ភ្នំពេញៈ លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃថ្លែងថា មន្ដ្រីនគរបាលត្រូវតែមានសមត្ថភាព វិជ្ជាជីវៈមានសីលធម៌ល្អហើយត្រូវប្រកាន់ខ្ជាប់ពេលបំពេញបេសកកម្ម ដើម្បីប្រែក្លាយខ្លួនជាមន្ត្រីនគរបាលរបស់ប្រជាពលរដ្ឋ ពលរដ្ឋគាត់ស្រលាញ់ ជឿទុកចិត្ត និងផ្ដល់កិច្ចសហការជាមួយ។
លោក ស ខេង បានថ្លែងបែបនេះពេលអញ្ជើញជាអធិបតី ពិធីបិទវគ្គបណ្ដុះបណ្ដាលបឋមវិជ្ជាជីវៈនគរបាលជំនាន់ទី១៥ លើកទី១ នៅសាលានគរបាលជាតិភូមិភាគ ៦ ខេត្តកំពង់ឆ្នាំង កាលពីនាថ្ងៃទី ១៥ ខែមិថុនានេះ។
លោកបានថ្លែងថា៖ «នគរបាលយើងត្រូវតែមានសមត្ថភាព វិជ្ជាជីវៈ មានសីលធម៌ល្អ ដូចដែលក្មួយៗ ប្អូនៗបានសិក្សានេះ គឺនោះហើយជាចំណេះវិជ្ជា ចំណេះដឹងដែលយើងត្រូវប្រកាន់ខ្ជាប់ពេលយើងបំពេញបេសកកម្ម ដើម្បីប្រែក្លាយខ្លួនយើងជាមន្ត្រីនគរបាលរបស់ប្រជាពលរដ្ឋ ពលរដ្ឋមិនខ្លាចញញើតយើង ពលរដ្ឋគាត់ស្រឡាញ់ ជឿទុកចិត្ត និងផ្ដល់កិច្ចសហការជាមួយយើង»។
លោកបញ្ជាក់ថា៖ «ទោះបីយើងមានកម្លាំងប៉ុន្មានក៏ដោយ ក៏មិនអាចរក្សាសន្តិសុខសណ្ដាប់ធ្នាប់បានល្អដែរ បើគ្មានការគាំទ្រ និងការចូលរួមពីប្រជាពលរដ្ឋ។ នេះជាគោលការណ៍ និងជាទ្រឹស្ដីត្រូវចងចាំ»។
លោក ស ខេង បានកោតសរសើរបណ្ឌិត្យសភានគរបាលកម្ពុជាដែលបានខិតខំប្រឹងប្រែងចាត់ចែងការងារបណ្ដុះបណ្ដាលធនធានមនុស្សផ្នែកនគរបាលជាតិទទួលបានលទ្ធផលជាបន្តបន្ទាប់។ លោកបានថ្លែងអំណរគុណ និងកោតសរសើរចំពោះសាស្ត្រាចារ្យ និងគ្រូនគរបាលជាតិទាំងអស់ ដែលបានខិតខំពង្រឹងការបណ្ដុះបណ្ដាលសិស្សនគរបាលឱ្យមានចំណេះដឹង និងសមត្ថភាពក្នុងវិជ្ជាជីវៈ។
លោក ស ខេង បានណែនាំឱ្យបណ្ឌិត្យសភានគរបាលកម្ពុជា ខិតខំបន្តសិក្សាស្រាវជ្រាវដើម្បីផ្ដួចផ្ដើមគំនិតច្នៃប្រឌិតថ្មីៗបន្ថែមទៀតក្នុងការដឹកនាំគ្រប់គ្រង និងអនុវត្តកំណែទម្រង់នគរបាលជាតិតាមផែនការ ជាពិសេសខិតខំតាមដានស្រាវជ្រាវចំពោះបទល្មើសថ្មីៗ ដែលបានកើតឡើងក្នុងប្រទេស តំបន់ និងសាកលោក ដើម្បីឱ្យបានដឹង និងដកពិសោធធ្វើជាមេរៀនបង្រៀនដល់សិក្ខាកាម និងសិស្សនគរបាល ទាំងទ្រឹស្ដី និងការអនុវត្ត។
លោក ឯក មនោសែន អនុប្រធានបណ្ឌិត្យសភានគរបាលកម្ពុជា និងជាប្រធាននាយកដ្ឋានបណ្ដុះបណ្ដាល បង្ហាញរបាយការណ៍ក្នុងពិធីនេះថា ចាប់តាំងពីពេលបង្កើតរហូតមកដល់បច្ចុប្បន្ននេះ សាលានគរបាលភូមិភាគ ៦ បានបណ្ដុះបណ្ដាលសិស្សនគរបាលចំនួន ៦១១២ នាក់ នារី ៤៦៣ នាក់ និងជាមធ្យមបណ្ដុះបណ្ដាលបាន ៥០០ នាក់ ក្នុង ១ ឆ្នាំ។
លោកបានឱ្យដឹងថា៖ «ក្នុងឆ្នាំ ២០២២ នេះ សាលានគរបាលជាតិភូមិភាគ ៦ បានបណ្ដុះបណ្ដាលសិស្សនគរបាលជំនាន់ទី១៥ លើកទី១ ចំនួន ១៨០ នាក់ នារី ២១ នាក់ ជាសិស្សនគរបាលមកពីស្នងការដ្ឋាននគរបាលរាជធានីភ្នំពេញ ដែលប្រឡងជាប់ក្នុងក្របខណ្ឌឆ្នាំ ២០២០ និងឋិតក្នុងចំណោមសិស្សនគបាលសរុប ១ ១០៨ នាក់ ដែលបានបណ្ដុះបណ្ដាលនៅសាលានគរបាលភូមិភាគទាំង ៦»។
នៅក្នុងពិធីនេះតំណាងសិស្សនគរបាលបានឡើងធ្វើសច្ចាប្រណិធាន និងធ្វើសម្បថចំពោះ ជាតិ សាសនា ព្រះមហាក្សត្រ ទេវតារក្សាស្វេត្រឆ័ត្រ និងចំពោះរាជរដ្ឋាភិបាលកម្ពុជាថា នឹងសុខចិត្តលះបង់គ្រប់បែបយ៉ាងដើម្បីជាតិ សាសនា ព្រះមហាក្សត្រ ស្មោះត្រង់ជានិច្ចចំពោះ ជាតិ មាតុភូមិ និងរាជរដ្ឋាភិបាល គោរពឱ្យបានដាច់ខាតនូវច្បាប់របស់រដ្ឋ និងវិន័យរបស់កងកម្លាំងនគរបាលជាតិជាដើម៕