមុន ៣ ឆ្នាំម្តងទើបស្នើសុំបណ្ណក្រីក្របាន ប៉ុន្តែក្នុងអំឡុងកូវីដ ១៩ យើងបានកែសម្រួលវិធីសាស្ត្រក្នុងការស្នើសុំយ៉ាងយូរបំផុត ២ សប្តាហ៍ទៅ ១ ខែ។ មួយវិញទៀត អំឡុងពេលបិទខ្ទប់យើងក៏មានកម្មវិធីជួយគ្រួសារក្រីក្រជួយដល់អ្នកឆ្លងជំងឺកូវីដ ១៩ អ្នកស្លាប់ដោយសារកូវីដ ក៏រដ្ឋាភិបាលជួយដែរ អ៊ីចឹងបញ្ហានេះ គឺរដ្ឋាភិបាលបានជួយគ្រប់គ្រាន់ហើយ»។
លោក ថេង បញ្ញាធន ប្រតិភូរដ្ឋាភិបាលទទួលបន្ទុកអគ្គនាយកផែនការនៃក្រសួងផែនការបានឱ្យដឹងថា មុនពេលមានការរីករាលដាលនៃជំងឺកូវីដ ១៩ ពលរដ្ឋកម្ពុជារស់នៅក្នុងភាពក្រីក្រមានប្រមាណតែ ២,៣ លាននាក់ប៉ុណ្ណោះ ប៉ុន្តែផលប៉ះពាល់នៃជំងឺកូវីដ ១៩ បានធ្វើឱ្យពលរដ្ឋកម្ពុជាធ្លាក់ចូលទៅក្នុងភាពក្រីក្រក្នុងរង្វង់ប្រមាណ ២,៨ លាននាក់។
ចៅសង្កាត់ស្វាយប៉ាកក្នុងខណ្ឌឫស្សីកែវ រាជធានីភ្នំពេញលោកស្រី ជុំ សារ៉ុម បានថ្លែងថា ក្នុងអំឡុងកូវីដ ១៩ រីករាលដាលខ្លាំង មន្ត្រីមូលដ្ឋាននៅសង្កាត់ស្វាយប៉ាកបានចុះទៅសង្កេត និងពិនិត្យវាយតម្លៃជាក់ស្តែងតាមគ្រួសារនីមួយៗ ដើម្បីទទួលបានបណ្ណក្រីក្រឈានទៅទទួលការឧបត្ថម្ភសាច់ប្រាក់ពីរដ្ឋាភិបាល។
លោកស្រីថា៖ «យើងចុះអង្កេតដោយគិតពីធនធានប្រជាពលរដ្ឋ ដើម្បីរាប់បញ្ចូលទៅក្នុងពលរដ្ឋក្រ ១ ក្រ ២ និងក្រ ៣ ប៉ុន្តែភាគច្រើនទទួលបានតែក្រ ១ និងក្រ ២ ទេ ព្រោះក្រ ៣ គឺបានន័យថា គាត់មានជីវភាពសមរម្យហើយ»។
ចំណែកលោក សុំ រតនៈ រស់នៅខេត្តតាកែវក៏បានលើកឡើងដែរថា៖ «ការយកចិត្តទុកដាក់របស់រាជរដ្ឋាភិបាល និងអាជ្ញាធរគឺល្អមែនទែន ព្រោះអំឡុងពេលបិទខ្ទប់យើងមិនបានប្រកបរបររកស៊ីមិនមានលុយ កាក់អីទេ ជួបការខ្វះខាតច្រើន អ៊ីចឹងការផ្តល់ថវិកាពីរដ្ឋាភិបាលគឺអាចជួយយើងដោះស្រាយជីវភាពមួយរយៈ ហើយខ្ញុំអរគុណមែនទែនដល់រដ្ឋាភិបាលកម្ពុជា»។
លោកប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានសាទរចំពោះកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះដែលប្រឈមមុខខ្លាំងនៃការរីករាលដាលនៃជំងឺកូវីដ និងបានបន្តសុពលភាពជាបន្តបន្ទាប់។ លោកថ្លែងថា៖ «ខ្ញុំគិតថា កម្មវិធីឧបត្ថម្ភសាច់ប្រាក់នេះជាចំណាត់ការល្អក្នុងការជួយដល់ពួកគាត់ ដើម្បីឱ្យគាត់បន្តរស់រានមានជីវិត និងមានលទ្ធភាពប្រកបកិច្ចការងារក្នុងការដោះស្រាយជីវភាពខ្លួនឯង»។
ទោះជាយ៉ាងណាលោកសំណូមពរសូមឱ្យការជួយឧបត្ថម្ភសាច់ប្រាក់នេះធ្វើឡើងប្រកបដោយតម្លាភាព គណនេយ្យភាព និងមានសមធម៌ ជាពិសេសកុំឱ្យមានការរើសអើង។
ទន្ទឹមនឹងនេះដែរ ក្រសួងសង្គមកិច្ចបានដាក់ឱ្យដំណើរការប្រព័ន្ធតាមដានត្រួតពិនិត្យ និងវាយតម្លៃកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំតាមប្រព័ន្ធគ្រប់គ្រងព័ត៌មានវិទ្យាដែលចាប់ផ្តើមអនុវត្តជាផ្លូវការពីថ្ងៃទី ៧ មិថុនា ២០២២ តទៅ។
ក្រសួងបានឱ្យដឹងថា ប្រព័ន្ធតាមដានត្រួតពិនិត្យត្រូវបានបង្កើតឡើងក្នុងគោលបំណងលើកកម្ពស់ប្រសិទ្ធភាព និងស័ក្ដិសិទ្ធិភាពក្នុងការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំជាពិសេសជួយសម្រួលមន្ត្រីគ្រប់គ្រងកម្មវិធី និងអនុវត្តកម្មវិធីថ្នាក់ជាតិ និងថ្នាក់ក្រោមជាតិ និងស្ថាប័នពាក់ព័ន្ធនានាក្នុងការប្រមូលទិន្នន័យ បញ្ចូលទិន្នន័យ ពិនិត្យមើលទិន្នន័យ និងបញ្ចេញរបាយការណ៍ទិន្នន័យបានលឿនរហ័សជូនថ្នាក់ដឹកនាំ ដើម្បីជាមូលដ្ឋានសម្រាប់ពិចារណា និងសម្រេចចិត្តកែសម្រួលយុទ្ធសាស្ត្រ និងឆ្លើយតបបញ្ហានានាឱ្យបានទាន់ពេលវេលា៕
