ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំពិព័រណ៍ការងារប្រចាំឆមាសនេះ រយៈពេល ២ ថ្ងៃ នៅរាជធានីភ្នំពេញ ដោយក្នុងនោះក្រុមហ៊ុនធំៗ បានផ្តល់ឱកាសការងារជាង ៣ ពាន់កន្លែងផងដែរ។
ពិព័រណ៍ការងារនេះ នឹងរៀបចំឡើងរយៈពេល ២ ថ្ងៃជាប់គ្នា នៅថ្ងៃទី ២៣-២៤ ខែ មិថុនា ឆ្នាំ ២០២២ ក្នុងបរិវេណអគារ KAMPUS ដែលមានអាសយដ្ឋាន ៥០២ មហាវិថីព្រះមុនីវង្ស ជិតស្ពានអាកាសក្បាលថ្នល់ ដោយនាំមកនូវឱកាសការងារប្រមាណ ៣ ២០០ កន្លែង ពីក្រុមហ៊ុនធំៗជាច្រើន ដើម្បីផ្តល់ជូនយុវជន សិស្ស/និស្សិត និងអ្នកស្វែងរកការងារធ្វើ។ ពិព័រណ៍ការងារនេះ ត្រូវបានរៀបចំឡើងដោយទីភ្នាក់ងារជាតិមុខរបរ និងការងារ ដោយសហការជាមួយសហភាពសហព័ន្ធយុវជនកម្ពុជា។
NEA បានគូសបញ្ជាក់ថា ពិព័រណ៍ការងារប្រចាំឆមាស ជាព្រឹត្តិការណ៍ដ៏មានសារៈសំខាន់ក្នុងការជ្រើសរើសបុគ្គលិក និងស្វែងរកការងារ តាមរយៈការប្រមូលផ្តុំ និងផ្សព្វផ្សាយឱកាសការងារពីសំណាក់និយោជក ក្រុមហ៊ុនឯកជន ដើម្បីជួបផ្ទាល់ជាមួយយុវជន សិស្ស/និស្សិត និងអ្នកស្វែងរកការងារ ដើម្បីដាក់ពាក្យស្នើសុំការងារ ជួបសម្ភាសផ្ទាល់ ព្រមទាំងទទួលបានការប្រឹក្សាយោបល់អាជីព និងការងារក្នុងការត្រៀមចូលទីផ្សារការងារ។
NEA រំឭកផងដែរ ចំពោះអ្នកស្វែងរកឱកាសការងារ មុនទៅចូលរួមពិព័រណ៍ការងារនេះ ត្រូវរៀបចំប្រវត្តិរូបឱ្យបានច្រើន ដើម្បីត្រៀមដាក់ពាក្យស្នើសុំការងារពីក្រុមហ៊ុនធំៗជាច្រើន និងជួបសួរព័ត៌មានពីក្រុមហ៊ុនដែលកំពុងត្រូវការជ្រើសរើសបុគ្គលិកដោយផ្ទាល់នៅទីនោះ។
ដើម្បីទទួលព័ត៌មានបន្ថែម សូមទាក់ទងមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ National Employment Agency (អិនអ៊ីអេ ខ្មែរ)៕