.jpg)
ជនជាប់ចោទជនជាតិចិន ដែលត្រូវបានផ្តន្ទាទោសដាក់ពន្ធនាគារ៣ឆ្នាំ ករណីរលំអគារនៅខេត្តព្រះសីហនុ ពេលដើរចេញពីតុលាការកំពូល នាថ្ងៃទី ១៥ មិថុនា។ រូបថត គឹម សារុំ
ភ្នំពេញៈ តុលាការកំពូលនៅថ្ងៃទី ១៥ មិថុនា បានប្រកាសសាលដីកាតម្កល់ទោសលើបុរសជនជាតិចិនម្នាក់ឱ្យជាប់ពន្ធនាគារ ៣ ឆ្នាំ និងត្រូវសងសំណងទៅភាគីជនរងគ្រោះម្នាក់ៗចន្លោះពី ៥ ពាន់ ទៅ ១ ម៉ឺនដុល្លារអាមេរិក បន្ទាប់ពីជំនុំជម្រះ កាលពីថ្ងៃទី ៨ មិថុនា ករណីរលំបាក់អគារនៅខេត្តព្រះសីហនុ ឆ្នាំ ២០១៩ ដែលសរុបជនរងគ្រោះស្លាប់-របួសចំនួន៤៦ នាក់។
លោកចៅក្រម គង់ តារាឆាត បានអានសាលដីកានៅចំពោះមុខដើមបណ្តឹងរដ្ឋប្បវេណីជាសាច់ញាតិគ្រួសារជនរងគ្រោះក្នុងបន្ទប់សវនាការនៃតុលាការកំពូលនៅថ្ងៃទី ១៥ មិថុនាថា សំណុំរឿងនេះ មានជនជាប់ចោទឈ្មោះ CHENG KUN ភេទប្រុស អាយុ ៤២ ឆ្នាំ ជាជនជាតិចិន និងជាម្ចាស់អគារបាក់រលំ។
លោកចៅក្រមបន្តថា កាលពីថ្ងៃទី ៨ មិថុនា ដែលជាថ្ងៃជំនុំជម្រះ លោកស្រី ទន់ គីមហ៊ួយ ជាមេធាវីការពារសិទ្ធិឱ្យជនជាប់ចោទបានលើកឡើងថា កូនក្តីរបស់ខ្លួនឈ្មោះ CHENG KUN ជាម្ចាស់សំណង់អគារមែន តែគាត់បានធ្វើកិច្ចសន្យាជាមួយ ឈ្មោះ DENG XIN GUL ជនជាតិចិន ជាម្ចាស់ក្រុមហ៊ុនម៉ៅការសំណង់ត្រឹមត្រូវ និងសំណង់មានស្តង់ដាផង។ ហេតុដូច្នេះម្ចាស់ក្រុមហ៊ុនម៉ៅការសំណង់នោះជាអ្នកទទួលខុសត្រូវ។
លោកចៅក្រមលើកឡើងទៀតថា តាមអង្គហេតុ បានបង្ហាញថា កាលពីកំពុងសាងសង់អគារបានកម្ពស់ ៥ ជាន់ គឺជនជាប់ចោទបានចូលទៅត្រួតពិនិត្យ ហើយវិស្វករបាននិយាយប្រាប់ជនជាប់ចោទថា តួជំហរអគារនោះបានឃ្លាតខុសពីតួដើមប្រហែលជា២តឹកហើយ មិនអាចសង់ឡើងថែមទៀតទេ។ តែជនជាប់ចោទនៅតែឱ្យជាងសាងសង់បន្ថែម ២ ជាន់ទៀតរហូតមានបញ្ហា។ បើតាមមន្ត្រីជំនាញនៃមន្ទីរសុរិយោដី និងសំណង់ខេត្តព្រះសីហនុ ក៏បញ្ជាក់ថា សំណង់អគារនេះក៏គ្មានច្បាប់ដែរ។
លោកថ្លែងថា៖«ហេតុដូច្នេះយោងតាមអង្គហេតុ និងសម្អាងហេតុខាងលើ តុលាការកំពូលសម្រេចតម្កល់សាលដីការបស់សាលាឧទ្ធរណ៍ភ្នំពេញចុះថ្ងៃទី ៦ ឧសភា ឆ្នាំ ២០២១ ទុកជាបានការដដែល»។
លោកស្រី មូល សុខខឿន អាយុ ៥៣ ឆ្នាំ រស់នៅភូមិព្រៃទទឹង ឃុំអង្គសុភី ស្រុកកំពង់ត្រាច ខេត្តកំពត ក្នុងចំណោមដើមបណ្តឹងរដ្ឋប្បវេណីប្រមាណ ១០ នាក់ ដែលបានចូលស្តាប់ការប្រកាសសាលដីកានៅថ្ងៃទី ១៥ មិថុនា បានប្រាប់ថា លោកស្រីមានកូនចំនួន ៦ នាក់។ កូនទី២ របស់គាត់ឈ្មោះ មុំ បូរិន្ទ ភេទប្រុស អាយុ ២៧ ឆ្នាំ បានស្លាប់ក្នុងគ្រោះថ្នាក់បាក់រលំអគារនោះ។ ចំពោះការប្រកាសសាលដីការបស់តុលាការកំពូលនេះ លោកស្រីពេញចិត្ត និងព្រមទទួលយកសំណងតាមការបង្គាប់របស់តុលាការ។
លោកស្រីនិយាយថា៖ «ខ្ញុំមិនទាន់ដឹងច្បាស់ថា នៅតុលាការថ្នាក់ក្រោមគេឱ្យជនជាប់ចោទសងមកជនរងគ្រោះម្នាក់ប៉ុន្មានទេ ខ្ញុំចាំសួរមេធាវីខ្ញុំបន្ថែមទៀត»។
កញ្ញា សូ ម៉ី អាយុ ២១ ឆ្នាំ រស់នៅភូមិព្រៃទទឹង ឃុំអង្គសុភី ស្រុកកំពង់ត្រាច ខេត្តកំពត ដែលមានបងប្រុស ឈ្មោះ សូ សំណាង អាយុ ២៦ ឆ្នាំ និងប្អូនប្រុសឈ្មោះ សូ ភ័ត្រា ភេទ ប្រុសអាយុ ១៦ ឆ្នាំ ស្លាប់ក្នុងហេតុការណ៍នោះ បាននិយាយនៅថ្ងៃទី ១៥ មិថុនា នៅក្រៅបន្ទប់សវនាការនៃតុលាការកំពូលថា ការដែលតុលាការកំពូលប្រកាសតម្កល់សាលដីការបស់សាលាឧទ្ធរណ៍ភ្នំពេញពេលនេះ នាងពេញចិត្ត ព្រោះថា តុលាការបានផ្តល់យុត្តិធម៌ដល់ជនរងគ្រោះ។ នាងនិយាយថា៖ «ប៉ុន្តែចាប់តាំងពីថ្ងៃកើតហេតុមកដល់ពេលនេះ ខ្ញុំមិនទាន់បានទទួលសំណងពីជនជាប់ចោទមួយរៀលទេ»។
បើតាមអង្គហេតុ គ្រោះរលំបាក់អគារនេះ បានកើត កាលពីទៀបភ្លឺ ថ្ងៃទី ២២ ខែ មិថុនា ឆ្នាំ ២០១៩ ដែលធ្វើឱ្យកម្មករស្លាប់ ២២ នាក់ និងរបួសធ្ងន់ស្រាល ២៤ នាក់។ បន្ទាប់មក សមត្ថកិច្ចបានស្រាវជ្រាវចាប់ខ្លួនអ្នកពាក់ព័ន្ធ ជាជនជាតិចិន ៤ នាក់ ហើយត្រូវបានសាលាដំបូងខេត្តព្រះសីហនុបើកសវនាការជំនុំជម្រះ និងប្រកាសសាលក្រមនៅថ្ងៃទី ៣០ កក្កដា ឆ្នាំ ២០២០ ផ្តន្ទាទោសជនជាប់ចោទទាំង ៤ នាក់ ដាក់ពន្ធនាគារ ម្នាក់ៗ ៣ ឆ្នាំ។ ប៉ុន្តែ CHENG KUN ត្រូវបានចោទពីបទមនុស្សឃាតដោយចេតនា បទបង្កឱ្យមានរបួសស្នាមដោយអចេតនា និងបទធ្វើឱ្យខូចខាតមានស្ថានទម្ងន់ទោស ដោយសារការបង្ករបួសស្នាមដល់អ្នកដទៃ តាមមាត្រា២០៧ មាត្រា ២៣៦ មាត្រា ២៩ នៃក្រមព្រហ្មទណ្ឌ។
ប៉ុន្តែការសម្រេចនេះត្រូវបានជនជាប់ចោទទាំង ៤ នាក់មិនសុខចិត្ត ក៏ដាក់បណ្តឹងឧទ្ធរណ៍ភ្នំពេញ ហើយត្រូវបានសាលាឧទ្ធរណ៍បើកសវនាការជំនុំជម្រះនិងប្រកាសសាលដីកា នាថ្ងៃទី ៦ ឧសភា ឆ្នាំ ២០២១ ដោយសម្រេចតម្កល់សាលក្រមរបស់សាលាដំបូងខេត្តព្រះសីហនុ ទុកជាបានការ។
ចំណែកឈ្មោះ ដេង ហ្ស៊ីន ហ្គុល (DENG XIN GUL) ឈ្មោះ ហ្គៅ យូ (GAO YU) និងឈ្មោះហ្ស៊ី យ៉ាពីង (XIE YA PING) ត្រូវបានចោទពីបទសមគំនិតក្នុងអំពើមនុស្សឃាតដោយអចេតនា បង្កឱ្យមានរបួសស្នាមដោយអចេតនា និងបទធ្វើឱ្យខូចខាតមានស្ថានទម្ងន់ទោស ដោយសារការបង្ករបួសស្នាមដល់អ្នកដទៃ ប៉ុន្តែពួកគេទាំង ៣ នាក់ មិនបានប្តឹសារទុក្ខមកតុលាការកំពូលទេ៕
