ភ្នំពេញៈ មន្ត្រីជាន់ខ្ពស់សុខាភិបាលបានលើកឡើងថា តាមរយៈសិក្ខាសាលាតម្រង់ទិសស្ដីពីការចូលរួមរបស់សហគមន៍ ដើម្បីពង្រឹងការតាមដានជំងឺកូវីដ ១៩ និងជំងឺផ្លូវដង្ហើមផ្សេងៗ ដែលបានធ្វើឡើងនៅតាមបណ្តាខេត្តមួយចំនួននឹងផ្លាស់ប្តូរឥរិយាបថនៅសហគមន៍មូលដ្ឋាន ក្នុងការបង្កើនការថែទាំសុខភាពបឋម និងឆ្លើយតបទាន់ពេលវេលាចំពោះជំងឺផ្សេងៗ។
រដ្ឋលេខាធិការក្រសួងសុខាភិបាល និងជាប្រធានក្រុមការងារអភិវឌ្ឍ និងគ្រប់គ្រងក្របខ័ណ្ឌអនុវត្តការជំរុញបង្កើនការងារថែទាំសុខភាពបឋម លោកស្រី ឱ វណ្ឌឌីន បានចុះបេសកកម្មដើម្បីពិគ្រោះយោបល់ស្ដីពីតម្រូវការ ការថែទាំសុខភាពបឋមរបស់សហគមន៍នៅខេត្តកំពង់ធំ និងខេត្តព្រះវិហារចាប់ពីថ្ងៃទី ១៤ ដល់ថ្ងៃទី ១៨ ខែមិថុនា ឆ្នាំ ២០២២ ដោយមានការចូលរួមពី លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជា មន្ត្រីជំនាញក្រសួង សុខាភិបាល និងមន្ត្រីបច្ចេកទេសអង្គការសុខភាពពិភពលោក។
ដំណើរបេសកកម្មនេះមានគោលបំណងជំរុញឱ្យមានការបង្កើនការថែទាំសុខភាពបឋម ជាពិសេសការចូលរួមរបស់សហគមន៍ក្នុងការតាមដានជំងឺកូវីដ ១៩ ជំងឺផ្តាសាយ និងជំងឺផ្លូវដង្ហើម និងពិនិត្យសកម្មភាពចាក់វ៉ាក់សាំងកូវីដ ១៩ ទាំងដូសមូលដ្ឋាន ដូសជំរុញដូសទី ៥ នៅតាមទីតាំងនានា រួមមានសេវាសុខាភិបាល សាលារៀន រោងចក្រ ទីផ្សារ ទីប្រជុំជនផ្សេងៗ។
ក្នុងដំណើរបេសកកម្មក្នុងខេត្តកំពង់ធំ នាព្រឹកថ្ងៃទី ១៦ មិថុនា លោកស្រី ឱ វណ្ឌឌីន បានចូលរួមបិទកម្មវិធីសិក្ខាសាលាតម្រង់ទិស ដែលមានរយៈពេល ២ ថ្ងៃចាប់ពីថ្ងៃទី ១៥-១៦ ខែមិថុនា ដើម្បីពង្រឹងសមត្ថភាពសហគមន៍ និងអាជ្ញាធរមូលដ្ឋានក្នុងការតាមដានឆ្លើយតបទាន់ពេលវេលាចំពោះជំងឺទាំងនោះព្រមទាំងពាក្យចចាមអារ៉ាម ព័ត៌មានមិនពិតនានានៅក្នុងមូលដ្ឋាន។
លោកស្រីបញ្ជាក់ថា ការផ្លាស់ប្តូរឥរិយាបថ មិនមែនធ្វើឡើងតាមរយៈតែការបណ្ដុះបណ្ដាលទេ តែសកម្មភាពសំខាន់ និងចាំបាច់ គឺសកម្មភាពនៅនឹងសហគមន៍ ដែលតម្រូវឱ្យសហគមន៍យល់ពីសារប្រយោជន៍នៃការរក្សាសុខភាព តាមដានសុខភាពក្នុងគ្រួសារ និងក្នុងភូមិព្រមទាំងស្វែងរកព័ត៌មានត្រឹមត្រូវ។ លោកស្រីបន្តថា សកម្មភាពក្នុងសហគមន៍ ដែលដឹកនាំដោយសហគមន៍ ពិតជាមានសារៈសំខាន់ ដូចជាវេទិកាសហគមន៍អប់រំផ្សព្វផ្សាយ ការចុះតាមដានគាំទ្រ ដល់ក្រុមទ្រទ្រង់សុខភាពភូមិ តាមរយៈគណៈកម្មការគ្រប់គ្រងមណ្ឌលសុខភាព និងក្រុមប្រឹក្សាពិគ្រោះយោបល់ស្ត្រី និងកុមារដើម្បីស្វែងរកអ្វីដែលជាបញ្ហា និងតម្រូវការរបស់សហគមន៍ ហើយកត្តាអ្វីខ្លះដែលប្រជាជនក្នុងភូមិទាំងមូលអាចធ្វើបាន ។
លោកស្រីបន្ថែមថា៖ «សិក្ខាសាលាតម្រង់ទិសនេះមិនត្រឹមតែសម្រាប់ការឆ្លើយតបនឹងជំងឺកូវីដ ១៩ ជំងឺផ្តាសាយ និងជំងឺផ្លូវដង្ហើមផ្សេងៗប៉ុណ្ណោះទេ ព្រមទាំងពង្រឹងប្រព័ន្ធ ដើម្បីជំរុញ បង្កើនការថែទាំសុខភាពបឋម សម្រាប់ការត្រៀមឆ្លើយតបនឹងជំងឺរាតត្បាតផ្សេងៗទៀតនាពេលអនាគត ក្នុងការឆ្ពោះទៅរកភូមិឃុំ មានសុខភាពល្អ និងមានអាយុកាលរស់នៅបានយូរអង្វែង»។
ផ្អែកលើបទពិសោធនៃការគ្រប់គ្រង និងការឆ្លើយតបនឹងជំងឺកូវីដ ១៩ បានឱ្យឃើញថា ការចូលរួមរបស់បណ្ដាញ សហគមន៍នៅក្នុងការអនុវត្តវិធានការការពារការចម្លងជំងឺនានា គឺជាចំណុចសំខាន់ក្នុងការចូលរួម ចំណែកសម្រេចបានជោគជ័យនូវកិច្ចការឆ្លើយតបទៅនឹងជំងឺកូវីដ។ ទោះជាបែបនេះក្តី លោកស្រីក្រើនរំឭកថា៖ «មកដល់ពេលនេះទោះបីគ្រប់គ្រងជំងឺកូវីដ ១៩ បានក្តី តែក៏មិនទាន់មានសុវត្ថិភាពពីជំងឺកូវីដបាន ១០០% នោះទេ គឺអាស្រ័យទៅលើឥរិយាបថរបស់ប្រជាជនក្នុងការចូលរួមទប់ស្កាត់ដូចជាការទៅចាក់វ៉ាក់សាំងការតាមដានឃ្លាំមើលស្ថានភាពនៃជំងឺកូវីដ...»។
ប្រធានមន្ទីរសុខាភិបាលខេត្តកំពង់ធំ លោក ស្រី ស៊ីន ថ្លែងថា តួនាទីរបស់សហគមន៍គឺសំខាន់ ពីព្រោះគាត់ជាអ្នកនៅមូលដ្ឋានផ្ទាល់ និងយល់ដឹងអំពីសុខភាពដែលកើតមានឡើងនៅសហគមន៍ ចំណែកមន្ត្រីសុខាភិបាលជំនាញជួយផ្នែកខាងបច្ចេកទេស និងការអប់រំ។ លោកថា៖ «ដោយសារការចូលរួមរបស់សហគមន៍ទើបយើងអាចទប់ស្កាត់ជំងឺកូវីដ-១៩បាន។ ថ្នាក់ដឹកនាំកំពូល ក៏ដូចជាក្រសួងសុខាភិបាលខិតខំហើយ ប៉ុន្តែបើអត់មានការចូលរួមរបស់សហគមន៍ គឺមិនអាចជោគជ័យទេ។ អ៊ីចឹងតាមរយៈសិក្ខាសាលានេះនឹងមានលទ្ធផលល្អក្នុងការទប់ស្កាត់ទាន់ពេលចំពោះជំងឺរាតត្បាតផ្សេងៗ»។
ក្រសួងសុខាភិបាលនៅថ្ងៃទី ១៦ ខែមិថុនា បានប្រកាសថា កម្ពុជាមិនមានរកឃើញអ្នកឆ្លងវីរុសកូវីដ ១៩ ទៀតនោះទេ ក្នុងរយៈពេល ៤០ ថ្ងៃកន្លងមកនេះ ក្រោយពីអ្នកជំងឺកូវីដ ១៩ ត្រូវបានព្យាបាលឱ្យជាសះស្បើយអស់ហើយនោះ៕