.jpg)
អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និងដឹកជញ្ជូនបានបើកវគ្គបណ្តុះបណ្តាលដល់សិក្ខាកាមប្រមាណ ៦០ នាក់ នៅក្រុងសៀមរាប ស្តីពីបណ្តាញលូ និងសេវាកម្មទឹកកង្វក់ ដើម្បីលើកកម្ពស់ការយល់ដឹងជាសាធារណៈ និងឱ្យពលរដ្ឋចូលរួមថែរក្សាបណ្តាញលូ។
លោក សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ កាលពីថ្ងៃទី ១៦ ខែមិថុនា បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយសៀវភៅណែនាំស្តីពី “ការរៀបចំកម្មវិធីលើកកម្ពស់ការយល់ដឹងជាសាធារណៈរបស់ប្រជាពលរដ្ឋអំពីបណា្តញលូ ប្រព័ន្ធច្រម្រោះ និងសេវាកម្មទឹកកខ្វក់ថ្នាក់ក្រោមជាតិ” ក្នុងក្រុងសៀមរាប ដោយមានការអញ្ជើញចូលរួមពីលោក ពិន ប្រាកដ អភិបាលរងខេត្តសៀមរាប លោក សុខ វណ្ណា ប្រធានកម្មវិធីអង្គការសហប្រជាជាតិសម្រាប់លំនៅឋានមនុស្សជាតិ (UN-Habitat) អាជ្ញាធរសមត្ថកិច្ចគ្រប់ផ្នែកពាក់ព័ន្ធ សរុបប្រមាណជាង ៦០ នាក់។
សិក្ខាសាលានេះ ធ្វើឡើងក្នុងគោលបំណង លើកកម្ពស់ការយល់ដឹងអំពីតម្រូវការ គុណប្រយោជន៍ ភាពចាំបាច់នៃប្រព័ន្ធចម្រោះទឹកកខ្វក់ និងជួយឱ្យពលរដ្ឋមានការចូលរួមថែរក្សាបណ្តាញលូ និងទឹកកខ្វក់សម្រាប់ជាការងារងាយស្រួលក្នុងការគ្រប់គ្រងប្រព័ន្ធចម្រោះទឹកកខ្វក់ប្រកបដោយនិរន្តរភាព និងជួយជំរុញឱ្យមានការផ្សព្វផ្សាយបន្តពីសារៈសំខាន់អត្ថន័យ មានចងក្រងក្នុងសៀវភៅទៅកាន់បងប្អូនប្រជាពលរដ្ឋទទួលបានព័ត៌មានទូលំទូលាយក៏ដូចបានយល់ដឹងកាន់តែច្បាស់ផងដែរ។
លោក សួន ភារិទ្ធ បានលើកឡើងថា ដោយសារកម្ពុជាបច្ចុប្បន្នមានសន្តិភាព ទើបធ្វើឱ្យយើងមានការរីកចម្រើនផ្នែកសេដ្ឋកិច្ចក្នុងរយៈពេល ២ ទសវត្សរ៍ចុងក្រោយនេះ។
ទន្ទឹមនឹងសន្ទុះនៃការអភិវឌ្ឍនៅក្នុងខេត្តសៀមរាប បញ្ហាទឹកកខ្វក់ដែលបង្កពីសកម្មភាពផ្សេងៗ បានហូរចូលទៅក្នុងតំបន់លំនៅឋានរបស់បងប្អូនប្រជាពលរដ្ឋ និងសហគមន៍ បង្កផលប៉ះពាល់ដល់សុខុមាលភាពប្រជាជន សោភ័ណភាព ជីវៈចម្រុះ ប្រព័ន្ធអេកូឡូស៊ី និងជះឥទ្ធិពលដល់សេដ្ឋកិច្ចជាតិ ហើយត្រូវបានរាជរដ្ឋាភិបាលកម្ពុជា កំពុងយកចិត្តទុកដាក់ជាចម្បង។
ហេតុដូចនេះ ហេដ្ឋារចនាសម្ព័ន្ធសាធារណៈជាច្រើនពិសេស បណ្តាញលូទឹកភ្លៀង បណ្តាញលូទឹកកខ្វក់ ស្ថានីយប្រព្រឹត្តិកម្មទឹកកខ្វក់ ទីលានចាក់សំណល់ភក់ ត្រូវបានសាងសង់ និងកំពុងសាងសង់នៅតាមបណ្តារាជធានី និងក្រុងសំខាន់ៗ រួមទាំងក្រុងសៀមរាប ខេត្តសៀមរាបផងដែរ។
លោក សួន ភារិទ្ធ ក៏បានលើកឡើងបន្ថែមទៀតថា ដើម្បីឱ្យសមិទ្ធផលអាចប្រើប្រាស់បានយូរអង្វែង សូមឱ្យមានការចូលរួមពីប្រជាពលរដ្ឋ និងគ្រប់ភាគីពាក់ព័ន្ធដើម្បីប្រែក្លាយក្រុងសៀមរាប ទៅជាទីក្រុងដ៏ស្រស់ស្អាត មានសោភ័ណភាព អនាម័យស្អាត បរិស្ថានល្អ និងគួរឱ្យចង់រស់នៅ ក៏ដូចជាទាក់ទាញភ្ញៀវទេសចរជាតិ និងអន្តរជាតិ តាមរយ:ការលើកកម្ពស់អនាម័យស្អាត និងសុខភាពសាធារណៈ ធ្វើឱ្យសុខុមាលភាពរបស់ប្រជាពលរដ្ឋកាន់តែប្រសើរឡើង៕
