បបែលយក្សដែលជាប់សន្ទូចក្នុងទន្លេមេគង្គ នៅស្រុកសៀមបូក កាលពីថ្ងៃទី ១៣ មិថុនា។ រូបថត ហ្វេសប៊ុក
ស្ទឹងត្រែងៈមន្ត្រីជំនាញខណ្ឌរដ្ឋបាលជលផលខេត្តស្ទឹងត្រែង និងក្រុមការងារគម្រោងអច្ឆរិយមេគង្គ និងអភិវឌ្ឍន៍ជលផលទឹកសាប (IFREDI) នៃទន្លេមេគង្គកម្ពុជាបានវាស់ថ្លឹង និងកិបស្លាកលេខ ព្រមទាំងយកសំណាកធ្វើ DNA ហើយបានលែងបបែលយក្ស ១ ក្បាលទៀត ចូលក្នុងទន្លេមេគង្គវិញ កាលពីថ្ងៃទី ១៤ ខែមិថុនា ក្រោយពីជាប់សន្ទូចពីថ្ងៃទី១៣ ខែមិថុនា។
លោក ស្រី សំវិចិត្រ នាយខណ្ឌរដ្ឋបាលជលផលស្តីទីខេត្តស្ទឹងត្រែងបានឲ្យដឹងនៅថ្ងៃទី ១៥ ខែមិថុនាថា នេះជាលើកទី៣ហើយដែលក្រុមការងារបានលែងត្រីបបែលប្រភេទមេពូជទៅក្នុងទន្លេមេគង្គលើវិញ។បបែលដែលជាប់សន្ទូចលើកនេះមានទម្ងន់ ៣០០ គីឡូក្រាមនិងទំហំចាប់ពីក្បាលដល់ចុងកន្ទុយប្រវែង ៣៩៨ សង់ទីម៉ែត្ រនិងទទឹងដងខ្លួនប្រវែង ២២០ សង់ទីម៉ែត្រ។វាបានជាប់សន្ទូចអ្នកនេសាទ នៅភូមិ ឃុំកោះព្រះ ស្រុកសៀមបូក កាលពីថ្ងៃទី ១៣ ខែមិថុនា វេលាម៉ោង ៤ រសៀល។
លោកបានបន្តថា ត្រីបបែលយក្សនេះ មិនមែនជាបបែលយក្សដែលទើបលែងចូលក្នុងទន្លេវិញកាលពីថ្ងៃទី ២៣ ខែឧសភានោះទេ ព្រោះទំហំ ទម្ងន់ និងប្រវែងផ្សេងគ្នា។ លោកថា កន្លែងដែលត្រីបបែលយក្សជាប់សន្ទូចនោះ ជាតំបន់អភិរក្សសត្វផ្សោតដែលអ្នកនេសាទអាចប្រើសន្ទូចផ្លែ ១ បាន លើកលែងតែសន្ទូចរនងនិងមងប៉ុណ្ណោះ ប៉ុន្តែដាក់សន្ទូចផ្លែ ១ ក៏នៅតែមានជាប់ត្រីបបែលយក្សមកទៀត។យ៉ាងណាក៏ដោយ ការជាប់សន្ទូចនៃត្រីបបែលយក្សនេះមានរបួសតិចតួចនិងមិនប៉ះពាល់ខ្លាំងដល់ការរស់នៅរបស់វាឡើយ។
លោកបញ្ជាក់ថា មន្ត្រីខណ្ឌជលផលនិងក្រុមការងារគម្រោងអច្ឆរិយនៃទន្លេមេគង្គលើកម្ពុជាបានលែងត្រីបបែលញី៣លើក ចូលទៅក្នុងទន្លេវិញ ក្នងនោះមានលើកទី១ នៅថ្ងៃទី ៥ ឧសភា បបែលយក្សមានទម្ងន់ ២៨០ គីឡូក្រាមលើកទី២ នៅថ្ងៃទី ២៣ ឧសភា បបែលយក្សមានទម្ងន់ ១៤៣ គីឡូក្រាម និងលើកទី៣ នៅថ្ងៃទី ១៤ មិថុនា មានទម្ងន់រហូតដល់ទី ៣០០ គីឡូក្រាម នៅភូមិសាស្ត្រឃុំកោះព្រះ ក្នុងស្រុកសៀមបូក ខេត្តស្ទឹងត្រែង។
លោក ស្រី សំវិចិត្រ ប្រាប់ទៀតថា ប្រភេទសត្វត្រីបបែលយក្សនេះមិនមានចែងនៅក្នុងប្រភេទធនធានជលផលដែលកំពុងរងគ្រោះនោះទេ ប៉ុន្តែវាជាពពួកមេពូជធំៗ បើនេសាទយកទៅអាចនាំឲ្យប៉ះពាល់ដល់ការបន្តពូជរបស់ធនធានជលផល ហេតុនេះត្រូវមានការហាមឃាត់មិនឲ្យធ្វើនេសាទយកសត្វប្រភេទនេះឡើយ។
លោកថ្លែងថា៖ «ពពួកមេពូជធំៗ វាផ្តល់កូនមកក៏បានច្រើន ហើយជាពពួកដែលកម្រនៅលើពិភពលោកដែលមិនមានត្រីប្រភេទបបែលយក្សទឹកសាបហ្នឹងទេ ប្រទេសភាគតិចណាស់ដែលមានសត្វបបែលទឹកសាបប្រភេទនេះ» ។
លោក សុខ វិជ្ជា អ្នកស្រាវជ្រាវជីវចម្រុះនៅកម្ពុជា ថ្លែងនៅថ្ងៃទី ១៥ ខែមិថុនាថា បបែលទាំងអស់នៅក្នុងប្រទេសកម្ពុជា រាប់ទាំងនៅក្នុងទឹកសាប និងទឹកប្រៃមាន ១៥ ប្រភេទ ប៉ុន្តែចំពោះប្រភេទបបែលយក្សទឹកសាបនេះជាប្រភេទមួយកំពុងរងគ្រោះទៅរកការជិតផុតពូជ ព្រោះសត្វបបែលប្រភេទនេះមិនសម្បូរទេ នៅតាមទន្លេមេគង្គ។
លោកថា បបែលនេះជាប់ជាប្រភេទបបែលដែលធំជាងគេបង្អស់នៅលើពិភពលោកដែលអាចនិយាយបានថា ជាពូជត្រីពិសេសមួយនៅក្នុងប្រទេសកម្ពុជា បន្ទាប់ពីពពួកត្រីរាជ និងត្រីគល់រាំង។ត្រីបបែលយក្សទឹកសាបមានកំណត់ត្រាថា មានទម្ងន់រហូតដល់ ៧០០ គីឡូក្រាម មានទទឹងប្រមាណ ២ ម៉ែត្រ បណ្តោយប្រមាណ ៤ ម៉ែត្រ។
លោកថ្លែងថា៖ «ត្រីបបែលយក្សហ្នឹងមានតែនៅខាងប្រទេសឡាវ ថៃ ហើយនិងខ្មែរមានតែ ៣ ប្រទេសហ្នឹងទេ។ វានៅតែតាមបណ្តោយខ្សែទឹកទន្លេមេគង្គហ្នឹងទេ»។
អ្នកស្រាវជ្រាវជីវចម្រុះនៅកម្ពុជារូបនេះប្រាប់ថា ករណីដែលត្រីបបែលយក្សជាប់សន្ទូចអាចបណ្តាលឲ្យវាពិបាកក្នុងការស៊ីចំណី ចន្លោះពីកន្លះខែទៅ ១ ខែ ដែលជាហេតុអាចនាំឲ្យវាងាប់ដោយខ្លួនឯង។មួយវិញទៀតបើមានការរាយសន្ទូចច្រើនពេកធ្វើឲ្យសត្វប្រភេទនេះមានការប្រឈម ព្រោះកាលណារបួសច្រើនដងវានឹងផ្លាស់ប្តូរទីកន្លែងរស់នៅ៕
វីដេអូ៖
.jpg)
