ព្រះវិហារៈ ក្រុមគ្រូពេទ្យសមាគមប្រឹក្សាសុខភាពប្រជាជន និងក្រុមគ្រូពេទ្យសហរដ្ឋអាមេរិកមកពីសាកលវិទ្យាល័យ Mercer University បានធ្វើដៃជើងសិប្បនិម្មិតជូនជនពិការនៅខេត្តព្រះវិហារចំនួន ៦១០ នាក់ ដោយឥតគិតថ្លៃ ដែលសកម្មភាពនេះបានធ្វើនៅទីស្នាក់ការរដ្ឋសភាមណ្ឌលព្រះវិហារ ពីថ្ងៃទី ១២-២៤ ខែមិថុនា។
លោក ព្រហ្ម ប៉ូលីម អនុប្រធានក្រុមគ្រូពេទ្យសមាគមប្រឹក្សាសុខភាពប្រជាជន បានប្រាប់ ភ្នំពេញ ប៉ុស្តិ៍ ឱ្យដឹងដែរថា មុនការប្រគល់ជូនដៃ ជើងសិប្បនិម្មិតជូនពួកគាត់ គឺក្រុមគ្រូពេទ្យនឹងមានការសាកសួរ និងត្រួតពិនិត្យ ដូចជា ដំបូងត្រូវវាស់ទំហំដៃជើងគាត់ឱ្យត្រូវ ដើម្បីកាត់ឱ្យល្មមនឹងអវយវៈគាត់ ដោយមានការសាកសួរអំពីការប្រើប្រាស់ជើងរបស់គាត់ ហើយប្រវត្តិ នៃរយៈពេលពីការនិងមូលហេតុពិការរបស់គាត់ជាដើម។ ក្រៅពីនេះ ក្រុមគ្រូពេទ្យមួយៗក៏ត្រូវបង្រៀនជនពិការ ដែលទទួលបានឧបករណ៍នេះតាមលក្ខណៈបច្ចេកទេសវេជ្ជសាស្ត្រនៃផ្នែកជើងសិប្បនិម្មិតនេះ ដើម្បីផ្ស៊ាំគាត់ក្នុងការប្រើប្រាស់ និងធ្វើដំណើរឱ្យស្រួល។
លោក ប៉ូលិម ថ្លែងថា ជនពិការគឺភាគច្រើនដោយសារមីន ឯចន្លោះអាយុគឺច្រើនពី ៥០-៦០ ឆ្នាំ ដោយមូលហេតុភាគច្រើន គឺដោយសារសំណល់មីននៅសម័យសង្គ្រាម និងពិការភាពពីកំណើត គ្រោះថ្នាក់ចរាចរណ៍ និងឧបទ្ទវហេតុផ្សេងៗទៀត។
លោក ព្រហ្ម ប៉ូលីម បានឱ្យដឹងថា ក្រុមគ្រូពេទ្យមកពីអាមេរិកមានចំនួន សរុប ៤៦ នាក់ និងខ្មែរ ២០-២៥ នាក់ ដោយសារក្រុមគ្រូពេទ្យខ្មែរបានឆ្លាស់វេនគ្នាទៅខេត្តរៀងខ្លួន ទៅខេត្តព្រះវិហារ ព្រោះអ្នកខ្លះមិនអាចនៅគ្រប់ថ្ងៃ។ ក្រៅពីខេត្ត ព្រះវិហារក៏មានផ្ដល់ជូនបណ្ដារខេត្តជិតៗហ្នឹងដែរ រួមមានកំពង់ធំ សៀមរាប ស្ទឹងត្រែង ក្រចេះ ឧត្តរមានជ័យ។
លោក ផាន់ សុខហេង សមាជិកអចិន្ត្រៃយ៍នៃសមាគមនេះបានឱ្យដឹងដែរថា ខាងមជ្ឈមណ្ឌលស្តារលទ្ធភាពពលកម្ម បានជួយក្រុមគ្រូពេទ្យយ៉ាងច្រើន ទាក់ទងទៅនឹងការជួយនាំអ្នកស្រុកជិតៗនេះ ដោយការយកឡានទៅទទួលពួកគាត់មកកន្លែងត្រួតពិនិត្យ និងផ្ដល់ជូនដៃជើងសិប្បនិម្មិត។
លោក ហោត ឡាង អាយុ ២៤ ឆ្នាំ ដែលមានពិការជើងខាងឆ្វេងរយៈពេល ១៧ ឆ្នាំមកហើយ បានប្រាប់ថា៖ «ខ្ញុំពិតជារីករាយ និងអរគុណដល់សមាគមមែនទែនដែលផ្ដល់ជើងថ្មីឱ្យខ្ញុំ អាចធ្វើដំណើរបានងាយស្រួល និងធ្វើសកម្មភាពបានដោយខ្លួនឯងជាច្រើនទៀត»។
លោកវេជ្ជបណ្ឌិត ព្រហ្ម ប៉ូលីម ថា សម្ភារធ្វើដៃឬជើងសិប្បនិម្មិត ត្រូវបាននាំមកពីសហរដ្ឋអាមេរិកដែលមានគុណភាពល្អ ហើយគម្រោងនេះជារបស់សមាគមប្រឹក្សាសុខភាពប្រជាជន ដែល មានការងារធ្វើការទាក់ទងនឹងសប្បុរសធម៌ ហើយសមាគមមានដៃគូរពីក្រុមគ្រូពេទ្យអាមេរិកពីសាកលវិទ្យាល័យ Mercer University។
លោកបញ្ជាក់ថា គម្រោងនេះមិនមែនជាលើកទី១ ទេ គឺមានតាំងពី ឆ្នាំ ២០១៩។ ប៉ុន្តែ ២០២០-២០២១ ខាងសមាគមមិនអាចឱ្យកម្មវិធីប្រព្រឹត្តទៅបាន ដោយសារកូវីដ។ ឆ្នាំ ២០២២ នេះ ជាលើកទី២ ដោយស្របពេលស្ថានភាពកូវីដល្អប្រសើរ ជារឿងល្អមួយដែលកម្មវិធីអាចប្រព្រឹត្តទៅបានក្នុងរយៈពេលវែង គឺ ១៥ ថ្ងៃ៕