.jpg)
វិទ្យាស្ថានតេជោសែនសាធារណការ និងដឹកជញ្ជូន ចុះអនុស្សរណៈយោគយល់ជាមួយសាកលវិទ្យាល័យឆាងអាន (Chang''an University) នៃប្រទេសចិន ដើម្បីពង្រឹងគុណភាពនៃការអប់រំឱ្យសមស្របទៅនឹងតម្រូវការទីផ្សារ និងផ្តល់ជំនួយបច្ចេកទេសដល់សិស្សានុសិស្សក្នុងការពង្រីកឱកាសការងារ ជំនាញ ចំណេះដឹងឱ្យកាន់តែទូលំទូលាយ។
ពិធីចុះហត្ថលេខានេះ ត្រូវបានធ្វើឡើង កាលពីថ្ងៃទី ១៥ ខែ មិថុនា ឆ្នាំ ២០២២ ក្រោមអធិបតីភាពរដ្ឋលេខាធិការក្រសួងសាធារណការ និងដឹកជញ្ជូន លោកស្រី ឥម នីថារ៉ា និងមន្ត្រីជំនាញពាក់ព័ន្ធរបស់វិទ្យាស្ថាន តំណាងសាកលវិទ្យាល័យ ឆាងអានតំណាងក្រុមហ៊ុនសាជីវកម្មស្ពានថ្នល់ចិន (CRBC) ប្រចាំកម្ពុជា និងមន្ត្រីជំនាញពាក់ព័ន្ធ។
នាយកវិទ្យាស្ថានតេជោសែន សាធារណការ និងដឹកជញ្ជូន និងជាតំណាងភាគីហត្ថលេខី លោក ហឿន សំនៀង បានជម្រាបជូនអំពីដំណើរការរបស់វិទ្យាស្ថាន ដែលត្រូវបានបង្កើតឡើងប្រកបដោយចក្ខុវិស័យវែងឆ្ងាយ ក្នុងការបណ្តុះបណ្តាលកូនខ្មែរឱ្យមានជំនាញច្បាស់លាស់ ចំណេះដឹងទូលំទូលាយ និងមានសីលធម៌ អត្តចរិត ចរិយាសម្បត្តិត្រឹមត្រូវ ដើម្បីដោះស្រាយវិបត្តិកង្វះអ្នកជំនាញបច្ចេកទេសនាពេលបច្ចុប្បន្ន និងបង្កើតឱ្យមានអ្នកបន្តវេនរបស់កម្ពុជាដ៏មានសក្តានុពល និងស្មារតីទទួលខុសត្រូវលើវិស័យសាធារណការ និងដឹកជញ្ជូននាពេលអនាគត។
លោកបន្តថា វិទ្យាស្ថានមានការប្តេជ្ញាតាំងចិត្តខ្ពស់ក្នុងការបណ្តុះបណ្តាលទៅលើគុណតម្លៃសំខាន់ចំនួន ៣ រួមមានជំនាញ ចំណេះដឹង និងសីលធម៌ ក្នុងឋានៈជាអ្នកបន្តវេនដ៏មានសក្តានុពលប្រកបដោយស្មារតីទទួលខុសត្រូវខ្ពស់ចំពោះវាសនាអនាគតរបស់កម្ពុជាលើវិស័យហេដ្ឋារចនាសម្ព័ន្ធផ្លូវថ្នល់ និងដឹកជញ្ជូន។
លោក Fan Wen សាកលវិទ្យាធិការរងនៃសាកលវិទ្យាល័យឆាងអាន បានចូលរួមមតិចាប់អារម្មណ៍ក្នុងអង្គពិធី និងបានលើកឡើងអំពីប្រវត្តិខ្លះៗរបស់សាកលវិទ្យាល័យឆាងអាន ជាសាកលវិទ្យាល័យដ៏ល្បីមួយនៅប្រទេសចិន ជាពិសេសផ្នែកវិស្វកម្មសំណង់ សាងសង់ផ្លូវ និងការគ្រប់គ្រងគមនាគមន៍សាធារណៈ។
លោកបន្តថា លើសពីនេះ សាកលវិទ្យាល័យឆាងអាន ជាសាកលវិទ្យាល័យដ៏សំខាន់មួយរបស់សាធារណរដ្ឋប្រជាមានិតចិន ស្ថិតក្រោមការដឹកនាំផ្ទាល់របស់ក្រសួងអប់រំ។
លោកបានបញ្ជាក់បន្ថែមថា សាកលវិទ្យាល័យឆាងអាន បានបណ្តុះបណ្តាលអ្នកជំនាញឆ្នើមជាច្រើន ទាំងក្នុង និងក្រៅប្រទេស ជាពិសេសលើផ្នែកដឹកជញ្ជូនលើផ្លូវហាយវេ។ លោកជឿជាក់យ៉ាងមុតមាំថា ដោយមានការគាំទ្រពីប្រទេសភាគី និងក្រុមហ៊ុន CRBC ការបង្កើតនូវកម្មវិធីសិក្សារួមគ្នារវាងវិទ្យាស្ថានទាំង ២ នឹងប្រព្រឹត្តទៅដោយរលូន និងដើរតួយ៉ាងសំខាន់ក្នុងការសម្របសម្រួលរវាងភាគីនីមួយៗ ដើម្បីជួយដល់ការអភិវឌ្ឍវិទ្យាស្ថានតែជោសែន សាធារណការ និងដឹកជញ្ជូន សាកលវិទ្យាល័យឆាងអាន និងក្រុមហ៊ុន CRBC ថែមទាំងអាចជួយដល់ការរឹតចំណងមិត្តភាពរវាងប្រទេសចិន និងកម្ពុជាផងដែរ។
ជាមួយគ្នានេះដែរ លោក Zhou Yong ប្រធានគ្រប់គ្រងទូទៅប្រចាំប្រទេសកម្ពុជា នៃក្រុមហ៊ុន CRBC បានលើកឡើងថា ក្រុមហ៊ុន CRBC មានគោលបំណងលើកស្ទួយកិច្ចសហប្រតិបត្តិការរវាងប្រទេសចិន និងប្រទេសកម្ពុជា លើកិច្ចការងារកសាងហេដ្ឋារចនាសម្ព័ន្ធ និងចូលរួមយ៉ាងស្វិតស្វាញក្នុងការអភិវឌ្ឍហេដ្ឋារចនាសម្ព័ន្ធ វិស័យអប់រំ និងវិស័យសាធារណការ និងដឹកជញ្ជូននៅក្នុងប្រទេសកម្ពុជា ឱ្យកាន់តែមានភាពរីកចម្រើន៕
