ក្រោមការដឹកនាំដ៏ប៉ិនប្រសប់របស់ប្រមុខរាជរដ្ឋាភិបាលកម្ពុជាលោកនាយករដ្ឋមន្ត្រី ហ៊ុន សែន ក្នុងការគ្រប់គ្រងក៏ដូចជាកិច្ចខិតខំចាក់វ៉ាក់សាំងបង្ការជំងឺកូវីដ ១៩ ដល់ពលរដ្ឋតាមរយៈ «យុទ្ធសាស្ត្រផ្ការីក» បានធ្វើឱ្យកម្ពុជាសម្រេចបានជោគជ័យ និងបើកដំណើរការប្រទេសឡើងវិញកាលពីថ្ងៃទី ១ ខែវិច្ឆិកាឆ្នាំមុន។
ជាមួយនឹងលទ្ធផលជោគជ័យលើការចាក់វ៉ាក់សាំងកូវីដ ១៩ នេះ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក ១៩) បានរៀបរៀងឡើងនូវសៀវភៅ ១ ក្បាលក្រោមចំណងជើងថា «ធ្វើដំណើរជាង ២៥ ០០០ គីឡូម៉ែត្រ» «បេសកកម្មមិនអាចទៅរួច បានក្លាយជាបេសកកម្មសម្រេចបានដោយជោគជ័យក្នុងនាមសម្តេចតេជោនាយករដ្ឋមន្ត្រី» ជាភាសាខ្មែរ មានកម្រាស់ជាង ១៨០ ទំព័រ និងជាភាសាអង់គ្លេសកម្រាស់ជាង ១៦០ ទំព័រ។
ដើម្បីឱ្យដឹងថាសៀវភៅ ១ ក្បាលនេះបានចងក្រងទុកនូវបទពិសោធ និងតស៊ូបែបណានោះកាលពីពេលថ្មីៗនេះភ្នំពេញប៉ុស្ដិ៍បានជួបសម្ភាសលោកស្រី ឱ វណ្ណឌីន ដែលមានសេចក្ដីទាំងស្រុងដូចខាងក្រោម៖
តើមូលហេតុចម្បងអ្វីខ្លះដែលជំរុញលោកស្រីឱ្យសរសេរសៀវភៅ «ដំណើរជាង ២៥ ០០០ គីឡូម៉ែត្រ» នេះឡើង?
នៅពេលខ្ញុំចាប់ផ្តើមសរសេរបទពិសោធនេះឡើង ខ្ញុំនឹកឃើញថាខ្ញុំមានអារម្មណ៍ស្ញប់ស្ញែងពន់ពេក និងបង្កប់ដោយក្តីស្រឡាញ់ចំពោះលោកតា លោកយាយរាប់រយនាក់ដែលមានអាយុវែងនៅកម្ពុជាដែលខ្ញុំបានជួបពួកគាត់ដោយផ្ទាល់។
ខ្ញុំមានសេចក្តីរីករាយជាពន់ពេកនៅពេលដែលបានជួបគូស្វាមី-ភរិយា ១ គូនៅខែសីហា ឆ្នាំ ២០២១ គឺលោកតាម្នាក់ដែលមានអាយុ ១០១ ឆ្នាំ និងភរិយារបស់គាត់មានអាយុ ១០៣ ឆ្នាំដែលរស់នៅខេត្តត្បូងឃ្មុំ។ គូស្វាមី-ភរិយា ១ គូនេះគឺជាគំរូដ៏ល្អសម្រាប់យុវវ័យជំនាន់ក្រោយហើយខ្ញុំពិតជាមានក្តីរីករាយ និងមានមោទនភាពយ៉ាងក្រៃលែងដែលពួកគាត់បានស្ម័គ្រចិត្តចាក់វ៉ាក់សាំងការពារជំងឺកូវីដ ១៩។
តើសៀវភៅនេះបានបង្ហាញពីគោលបំណងសំខាន់ៗអ្វីខ្លះ?
គោលបំណងសំខាន់របស់ខ្ញុំក្នុងការសរសេររៀបរៀងសៀវភៅនេះក្នុងនាមសម្តេចតេជោនាយករដ្ឋមន្ត្រីគឺដើម្បីបង្ហាញពីកាយវិការទឹកចិត្តសប្បុរសធម៌ដ៏មហិមា និងការគិតគូរពីសុខទុក្ខ សុខភាព និងសុខុមាលភាពប្រជាជនកម្ពុជាទូទៅ ព្រមទាំងការគោរពស្រឡាញ់យ៉ាងជ្រាលជ្រៅចំពោះគំរូល្អរបស់លោកយាយ លោកតា ដែលមានវ័យ ១០០ ឆ្នាំឡើង និងប្រជាជនកម្ពុជាទូទៅដែលបានស្ម័គ្រចិត្តចាក់វ៉ាក់សាំងកូវីដ ១៩ តាម «យុទ្ធសាស្ត្រផ្ការីក» របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា។
ម្យ៉ាងវិញទៀត សៀវភៅនេះក៏ចង់បង្ហាញពីបេសកកម្មជាប្រវត្តិសាស្ត្រដែលមិនធ្លាប់មាននៅកម្ពុជាក្រោមគំនិតផ្តួចផ្តើមចង្អុលបង្ហាញ និងប្រគល់ភារកិច្ចដ៏វិសេសវិសាលនេះពីសម្តេចតេជោនាយករដ្ឋមន្ត្រីក្នុងបេសកកម្មមនុស្សធម៌ដ៏ថ្លៃថ្លា ដែលបេសកកម្មនេះក៏បានបង្ហាញថាកម្ពុជាក៏មានលោកយាយ-លោកតាដែលមានអាយុវែងលើសពី ១០០ ឆ្នាំច្រើនផងដែរ។
ក្រៅពីនេះការចងក្រងសៀវភៅមានគោលបំណងដ៏ធំមួយទៀតគឺរក្សាទុកជាឯកសារសម្រាប់ការសិក្សាស្រាវជ្រាវនៃអ្នកជំនាន់ក្រោយ ដើម្បីស្វែងយល់ពីកិច្ចការសង្គមដ៏សំខាន់មួយនេះ។
តើសៀវភៅនេះបានបោះពុម្ពប៉ុន្មានក្បាល ហើយនឹងចែកជូនស្ថាប័នណាខ្លះ?
ខ្ញុំសូមប្រណមហត្ថាទាំងទ្វេគោរពថ្លែងអំណរគុណយ៉ាងជ្រាលជ្រៅជាទីបំផុតជាមួយនឹងការដឹងគុណនូវទឹកចិត្តមេត្ដាករុណាទិគុណដ៏ល្អប្រពៃបំផុតរបស់សម្ដេចតេជោ នាយករដ្ឋមន្ត្រីដែលបានអនុញ្ញាតដ៏ខ្ពង់ខ្ពស់ និងផ្ដល់ទាំងថវិកាសម្រាប់ការបោះពុម្ពសៀវភៅនេះជាលើកដំបូងចំនួន ៣ ០០០ ក្បាល សម្រាប់ចែកផ្សព្វផ្សាយដោយមិនមានការលក់ដូរ (Free of charge) ជូនដល់ក្រសួង ស្ថាប័ន សាកលវិទ្យាល័យ និងបណ្ណាល័យនានា រដ្ឋបាលថ្នាក់ក្រោមជាតិ មន្ទីរសុខាភិបាលរាជធានី-ខេត្ត អង្គការជាតិ និងអន្តរជាតិ ស្ថានទូតនានា ស្ថាប័នសារព័ត៌មានមួយចំនួន និងបុគ្គលពាក់ព័ន្ធផងដែរ។
តើលោកស្រី និងក្រុមការងារបានឆ្លងកាត់បទពិសោធបែបណាខ្លះពេលអនុវត្ដបេសកកម្មចាក់វ៉ាក់សាំងកូវីដ ១៩ រហូតទទួលបានជោគជ័យ?
រូបខ្ញុំ និងក្រុមការងារពិតជាសប្បាយចិត្តណាស់នៅពេលយើងបានសម្រេចជោគជ័យលើកិច្ចការចាក់វ៉ាក់សាំងកូវីដ ១៩ នេះ ដែលបានផ្ដល់ជាជម្រើសយុទ្ធសាស្ត្រដ៏ល្អមួយ ដើម្បីជួយការពារសរីរាង្គកាយប្រជាពលរដ្ឋកម្ពុជា និងជនបរទេសនៅកម្ពុជាដោយស្របច្បាប់ពីការវាយលុកនៃជំងឺកូវីដ ១៩។
ខ្ញុំត្រូវបានទទួលនូវការជួយជំរុញលើកទឹកចិត្តដោយសម្តេចតេជោនាយករដ្ឋមន្ត្រី ឱ្យធ្វើសកម្មភាពលឿនរហ័ស និងម៉ឺងម៉ាត់។ យើងមិនអាចទន់ជ្រាយជាមួយមេរោគនេះ យើងត្រូវដោះស្រាយនូវព័ត៌មានមិនពិតនានាដែលហៅថា "infodemic” ដែលកើតមានឡើងនៅក្នុងស្រុក និងពីក្រៅប្រទេសកម្ពុជា។
ការងារនេះទាមទារឱ្យខ្ញុំលះបង់ពេលវេលាច្រើនណាស់ (សឹងតែចំណាយពេល ២៤ ម៉ោងលើ ២៤ ម៉ោង) ជាច្រើនថ្ងៃ ច្រើនខែ រហូតដល់ជិត ២ ឆ្នាំ ដែលរឿងនេះបានធ្វើឱ្យខ្ញុំមានកង្វល់ជាខ្លាំង និងមិនហ៊ានប្រហែសឡើយ។
តើកត្ដាអ្វីខ្លះដែលជំរុញឱ្យលោកស្រី និងក្រុមការងារអនុវត្ដ «យុទ្ធសាស្ត្រផ្ការីក» ចាក់វ៉ាក់សាំងដល់ពលរដ្ឋឈានទៅសម្រេចលទ្ធផលមុនពេលកំណត់?
«យុទ្ធសាស្ត្រផ្ការីក» គឺជាយុទ្ធសាស្ត្រសម្រាប់ដំណើរការចាក់វ៉ាក់សាំងកូវីដ ១៩ នៅកម្ពុជា ដែលត្រូវបានផ្តួចផ្តើមឡើងដោយសម្ដេចអគ្គមហាសេនាបតីតេជោ ហ៊ុន សែន បន្ទាប់ពីសម្តេចបានបង្កើតគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក ១៩) នៅខែមីនា ឆ្នាំ ២០២១ ដឹកនាំដោយរូបខ្ញុំផ្ទាល់។
ដើម្បីជាការលើកទឹកចិត្តដល់អ្នកស្ម័គ្រចិត្តចាក់វ៉ាក់សាំងលេខរៀងទីលាននាក់ និងបង្ហាញពីទំហំនៃការយកចិត្តទុកដាក់ និងការឧបត្ថម្ភដល់មនុស្សវ័យចាស់របស់សម្ដេចតេជោនាយករដ្ឋមន្ត្រី អំណោយសប្បុរសធម៌ជាទឹកប្រាក់ ១០ លានរៀល និង ៣ លានរៀលរួមជាមួយគ្រឿងឧបភោគ បរិភោគមួយចំនួនធំទៀតត្រូវបានប្រគល់ជូនដោយផ្ទាល់ដៃដល់គេហដ្ឋានបុគ្គលដែលជាផ្នែកនៃ «រង្វាន់ចាក់វ៉ាក់សាំងកូវីដ ១៩ លេខរៀងទីលាននាក់» និង «រង្វាន់នៃក្តីស្រឡាញ់លោកយាយ-លោកតាដែលមានវ័យ ១០០ ឆ្នាំឡើង»។
បេសកកម្មដ៏សំខាន់របស់ខ្ញុំគឺដើម្បីកំណត់អត្តសញ្ញាណអ្នកត្រូវទទួលរង្វាន់ និងផ្ដល់ការស្វាគមន៍គារវកិច្ចសាកសួរសុខទុក្ខព្រមទាំងប្រគល់ដោយផ្ទាល់ដៃនូវអំណោយសប្បុរសធម៌របស់សម្ដេចតេជោនាយករដ្ឋមន្ត្រី។
បន្ទាប់ពីបានធ្វើដំណើរក្នុងចម្ងាយផ្លូវសរុបទៅជាង ២៥ ០០០ គីឡូម៉ែត្រនៅទូទាំង ២៥ រាជធានី-ខេត្ត ជួនកាលត្រូវស្ថិតនៅក្រោមលក្ខខណ្ឌនៃការទ្រាំអត់ងងុយ ការប្ដេជ្ញាចិត្តខ្ពស់ ភាពអត់ធ្មត់ ត្រូវចេញដំណើរពីព្រលឹមស្រាងៗ ហើយត្រឡប់មកផ្ទះវិញទាំងយប់អធ្រាត្រសឹងតែគ្រប់ពេល ទីបំផុតបេសកកម្មនេះក៏សម្រេចបានជោគជ័យដ៏អស្ចារ្យនឹកស្មានមិនដល់។
លើសពីនេះខ្ញុំបានសរសេរអត្ថបទស្តីពីការចាក់វ៉ាក់សាំងកូវីដ-១៩ នៅកម្ពុជាដែលត្រូវបានបោះពុម្ពផ្សាយនៅក្នុងការចេញផ្សាយរបស់អាស៊ាន «សីហា/កញ្ញា នៅក្នុង Insider View (ASEAN)»។ នេះគឺជារឿងជោគជ័យមួយនៅកម្ពុជា នៅពេលដែលអត្ថបទនេះចេញផ្សាយពីការគ្របដណ្ដប់លើការចាក់វ៉ាក់សាំងកូវីដ ១៩ បានឈានដល់ជាង ១០០% នៃពលរដ្ឋគោលដៅ ១០ លាននាក់ និងជាង ៨៨ % នៃចំនួនប្រជាជននៅកម្ពុជាសរុប ១៦ លាននាក់។
តើមកទល់ពេលនេះ មានលោកយាយលោកតាអាយុ ១០០ ឆ្នាំឡើងបានចាក់វ៉ាក់សាំងកូវីដ ១៩ ប៉ុន្មាននាក់?
គិតត្រឹមថ្ងៃទី ២ ខែតុលា ឆ្នាំ ២០២១ ខ្ញុំបានជួបប្រជាពលរដ្ឋខ្មែរដែលជាលោកយាយ-លោកតាសរុបចំនួន ១៤៩ នាក់ (ក្នុងចំនួននេះ មានលោកយាយចំនួន ១០០ នាក់) និងមានដូនជីម្នាក់ទៀតដែលមានអាយុ ៧៦ ឆ្នាំ រស់នៅសុំសីលនៅវត្តសំបួរមាសរាជធានីភ្នំពេញ (ដែលអាយុពិតប្រាកដរបស់គាត់ខុសពីបណ្ណសម្គាល់ខ្លួនគាត់ ដោយសារចុះបញ្ជីច្រឡំនាសម័យអ៊ុនតាក់។
លោកយាយស័ក្តិសមនឹងទទួលបាននូវអំណោយសប្បុរសធម៌ ព្រមទាំងការអរគុណដោយសារភាពស្មោះត្រង់របស់លោកយាយលើបញ្ហាអាយុនេះ និងការស្ម័គ្រចិត្តចាក់វ៉ាក់សាំងកូវីដ ១៩ របស់លោកយាយផងដែរ។ បេសកកម្មនេះបានបញ្ចប់ដោយជោគជ័យ បន្ទាប់ពីក្រុមការងារបានផ្ដល់ជូនដល់អ្នកស្ម័គ្រចិត្តចាក់វ៉ាក់សាំងលេខរៀងទី ១០ លាននាក់នៅថ្ងៃទី ២ ខែវិច្ឆិកា ឆ្នាំមុន។
តើលោកស្រីមានការអំពាវនាវបែបណាខ្លះដល់ពលរដ្ឋឱ្យទៅចាក់វ៉ាក់សាំងដូសជំរុញ ឬដូសទី ៥?
ក្នុងនាមប្រធាន គ.វ.ក-១៩ ខ្ញុំសូមអំពាវនាវដល់បងប្អូនពលរដ្ឋទាំងអស់នៅកម្ពុជា សូមអញ្ជើញមកទទួលយកនូវការចាក់វ៉ាក់សាំងកូវីដ ១៩ ដូសជំរុញទាំងដូសទី ៣ ដូសទី ៤ និងដូសទី ៥ ជាពិសេសក្រុមគោលដៅជួរមុខ និងក្រុមគោលដៅសំខាន់ៗ និងប្រជាពលរដ្ឋវ័យចាស់ចាប់ពីអាយុ ៦០ ឆ្នាំឡើងទៅ។
ដូច្នេះសូមបងប្អូនប្រជាពលរដ្ឋយកចិត្ដទុកដាក់ខ្ពស់ កុំមើលស្រាល ភ្លេចខ្លួន ដែលបច្ចុប្បន្ននេះថ្វីដ្បិតតែយើងមិនមានករណីឈឺ និងស្លាប់ដោយសារជំងឺកូវីដ ១៩ ជាង ១ ខែហើយក៏ពិតមែន ក៏ប៉ុន្ដែស្ថានភាពរាតត្បាតនៃកូវីដ ១៩ មិនទាន់បិទបញ្ចប់នៅឡើយទេ៕