The Phnom Penh Post Search

Search form




Logo of Phnom Penh Post newspaper Phnom Penh Post - ម៉ាឡៃក្លាយ​ពីតំបន់​ដែល​សម្បូរ​គ្រាប់​មីន​ ទៅ​ជាតំបន់​អភិវឌ្ឍន៍​គួរ​ឱ្យ​មោទន​ភាព

ម៉ាឡៃក្លាយ​ពីតំបន់​ដែល​សម្បូរ​គ្រាប់​មីន​ ទៅ​ជាតំបន់​អភិវឌ្ឍន៍​គួរ​ឱ្យ​មោទន​ភាព

Content image - Phnom Penh Post
សាលាស្រុកម៉ាឡៃនាពេលបច្ចុប្បន្ន។ រូបថត រដ្ឋបាលស្រុក

ម៉ាឡៃក្លាយ​ពីតំបន់​ដែល​សម្បូរ​គ្រាប់​មីន​ ទៅ​ជាតំបន់​អភិវឌ្ឍន៍​គួរ​ឱ្យ​មោទន​ភាព

បន្ទាយ​មាន​ជ័យៈ​ ស្រុក​ម៉ាឡៃ គឺ​ជា​ស្រុក​មួយ​ក្នុងចំ​ណោម​ស្រុក​ផ្សេង​ទៀត​របស់​ខេត្ត​បន្ទាយ​មាន​ជ័យ​ ដែល​ពីមុន​សម្បូរ​ដោយ​គ្រាប់​មីន និង​យុទ្ធ​ភណ្ឌ​មិន​ទាន់​ផ្ទុះក្រោយ​ពី​បញ្ចប់​សង្គ្រាម​ស៊ីវិល។ ស្រុក​នេះ​មានឃុំ​ចំនួន​ ៦ ជា​ចំណុះ​ រួមមាន​ ឃុំ​ទួល​ពង្រ ឃុំ​អូរ​សំព័​រ ឃុំ​អូរ​ស្រឡៅ ​ឃុំ​ម៉ាឡៃ​ ឃុំ​បឹង​បេង និង​ឃុំ​តា​គង់​។

ស្រុក​មួយ​នេះ​មាន​ព្រំ​ប្រទល់​រដ្ឋ​បាល​នៅ​ខាង​ជើង​ទល់​នឹង​ព្រំ​ប្រទល់​ស្រុក​អូរ​ជ្រៅ ​នៃ​ខេត្ត​បន្ទាយ​មាន​ជ័យ និង​ព្រំប្រទល់ប្រទេស​ថៃ ​ខាង​ត្បូង​ទល់​នឹង​ព្រំ​ប្រទល់​ស្រុក​សំពៅ​លូន​ នៃ​ខេត្ត​បាត់​ដំបង។ ចំណែក​ខាង​កើត​ទល់​នឹង​ព្រំប្រ​ទល់​ស្រុក​មង្គល​បុរី នៃ​ខេត្ត​បន្ទាយមាន​ជ័យ និង​ខាង​លិច​ទល់​នឹង​ព្រំប្រ​ទល់ជា​មួយ​ប្រទេស​ថៃ​ ផង​ដែរ​។

ស្រុក​ម៉ាឡៃ​ត្រូវបាន​​គេ​ស្គាល់​ថា ជា​អតីត​សមរ​ភូមិ​ជួរមុ​ខដែល​ស្ថិត​នៅ​ហ៊ុម​ព័ទ្ធ​អតីតទី​បញ្ជាកា​រ​មេ​ខ្មែរក្រហម​ ប៉ុល ពត​ ដែលដឹក​នាំ​ប្រយុទ្ធ​កាល​ពី​អំឡុង​ឆ្នាំ​ ១៩៧៩-​១៩៩៨​ និង​សម្បូរ​ទៅ​ដោយ​គ្រាប់​មីន​ និង​គ្រាប់​មិន​ទាន់​ផ្ទះ​យ៉ា​ងច្រើន​ ប៉ុន្តែ​បច្ចុប្បន្ន​ស្រុក​នេះ​បាន​ប្រែ​ក្លាយ​ទៅជា​តំបន់​ដែល​មាន​ការ​ប្រែ​មុខ​មាត់​ថ្មី​ និង​មាន​ការ​អភិវឌ្ឍ​លើ​គ្រប់​វិស័យ​ ជា​ពិសេស​វិស័យ​កសិ​កម្ម​ ។

ការ​ផ្លាស់​ប្តូរ​ទាំង​នេះ ​ក្រោយ​ពី​ក្រុមម​ន្ត្រី​នៃ​មជ្ឈ​មណ្ឌល​សកម្ម​ភាព​កំចាត់​មីន​កម្ពុជា ​(ស៊ីម៉ាក់) បាន​យក​ចិត្ត​ទុកដាក់​និង​បូជា​ជីវិត ដោះ​មីន​និង​យក​គ្រាប់​មិន​ទាន់​ផ្ទុះ​ចេញ​ពី​តំបន់​នេះ ​និង​បាន​ប្រែក្លា​យ​ដី​តំបន់​នេះ​ឱ្យ​មាន​សុវត្ថិ​ភាព​ជូន​ប្រជា​ពលរដ្ឋ​សម្រាប់​ធ្វើ​កសិ​កម្ម និង​ចម្ការ​ សម្រាប់​ធ្វើ​អាជី​វកម្ម​ក្នុង​ការ​បម្រើ​ដល់​ជីវភាព​រស់​នៅ​របស់​ពួក​គេ។​

លោក ​ហេង​ រតនា អគ្គ​នាយក​អង្គភាព​ស៊ីម៉ាក់​បាន​បញ្ជាក់​ថា ទម្រាំ​មាន​ការ​រី​កច​ម្រើន និង​ផ្តល់​ដី​សុវត្ថិ​ភាព​ជូន​ប្រជា​ពលរ​ដ្ឋនៅក្នុង​ស្រុក​មួ​យ​នេះ​ មន្ត្រី​អង្គ​ភាព​ស៊ីម៉ាក់​ជាច្រើន​រូប​បាន​ទទួល​រង​​របួស​និង​បាត់​បង់​ជីវិត ព្រោះ​​តំបន់​នេះ បើ​ធៀប​ទៅ​នឹង​តំបន់​ផ្សេង​ទៀត ​គឺមាន​គ្រាប់​មីន​ច្រើន​ស​ន្ទឹ​កស​ន្ទា​ប់ និង​ក្រាស់​ឃ្មឹក ​ព្រោះ​វា​ជា​តំបន់​ចុង​ក្រោយ​នៃទី​បញ្ជាការ​​មេ​ខ្មែរ​ក្រហម ​ប៉ុល ពត។

លោក​ ហេង ​រតនា បាន​សម្តែង​ក្តី​រីក​រាយ​ ក្រោយ​ពី​បាន​ខិត​ខំ​ប្រឹង​ប្រែង​ក្នុង​ការ​ប្រមូល​យក​មីន ​និង​គ្រាប់​មិន​ទាន់​ផ្ទុះ​ចេញពី​តំបន់​នេះ​ ជា​ពិសេស​បាន​ចូល​រួម​ចំណែក​អភិវឌ្ឍ​ប្រទេស​កម្ពុជា​ឱ្យ​មាន​ការ​រីក​រីក​ចម្រើននិង​ឃើញ​ប្រជា​ពល​រដ្ឋ​មាន​ជីវភាព​ធូ​រធារ ​រស់នៅ​ប្រកប​ដោយ​សេចក្តី​សុខ​និង​មាន​សុវត្ថិ​ភាព​។

លោក​បញ្ជាក់​ថា អតីត​ចម្ការ​មីន​ស្រុក​ម៉ាឡៃ​ បាន​ក្លាយ​ជា​កសិ​ដ្ឋាន​ចម្ការ​ដូង ​ចម្ការ​ស្វាយ ​ចម្ការ​មៀន ​ចម្ការ​តា​ង៉ែ​ន និង​កសិ​កម្ម​ផ្សេង​ទៀត​ជាច្រើន ក្រោយ​ពី​មាន​ការ​យក​ចិត្ត​ទុក​ដាក់​ពីក្រុម​មន្ត្រី​ដោះ​មីន​និង​យុទ្ធ​ភណ្ឌ​មិន​ទាន់​ផ្ទុះ​នៃ​អង្គ​ភាព​ស៊ីម៉ាក់ ​ ។

លោក​ថ្លែង​ថា៖ «ម៉ាឡៃអាច​និយាយ​បាន​ថា ជា​ស្រុក​មួយ​ដែលមាន​ GDP ​ល្អ​ជាង​គេក្នុង​ចំណោម​ស្រុក​នៅក្នុ​ង​ក្រប​ខ័ណ្ឌ​ទូទៅ​ប្រទេសដែល​មាន​ការអ​ភិវឌ្ឍ​និង​រីក​ចម្រើន​ខ្លាំង។ អតីត​អភិបាល​ស្រុក​ដែល​កាល​ពីមុន​ក៏​ជា​អតីត​ជំនួយ​ការ​អាពត ​និង​ថ្នាក់​ដឹក​នាំ​បន្ទាយមាន​ជ័យ​បាន​ខិត​ខំ​ប្រឹង​ប្រែង​កសាង​អភិវឌ្ឍ​ស្រុក​ម៉ាឡៃ​នេះឱ្យ​ក្លាយ​ជា​ស្រុ​ក​មួយ​មាន​ការ​អភិវឌ្ឍ​ជឿន​លឿន​គួរ​ឱ្យកត់ស​ម្គាល់។ជា​ពិសេស​កិច្ច​សហ​ប្រតិ​បត្តិ​ការ​ជា​មួយ​នឹង​ប្រទេស​ថៃ ឃើញ​ថាមាន​ការ​រីក​ចម្រើន​ច្រើន​»។

បើ​តាម​លោក​ ហេង ​រតនា ​ស្រុក​ម៉ាឡៃ​​បច្ចុប្បន្ន​មាន​ការ​ប្រែប្រួ​ល​លឿន​ និង​មាន​ការ​អភិវឌ្ឍ​ទៅលើ​វិស័យ​កសិ​កម្ម ដូ​ចជា ដំណាំ​ដំឡូង ​​ស្វាយ​ និង​ដូង​ជា​ដើម​ ជា​ពិសេស​នោះ ​វិស័យ​អចលន​ទ្រព្យ​​ក៏​ឃើញ​មានការ​រីក​ចម្រើន​លឿន​ផងដែរ​ ព្រោះ​​ប្រជា​ពលរដ្ឋ​សម្រុក​ទៅ​ទិញ​ដី​ក៏​ច្រើន​ ដោយសារ​​វា​ស្ថិត​នៅ​ក្បែរ​តំបន់​អូរ​ជ្រៅ និ​ង​ដី​មាន​សុវត្ថិ​ភាព​។

ក្នុង​នាម​ជា​ថ្នាក់​ដឹក​នាំ​អង្គភាព​ស៊ីម៉ាក់ លោ​ក ហេង រតនា បាន​សម្តែង​នូវ​មោទន​ភាព​ដែល​ប្រទេស​កម្ពុ​ជាមាន​សុខ​សន្តិ​ភាព​ និង​បាន​ខិតខំ​​ដាក់​មុខ​ព្រួញ​រំដោះ​ផ្ទៃដី​ដែល​មាន​បញ្ហា​គ្រាប់​មីន​និង​យុទ្ធ​ភណ្ឌ​មិន​ទាន់​ផ្ទុះ​នៅ​ក្នុង​ស្រុក​ម៉ាឡៃ​នេះ​ឱ្យទៅ​ជា​ស្រុក​មួ​យ​ដែល​មាន​ការ​អភិវឌ្ឍ​​រីក​ចម្រើន​ដែល​​ធានា​សុខ​សុវត្ថិ​ភាព​បាន​ច្រើន។ ​បើទោះ​បី​នៅ​មាន​គ្រោះ​ថ្នាក់​បន្តិច​បន្តួច ​ប៉ុន្តែជា​ស្រុក​មួយ​នៅតែ​បន្ត​មាន​ការ​រីក​ចម្រើន​ពី​ដី​គ្មាន​អ្នក​ណា​ចាប់​អារម្មណ៍​សោះ​ទៅ​ជា​ដី​មាន​តម្លៃ​ខ្ពស់ ហើយបែ​រទៅជា​ទីមាន​ជម្លោះ​ច្រើន​ ដោយ​សារ​តែ​ដី​មាន​តម្លៃ​ផង​ដែរ​។

លោក​ថ្លែង​ថា៖ «យើង​មាន​មោទន​ភាព​ដែល​រាជ​រដ្ឋាភិ​បាល​បាន​ដឹកនាំ​ស្រុក​ម៉ាឡៃឱ្យ​មាន​ការរី​កចម្រើន​ធ្វើឱ្យ​ជីវភាព​ប្រជា​ពលរដ្ឋ​នៅ​តំបន់​នោះ ​ធូរ​ធារ​ច្រើន ខណៈ​ដែល​បច្ចុប្បន្ន​នេះ ប្រជា​ពលរ​ដ្ឋ​រស់​នៅ​ច្រើន​តាម​ដង​ផ្លូវ»​។

លោក ​បេន សំ​អាត ​អធិការ​នគរ​បាល​ស្រុក​ម៉ាឡៃបា​នទទួល​ស្គាល់​ដែរ​ថា ស្រុក​ម៉ាឡៃ ​ប្រែ​ក្លាយ​ពី​តំបន់​ដី​ដែល​មាន​គ្រាប់​មីន និង​គ្រាប់​យុទ្ធ​ភណ្ឌ​មិន​ទាន់​ផ្ទុះ​ជា​ច្រើន​ទៅ​ជា​ដី​ដែល​​មាន​សុវត្ថិ​ភាព ក្រោម​ការ​យក​ចិត្ត​ទុក​ដាក់​ពី​លោក ​ហេង រតនា ​អគ្គនា​យក​អង្គ​ភាព​ស៊ី​ម៉ាក់និង​មន្ត្រី​ដោះ​មីននិង​គ្រាប់​យុទ្ធ​ភណ្ឌ​មិន​ទាន់​ផ្ទុះ ​រំដោះ​ចេញ​យក​មក​កម្ទេច​ចោល ។ បច្ចុប្បន្ន​នេះ ដី​នៅ​ក្នុង​ស្រុក​ម៉ាឡៃ​បាន​ក្លាយ​ទៅជា​ដីចម្ការ​ដោយមា​ន​ផលានុ​ផល​ច្រើន​ប្រភេទ ​ដូចជា​ ចម្ការ​ស្វាយ ច​ម្ការ​ដូងក្រ​អូប និ​ង​ចម្ការ​មៀន​ជាដើ​ម ​ ។

លោក​ថ្លែង​ថា៖ «ឥឡូវ​នេះ ប្រជា​ពលរដ្ឋ​ធ្វើ​ចម្ការ​ដំណាំ​បាន​ច្រើន​ណាស់ ​ជាពិសេស​ធ្វើ​ស្រែ​បាន​ច្រើន​ណាស់​នៅ​ឃុំ​តា​គង់និយាយ​រួម​ស្ទើរ​តែ​គ្រប់​ឃុំ ព្រោះ​តែ​មាន​អំណោយ​ផល​ទាំង​ទឹក​ និង​ហេដ្ឋារ​ចនា​សម្ព័ន្ធ។​ បច្ចុប្បន្ន​នេះ ​ប្រជា​ពលរដ្ឋ​រស់នៅ​ដោយ​គ្មាន​ការ​ភ័យ​ខ្លាច និង​មាន​ជីវភាព​ធូរធារ​សមរម្យ ​ព្រោះ​គាត់​មាន​ដីស្រែ​ចម្ការ​ច្រើន​ និង​លែង​មាន​មីន។ នេះ​ជា​មោទន​ភាព​មួយ​សម្រាប់​ស្រុក​ម៉ាឡៃ​ខ្ញុំ»​។

លោ​ក​បាន​បន្តថា កាល​ពីមុន គឺ​ប្រជា​ពលរដ្ឋ​មាន​ការ​ភ័យខ្លា​ច​ខ្លាំងណា​ស់​ចំពោះ​គ្រាប់​យុទ្ធ​ភណ្ឌ​មិន​ទាន់​ផ្ទុះ​និង​គ្រាប់មី​ន ហើយ​ក៏មាន​ប្រជា​ពលរដ្ឋ​ជា​ច្រើន​បាន​រង​គ្រោះ​ពិការ​ដៃ ពិការ​ជើង និង​ស្លាប់​ក្នុង​ចំនួន​ច្រើន ​ប៉ុន្តែ​បច្ចុប្បន្ននេះ​​មិន​មាន​ករណីនេះ​កើត​ឡើង​ទៀត​​ឡើយ​។ មួយ​វិញ​ទៀត​ នៅ​ពេល​ដែល​ប្រជា​ពលរដ្ឋ​ឃើញ​គ្រាប់​មីន​ ឬ​គ្រាប់​មិន​ទាន់​ផ្ទុះតែង​បាន​រាយ​ការណ៍​ដល់​សមត្ថ​កិច្ចដើ​ម្បី​បន្ត​រាយ​ការណ៍​ទៅ​ស៊ីម៉ាក់​ឱ្យ​មក​ដោះ​គ្រាប់​មិនទា​ន់​ផ្ទុះ ​ឬមីន​យក​ទៅ​រក្សា​ទុក​នៅ​កន្លែង​ដែល​មាន​សុវត្ថិ​ភាព និងប​ន្សាប។​

Content image - Phnom Penh Post
ការប្រមូលផលពោតនៅស្រុកម៉ាឡៃកាលពីពេលកន្លងមក ។ ហេង ជីវ័ន

លោក ​ភា មុនី​និ​ត មេ​ប៉ុស្តិ៍​នគរបាល​ឃុំ​តា​គង់បា​នឱ្យ​ដឹងដែរ​ថា បើ​និយាយ​ជារួ​ម បញ្ហា​មីន និង​គ្រាប់​មិន​ទាន់​ផ្ទុះ គឺ​នៅ​មានតិច​តួច​បំផុត​ដែល​នៅ​​រាយ​ប៉ាយ​តាម​ស្រែ​និង​ចម្ការ​ខ្លះ​របស់​ប្រជា​ពលរ​ដ្ឋដែល​កប់​ជ្រៅ​ក្នុង​ដីដែល​មិន​ស្ថិត​នៅ​ក្នុង​គោល​ដៅ​របស់​អង្គ​ភា​ព​ស៊ីម៉ាក់​រាវរក ប៉ុន្តែ​យូរៗទើប​បាន​អ​ណ្តែ​ត​ឡើង​មក​លើ​ម្តង ហើ​យ​ក៏បាន​ហៅ​អង្គ​ភាព​ស៊ីម៉ាក់​ឱ្យយ​ក​ចេញ​។ ទោះជា​យ៉ាង​ណា​ ជារួមឃើញ​ថា ដី​នៅ​ក្នុង​ស្រុក​ម៉ាឡៃ​នេះមា​ន​សុវត្ថិ​ភាព​ច្រើន​ជាង​ប៉ុន្មាន​ឆ្នាំ​មុន ​ព្រោះលោក​កត់​សម្គាល់​ឃើញ​ថា ​មិន​មាន​ករណី​​គ្រោះ​ថ្នាក់​ណា​មួយ​កើត​ឡើង​ដោយ​សារ​មីន ​ឬគ្រាប់​មិន​ទាន់​នោះ​ទេ ​។

លោក​ថ្លែងថា​៖ «ឥឡូវ​បញ្ហា​ហ្នឹង ​ដូចជា​វា​បាត់​ស្ងាត់ ​អត់​មាន​គ្រោះថ្នា​ក់​ទៀត ប៉ុន្តែនៅ​ពេលដែ​ល​ពលរដ្ឋ​ភ្ជួរដី​វា​ក៏​ងើប​ឡើង​វា​អត់​ផ្ទុះ​ឡើង ​ហើយ​ប្រាប់​ប៉ុស្តិ៍​រដ្ឋ​បាល​យើង​ប្រាប់​ស៊ី​មាក់​ឱ្យ​មក​យក។ ពីមុនឱ្យតែ​ប៉ះ​វាផ្ទុះ ប៉ុន្តែឥ​ឡូវ​ប៉ះ​វា​អត់​អី​ទេ ប្រ​ហែល​វា​នៅក្នុង​ដី​យូ​រពេក»​។

ជា​មួយគ្នា​នេះ លោក​បាន​កោតស​រសើរ​ដល់​ក្រុមម​ន្ត្រី​របស់​​អង្គភាព​ស៊ីម៉ាក់​ដែល​បាន​យក​ចិត្តទុ​កដាក់​​រាវរក​គ្រាប់​មីន និ​ង​គ្រាប់​មិន​ទាន់​ផ្ទុះ​ធ្វើឱ្យ​ដី​មាន​សុវត្ថិ​ភាព​ហើយ​ប្រគល់​ជូន​ដល់​ប្រជា​ពលរដ្ឋ​ក្នុង​ការ​បង្ក​បង្កើន​ផល​កសិកម្ម​និង​ប​ង្កើ​តការ​ងារ​ជូន​ប្រជា​ពលរដ្ឋ ជា​ពិសេស​ហេដ្ឋារ​ចនា​សម្ព័ន្ធ​ក៏ត្រូវ​បានរៀ​បចំ​បាន​យ៉ាង​ល្អ​ស្អាត​ផង​ដែរ​ សម្រាប់​ប្រជាព​លរដ្ឋ​ធ្វើដំ​ណើរ ​និង​ដឹក​ទំនិញ​ផ្សេងៗ​បាន​​រហ័ស​មិន​ដូច​កាល​​ពីមុន​នោះ​ទេ​។

បើតា​មលោក ​ភា មុនី​និ​ត​ ស្ទើ​រតែ​គ្រប់​ទីកន្លែង​នៅ​ក្នុង​ស្រុក​ម៉ាឡៃ​នេះ ​ប្រជា​​ពលរ​ដ្ឋបា​នធ្វើ​ស្រែចម្ការ ​និង​ដំណាំ​ផ្សេង​ទៀត​ដូចជា​​តាង៉ែ​​ន ស្វាយ​ចន្ទី សាវ​ម៉ៅ និ​ងមៀន ក្រោយ​ពី​អង្គភា​ព​ស៊ី​ម៉ាក់ បាន​ជម្នះ​នូវ​រាល់​ឧបសគ្គ​គ្រប់​បែប​យ៉ាង​ត្រួសត្រា​យ​ដីតាម​រយៈ​ការ​យក​គ្រាប់​មីន​និង​យុទ្ធ​ភណ្ឌ​មិន​ទាន់​ផ្ទុះ​ចេញ​ធ្វើ​ឱ្យ​ផ្ទៃ​ដី​មាន​សុវត្ថិ​ភាព​ ។

លោក ​មី សាម៉ន ​កសិករ​រស់​នៅ​ក្នុង​ឃុំ​ម៉ាឡៃ ​បាន​សម្តែង​ការ​សប្បាយ​រីក​រាយ​ដែល​ក្នុង​ប៉ុន្មាន​ឆ្នាំ​កន្លង​មក​នេះ មិន​មាន​ព័ត៌​មាន​ពី​ការ​ផ្ទុះ​នូវ​គ្រាប់​មីន​ដោយ​ការ​ភ្ជួរ​ត្រាក់​ទ័រ​ដែល​ខុស​ពីមុន​ឧស្សាហ៍​មាន​ករណី​ផ្ទុះ​គ្រាប់​មីន​ធ្វើ​ឱ្យ​ប្រជា​ពលរដ្ឋ​រងរ​បួស​និង​ស្លាប់។ បរិយា​កាស​បែប​នេះ បាន​ធ្វើ​ឱ្យ​ប្រជា​ពលរដ្ឋ​មាន​ឱកាស​ដាំ​ដំណាំ​កសិ​កម្ម និង​បង្ក​បង្កើន​ផល​ផ្សេង​ទៀត​ ។

លោក​បន្ត​ថា មុន​ពេល​ដែល​ប្រជា​ពលរដ្ឋ​មក​រស់នៅនិ​ង​ធ្វើ​ស្រែ​ចម្ការនៅ​ក្នុង​ស្រុក​ម៉ាឡៃ​នេះ ក្រុម​ដោះ​មីន​ស៊ីម៉ាក់​បាន​រំដោះ​ផ្ទៃដី​ឱ្យ​មាន​សុវត្ថិ​ភាព​រួច​ហើយ ​ប៉ុន្តែក៏​នៅមាន​កន្លែង​មួយ​ចំនួន​ទៀត​ ដែលប្រជា​ពលរដ្ឋ​បាន​ទៅ​រុករាន​ដី​មុន​ក្រុម​ស៊ីម៉ាក់​ ក៏មាន​ការ​ផ្ទុះគ្រាប់​មីន​ដែរ​ ជា​ពិសេស​នៅ​ឃុំ​ជាប់​ព្រំដែន​កម្ពុជា​-ថៃ ប៉ុន្តែ​យូរ​ៗ​មាន​មួយ​ទេ​ ។

លោក ​ស្វាយ ​ជា អភិបា​លស្រុក​ម៉ាឡៃបាន​ប្រាប់​ ភ្នំពេញ​ ប៉ុស្តិ៍​ថា ស្រុក​ម៉ាឡៃ​ នា​ពេល​បច្ចុប្បន្ន​នេះ ​មាន​ប្រជា​ពលរដ្ឋ​រស់នៅ​ប្រមាណ ៥ ម៉ឺន​នាក់ ​ដោយ​ភាគ​ច្រើន​ប្រកប​មុខ​របរ​កសិកម្ម។ ស្រុក​នេះ នៅ​ក្រោយ​សង្គ្រាម​សម្បូរ​ទៅ​ដោយ​គ្រាប់​មីន និង​គ្រាប់​មិន​ទាន់​ផ្ទុះ ប៉ុន្តែបច្ចុប្បន្ន​នេះ លែង​មាន​ទៀត​ហើយ ក្រោយ​ពី​មន្ត្រី​នៃ​អង្គ​ភាព​ស៊ី​ម៉ាក់​បាន​ប្រមូល​យក​ចេញ​អស់​ពី​ផ្ទៃដី​។

លោក​បន្ត​ថា៖ «ប្រជា​ពលរដ្ឋ​នៅ​ក្នុង​ស្រុក​ខ្ញុំនេះ​ មាន​ជីវភាព​ធូ​រធារ​ច្រើន បើ​ទោះ​បី​ស្ថិត​នៅ​ក្នុ​ងពេល​កូ​វីដ ១៩​ ក៏​ប្រ​ជាពលរដ្ឋ​ មិន​ជួប​បញ្ហា​អ្វី​ដែរ។ នៅ​ពេល​ដែល​ក្រុម​ស៊ីម៉ាក់​ដោះ​មីន​រួច​ហើយ​ ប្រជា​ពលរដ្ឋ​បង្ក​បង្កើន​ផល​បាន​ច្រើន​ឃើញ​ថា រីកច​ម្រើន​ខ្លាំង​ជាង​កាល​ពី​ពេល​មុន»​៕

អត្ថបទគួរចាប់អារម្មណ៍