មន្ទីរទេសចរណ៍រាជធានីភ្នំពេញណែនាំដល់ម្ចាស់ទូក កាណូតដឹកភ្ញៀវទេសចរជាតិ និងអន្តរជាតិទាំងអស់ត្រូវផ្អាកសកម្មភាពរបស់ខ្លួនបណ្តោះអាសន្ន ដើម្បីរក្សាសណ្តាប់ធ្នាប់ និងសន្តិសុខសុវត្ថិភាព ក្នុងអំឡុងពេលបាញ់កាំជ្រួចអបអរសាទរក្នុងព្រះរាជពិធីបុណ្យចម្រើនព្រះជន្មសម្តេចម៉ែ។
សេចក្តីជូនដំណឹងរបស់មន្ទីរទេសចរណ៍រាជធានីភ្នំពេញចុះថ្ងៃទី ១៧ ខែមិថុនានេះ បានឱ្យដឹងថា ដើម្បីចូលរួមអបអរសាទរក្នុងព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់ ក្នុងគម្រប់ព្រះជន្ម ៨៦ យាងចូល ៨៧ ព្រះវស្សា ដែលនឹងប្រព្រឹត្តទៅនៅថ្ងៃសៅរ៍ ទី ១៨ ខែមិថុនា ឆ្នាំ ២០២២ នឹងមានការបាញ់កាំជ្រួចអបអរសាទរព្រះរាជពិធី បុណ្យចម្រើនព្រះជន្ម។
សេចក្តីជូនដំណឹងបន្តថា៖ «ដូចនេះមន្ទីរទេសចរណ៍រាជធានីភ្នំពេញ សូមធ្វើការណែនាំដល់ម្ចាស់ទូក កាណូតដឹកភ្ញៀវទេសចរជាតិ និងអន្តរជាតិទាំងអស់ សូមផ្អាកសកម្មភាពដំណើរការទូក កាណូតទាំងអស់របស់ខ្លួន ដោយមិនត្រូវទៅក្បែរសាឡង់អុជកាំជ្រួចជាដាច់ខាត ដើម្បីរក្សាសណ្តាប់ធ្នាប់ សន្តិសុខសុវត្ថិភាពបញ្ចៀសបញ្ហាផ្សេងៗពេលបាញ់កាំជ្រួច និងមិនត្រូវឱ្យមានជារូបភាពអសកម្មណាមួយកើតឡើងនៅតាមដងទន្លេមុខ ព្រះបរមរាជវាំង ជាពិសេសនៅពេលបាញ់កាំជ្រួចវេលាម៉ោង ១៩៖០០ នាទីយប់។
មន្ទីរទេសចរណ៍រាជធានីភ្នំពេញសង្ឃឹមយ៉ាងមុតមាំថានៅពេលទទួលបានសេចក្តីជូនដំណឹងនេះ ម្ចាស់អាជីវកម្មទូក កាណូតដឹកភ្ញៀវទេសចរទាំងអស់ និងចូលរួមសហការអនុវត្តក្នុងស្មារតីទទួលខុសត្រូវខ្ពស់ ដើម្បីញ៉ាំងឱ្យការប្រារព្ធពិធីនេះអាចប្រព្រឹត្តទៅបានដោយរលូន និងជោគជ័យ៕