លោក ឯម ច័ន្ទមករា នៅក្នុងកម្មវិធីបណ្ដុះបណ្ដាលទាក់ទងនឹងយេនឌ័រនិងពិការភាព កាលពីថ្ងៃ ១៤ មិថុនា ។ រូបថត Social Affairs page
ភ្នំពេញៈ មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានអះអាងថា អំពើហិង្សាលើស្ត្រី ឬកុមារីមានពិការភាព ត្រូវបានកាត់បន្ថយច្រើននៅកម្ពុជា ដោយសារមានការចូលរួមផ្សព្វផ្សាយពីអ្នកសារព័ត៌មានលើបញ្ហានេះ ហើយពលរដ្ឋមានការយល់ដឹងច្រើនពីសិទ្ធិរបស់ជនមានពិការភាព ខណៈអង្គការក្រៅរដ្ឋាភិបាលដែលធ្វើការងារលើវិស័យពិការភាពបានគាំទ្រចំពោះការលើកឡើងនេះ។
លោក ឯម ច័ន្ទមករា រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការថ្លែងប្រាប់អ្នកយកព័ត៌មាន ក្រោយប្រកាសបើកវគ្គបណ្តុលបណ្តាលតាមរយៈកម្មវិធី ACCESS ក្រោមប្រធានបទ «ជំនាញចរចាអំពីចំណេះដឹងមូលដ្ឋានទាក់ទងនឹងយេនឌ័រ និងពិការភាព» នៅសណ្ឋាគាកាំបូឌីយ៉ាណានៅថ្ងៃទី ១៤ ខែមិថុនាថា ការប្រើប្រាស់អំពើហិង្សាលើស្ត្រី ឬកុមារី ដែលមានពិការភាពនៅកម្ពុជាត្រូវបានកាត់បន្ថយច្រើន ដោយសារមានការចូលរួមផ្សព្វផ្សាយពីវិស័យព័ត៌មានលើបញ្ហានេះ ហើយពលរដ្ឋមានការយល់ដឹងច្រើន។
លោកថា រាជរដ្ឋាភិបាលកម្ពុជាបានយកចិត្តទុកដាក់ជាច្រើនលើសិទ្ធិរបស់ជនមានពិការភាពដោយបានដាក់ចេញផែនការយុទ្ធសាស្ត្រជាតិស្តីពីពិការភាព ២០១៩-២០២៣ ដែលផែនការនេះមានយុទ្ធសាស្ត្រមួយ គឺផ្តោតទាំងស្រុងទៅលើបញ្ហាយេនឌ័រ និងបញ្ឈប់ការប្រើប្រាស់អំពើរហិង្សាលើស្ត្រីដែលមានពិការភាព។
លោកថា ប្រព័ន្ធសារព័ត៌មានដើរតួសំខាន់ណាស់ក្នុងការបញ្ច្រាបការយល់ដឹងទៅដល់សាធារណជនអំពីការឈប់ការប្រើប្រាស់អំពើហិង្សានេះ។ ជាមួយគ្នានោះ ការអប់រំផ្លូវចិត្តតាមព្រះធម៌ ក៏បានចូលរួមចំណែកសំខាន់ផងដែរ។
លោកបញ្ជាក់ថា៖ «ដោយសារតែបងប្អូនសារព័ត៌មានបានបញ្ជ្រាបការយល់ដឹងច្រើននៅលើទំព័រហ្វេសប៊ុកនៅលើសារព័ត៌មាន នៅលើកាសែត ទូរទស្សន៍ ហើយក្រសួង ស្ថាប័នពាក់ព័ន្ធក៏បានបើកវគ្គបណ្តុះបណ្តាលទៅដល់គ្រប់ភាគីពាក់ព័ន្ធដើម្បីឱ្យគាត់យល់ដឹង»។
លោកបានបញ្ជាក់បន្ថែមថា ជនដែលមានពិការភាពត្រូវបានការពារបន្ថែមដោយច្បាប់ជនពិការដែលមានន័យថា នៅពេលដែលជនមានពិការភាពត្រូវបានរំលោភបំពាននោះ ជនដែលប្រព្រឹត្តត្រូវទទួលទោសតាមច្បាប់នានា ហើយត្រូវបន្ថែមស្ថានទម្ងន់ទោសបន្ថែមទៀតដោយផ្អែកលើច្បាប់ជនពិការ។
លោកថ្លែងថា៖ «ឧទាហរណ៍មានការរំលោភទៅលើស្ត្រីគថ្លង អ៊ីចឹងយន្តការក្រុមប្រឹក្សាសកម្មភាពជនពិការយើងបានចុះទៅដល់ទីតាំងតែម្តងក្នុងការកាត់បន្ថយ បើយើងធៀបជាមួយនឹងពេលមុន គឺពិតហើយថា អំពើហិង្សាអាចកើតឡើងទៅលើច្បាប់នេះច្បាប់នោះ ប៉ុន្តែពាក់ព័ន្ធអ្នកមានពិការភាពមានស្ថានទម្ងន់ទោសបន្ថែមទៀតលើអ្នកធ្វើខុស»។
លោកអគ្គលេខាធិការក្រុមប្រឹក្សាសកម្មភាពជនពិការបានឲ្យដឹងទៀតថា កន្លងមកក្រុមប្រឹក្សាសកម្មភាពជនពិការបានសហការជាមួយក្រសួង ស្ថាប័នពាក់ព័ន្ធ ដោះស្រាយបញ្ហាដែលកើតឡើងចំពោះមុខបានច្រើនដូចជា ការរំលោភទៅលើស្ត្រីគថ្លង់ ឬរំលោភទៅលើសតិអារម្មណ៍ពាក់ព័ន្ធនឹងការកេងប្រវញ្ចកម្លាំងពលកម្មរបស់អ្នកមានពិការភាពជាដើម។
លោក ឈន សុវណ្ណដេត ប្រធានអង្គការជនពិការ ខេត្តក្រចេះ ថ្លែងនៅថ្ងៃទី ១៥ ខែមិថុនាថា ដោយផ្អែកលើស្ថានភាពជាក់ស្តែង នៅក្នុងសហគមន៍តាមរយៈការធ្វើការងារផ្ទាល់ជាមួយជនមានពិការភាព និងការខិតខំប្រឹងប្រែងរបស់ក្រសួងសង្គមកិច្ចរួមជាមួយអង្គការក្រៅរដ្ឋាភិបាលដែលធ្វើការលើចលនាពិការភាពនេះ កត់សម្គាល់ឃើញថា អំពើហិង្សាលើស្ត្រី ឬកុមារពិការ ពិតជាមានការថយចុះប្រាកដមែន។
លោកថា ក្រៅពីការផ្សព្វផ្សាយនិងការយកចិត្តទុកដាក់ជ្រោមជ្រែងពីអាជ្ញាធរ និងអង្គការក្រៅរដ្ឋាភិបាល អំពើហិង្សានេះ ក៏ថយចុះដោយសារ កត្តាសេដ្ឋកិច្ច និងហិរញ្ញវត្ថុផងដែរ។
លោកថ្លែងថា៖ «ជាក់ស្តែងក្នុងអំឡុងពេលកូវីដយើងឃើញថា បងប្អូនជនពិការដែលក្រីក្រគាត់ទទួលបានប្រាក់ឧបត្ថម្ភពីរដ្ឋាភិបាលដើម្បីជ្រោមជ្រែងការរស់នៅរបស់ពួកគាត់។ អ៊ីចឹងជាធម្មតាសេដ្ឋកិច្ច ឬការរស់នៅរបស់ពួកគាត់មានការផ្លាស់ប្តូរ ល្អប្រសើរ នាំឲ្យការរើសអើង ឬមួយអំពើហិង្សាផ្សេងៗហ្នឹង វាកាត់បន្ថយតាមហ្នឹងដែរ»៕
.jpg)
