ភ្នំពេញៈ តុលាការកំពូលនៅថ្ងៃទី ១៥ មិថុនា បានបើកសវនាការជំនុំជម្រះអតីតសមាជិកក្រុមប្រឹក្សាសង្កាត់កោះរ៉ុងម្នាក់ ក្នុងចំណោម ៥ នាក់ ពាក់ព័ន្ធករណីចុះហត្ថលេខារឿងដីធ្លីទំហំប្រមាណ ៥២៥ ហិកតា ប្រគល់ឱ្យពលរដ្ឋនៅភូមិព្រៃស្វាយ សង្កាត់ កោះរ៉ុង ក្រុង-ខេត្ត ព្រះសីហនុ ប្រព្រឹត្តកាលពីឆ្នាំ ២០១៦ ដល់ឆ្នាំ ២០១៩។
នៅក្នុងបន្ទប់សវនាការនៃតុលាការកំពូលជនជាប់ចោទឈ្មោះ ហែម សាឡេះ ភេទ ប្រុស អាយុ ៥៨ ឆ្នាំ បាននិយាយប្រាប់ចៅក្រមទាំង៥រូបដែលមានលោក គង់ ស្រ៊ីម ជាប្រធានក្រុមប្រឹក្សាជំនុំជម្រះ នៃការតុលាការកំពូលនៅថ្ងៃទី ១៥ មិថុនាថា នៅអំឡុងឆ្នាំ ២០០១ ដល់ឆ្នាំ ២០១៨ គាត់បានធ្វើជាមេក្រុមភូមិព្រៃស្វាយ សង្កាត់កោះរ៉ុង ក្រុង-ខេត្តព្រះសីហនុ។ នៅពេលនោះប្រជាពលរដ្ឋមានជម្លោះដីធ្លីជាមួយលោកឧកញ៉ា សុខ ប៊ុន ហើយប្រជាពលរដ្ឋបានមកពឹងពាក់ឱ្យគាត់ជួយធ្វើជាសាក្សីដឹងឮហើយគាត់បានចុះហត្ថលេខាលើលិខិតរបស់ប្រជាពលរដ្ឋដោយអះអាងថា ពួកគាត់ពិតជាបានរស់នៅ និងអាស្រ័យផលលើដីដែលមានទំហំប្រមាណ ៥២៥ ហិកតា នោះពិតប្រាកដមែន។
នៅក្នុងសវនាការ ជនជាប់ចោទបានថ្លែងបន្តថា បន្ទាប់មកនៅអំឡុងឆ្នាំ ២០១៨ គាត់បានដាក់ពាក្យសុំលាឈប់ពីតួនាទីជាប្រធានភូមិព្រៃស្វាយ ហើយក្នុងឆ្នាំ ២០១៩ គាត់បានជាប់ជាមន្ត្រីកិច្ចសន្យាជាសមាជិកក្រុមប្រឹក្សាសង្កាត់កោះរ៉ុង។ ប៉ុន្តែនៅក្នុងតួនាទីជាសមាជិកក្រុមប្រឹក្សាសង្កាត់កោះរ៉ុងគាត់មាននាទីជាអ្នករៀបចំវេទិការពេលមានកម្មវិធីប្រជុំម្តងៗ និងសម្អាតបរិវេណក្នុងសង្កាត់កោះរ៉ុងតែប៉ុណ្ណោះ។ ចំពោះមូលហេតុនៃការចុះហត្ថលេខាលើលិខិតស្នាមឱ្យប្រជាពលរដ្ឋកាលពីគាត់នៅជាមេក្រុមភូមិព្រៃស្វាយ គឺគាត់គ្រាន់តែធ្វើជាសាក្សីដឹងឮថា ប្រជាពលរដ្ឋទាំងនោះពិតជាបានអាស្រ័យផលលើដីទាំងនោះតែប៉ុណុ្ណ។ ក្រោយមកគាត់ និងឈ្មោះ សេង ហួលាង ជាចៅសង្កាត់កោះរ៉ុងត្រូវបានអង្គភាពប្រឆាំងអំពើពុករលួយចាប់ខ្លួននៅក្នុងអំឡុងឆ្នាំ ២០១៩។
ជនជាប់ចោទ ហែម សាឡេះ ថ្លែងទៅកាន់តុលាការថា៖ «មូលហេតុខ្ញុំចុះហត្ថលេខាព្រោះខ្ញុំយល់ថា ធ្វើយ៉ាងណាឱ្យគេជឿថា ពលរដ្ឋទាំងនោះកាន់កាប់លើដីនោះ។ ពេលខ្លះខ្ញុំចុះហត្ថលេខាក្នុងនាមជាមេក្រុម និងពេលខ្លះក្នុងនាមជាសាក្សី»។
យោងតាមអង្គហេតុ ជនជាប់ចោទត្រូវបានសាលាដំបូងរាជធានីភ្នំពេញបើកសវនាការ និងប្រកាសសាលក្រម នៅថ្ងៃទី ២៩ ខែ មករា ឆ្នាំ ២០២០ ផ្តន្ទាទោសដាក់ពន្ធនាគារ ៧ ឆ្នាំ និងពិន័យជាប្រាក់ ១០ លានរៀលចូលថវិការដ្ឋ។ ឈ្មោះ សេង ហួលាង ដាក់ពន្ធនាគារ ៧ ឆ្នាំ និងពិន័យប្រាក់ ១០ លានរៀល ចូលថវិការដ្ឋ។ទាំង ២ នាក់ ត្រូវចោទបទបំផ្លាញដោយចេតនា និងគៃបំបាត់ដោយទុច្ចរិត បទក្លែងឯកសារសាធារណៈ បទប្រើប្រាស់ឯកសារក្លែង និងបទរំលោភអំណាចតាមមាត្រា ៦០១ មាត្រា ៦២៩ មាត្រា ៦៣០ នៃក្រមព្រហ្មទណ្ឌ និងមាត្រា ៣៥ នៃច្បាប់ស្តីពីការប្រឆាំងអំពើពុករលួយ។ ដោយមិនសុខចិត្តនឹងសាលក្រមរបស់សាលាដំបូងរាជធានីភ្នំពេញជនជាប់ចោទទាំង ២ នាក់ បានប្តឹងមកសាលាឧទ្ធរណ៍ភ្នំពេញហើយត្រូវបានសាលាឧទ្ធរណ៍ភ្នំពេញបើកសវនាការនិងប្រកាសសាលដីកានៅថ្ងៃទី ៣ ខែ មិថុនា ឆ្នាំ ២០២១ សម្រេចតម្កល់សាលក្រមរបស់សាលាដំបូងរាជធានីភ្នំពេញនៅដដែល។
បើតាមអង្គហេតុដដែល បន្ទាប់ពីសាលាឧទ្ធរណ៍ភ្នំពេញប្រកាសសាលដីកាមកក៏ត្រូវបានអគ្គព្រះរាជអាជ្ញានៃសាលាឧទ្ធរណ៍ភ្នំពេញប្តឹងសារទុក្ខមកតុលាការកំពូលទៀតដោយមិនសុខចិត្តនឹងទណ្ឌកមុ្មទោសរបស់ជនជាប់ចោទទាំង ២ នាក់ ដែលចៅក្រមសាលាឧទ្ធរណ៍ភ្នំពេញសម្រេចឱ្យជាប់ពន្ធនាគារ ៧ ឆ្នាំ។ រីឯជនជាប់ចោទទាំង ២ នាក់ ក៏មិនសុខចិត្តនឹងប្តឹងសារទុក្ខមកតុលាការកំពូលដែរ។
ជនជាប់ចោទថ្លែងថា៖ «ខ្ញុំប្តឹងសារទុក្ខមកតុលាការកំពូលព្រោះខ្ញុំមានបំណងស្នើសុំតុលាការឱ្យបន្ថយទោសដល់ខ្ញុំខ្លះដោយសារទោស ៧ ឆ្នាំនេះ ច្រើនពេកសម្រាប់ខ្ញុំ។ ខ្ញុំទទួលស្គាល់ថា ខ្ញុំបានចុះហត្ថលេខាពិតមែន»។
លោក ជុំ សំបាន តំណាងមហាអយ្យការបានសន្និដ្ឋានថា តាមលោកពិនិត្យមើលសំណុំរឿង ឃើញថា សាលាឧទ្ធរណ៍ភ្នំពេញសម្រេចរក្សាទោសជនជាប់ចោទ គឺមានសំអាងហេតុត្រឹមត្រូវតាមច្បាប់ព្រោះជនជាប់ចោទធ្លាប់បានឆ្លើយសារភាព៖ «ហេតុដូច្នេះខ្ញុំស្នើសុំតម្កល់សាលដីការបស់សាលាឧទ្ធរណ៍ភ្នំពេញទុកជាបានការដដែល»។
លោក ប៊ន់ ប្រុញ ជាមេធាវីមួយរូបក្នុងចំណោមមេធាវី៣រូបបានធ្វើសេចក្តីសន្និដ្ឋាននៅក្នុងអង្គសវនាការនៅថ្ងៃទី ១៥ មិថុនាថា កូនក្តីរបស់លោកកាលពីប្រព្រឹត្តនោះ គឺគាត់ចុះហត្ថលេខាក្នុងថានៈជាប្រជាពលរដ្ឋមិនមែនក្នុងនាមជាមន្ត្រីទេ ដូច្នេះគាត់មិនបានក្លែងលិខិតសាធារណៈដែរ។
លោកថា៖ «ឯកសាររឿងដីធ្លីនោះគឺប្រជាពលរដ្ឋយកទៅតតាំងជាមួយលោកឧកញ៉ា សុខ ប៊ុន ដូច្នេះកូនក្តីខ្ញុំមិនមែនជាកម្មវត្ថុនៃបទល្មើសដែរ។ ខ្ញុំសូមតុលាការពិនិត្យតាមច្បាប់»។
ក្រោយជំនុំជម្រះប្រមាណជា ១ ម៉ោងមកលោក ចៅក្រម គង់ ស្រ៊ីម ប្រធានក្រុមប្រឹក្សាជំនុំជម្រះថ្លែងថា សាលដីកានេះប្រកាសនៅថ្ងៃទី ២៩ មិថុនា ខាងមុខ៕