ក្រចេះ: ក្រសួងបរិស្ថាន និងអង្គការដៃគូនៅថ្ងៃនេះបានបន្តរៀបចំយុទ្ធនាការអន្ទាក់សូន្យនៅខេត្តក្រចេះ ដើម្បីបញ្ឈប់ការដាក់អន្ទាក់គ្រប់ប្រភេទនៅក្នុងតំបន់ការពារធម្មជាតិកម្ពុជា ដើម្បីអភិរក្សសត្វព្រៃឱ្យនៅគង់វង្ស និងការពារឱ្យសត្វព្រៃនៅកម្ពុជាមានចំនួនសម្បូរឡើងវិញ។
នេះជាលើកទី ៤ ដែលយុទ្ធនាការអន្ទាក់សូន្យត្រូវបានរៀបចំឡើងក្នុងចំណោម ៨ យុទ្ធនាការដែលយុទ្ធនាការទី ១ បានរៀបចំឡើងដោយក្រសួងបរិស្ថាននៅរាជធានីភ្នំពេញកាលពីថ្ងៃទី ៣ ខែមីនា កន្លងទៅ។
យុទ្ធនាការទី ២ រៀបចំឡើងនៅខេត្តស្ទឹងត្រែងដោយអង្គការ មូលនិធិសត្វព្រៃពិភពលោក (WWF) និងយុទ្ធនាការទី ៣ ដែលទើបតែបញ្ចប់ថ្មីៗនេះរៀបចំដោយអង្គការសមាគមអភិរក្សសត្វព្រៃ (WCS) នៅខេត្តព្រះវិហារ។
អង្គការ WWF បានឱ្យដឹងតាមរយៈសេចក្តីប្រកាសព័ត៌មាននៅថ្ងៃនេះថា ការរៀបចំយុទ្ធនាការនេះគឺដោយសារកត្តាគំរាមកំហែងដែលបង្កឡើងដោយការដាក់អន្ទាក់ ភាពចាំបាច់នៃការពង្រឹងការអនុវត្តច្បាប់ដោយប្រសិទ្ធភាពនៅក្នុងតំបន់ការពារ និងសារៈសំខាន់នៃការកាត់បន្ថយតម្រូវការសាច់សត្វព្រៃ។
យុទ្ធនាការនេះមានគោលដៅចូលរួមសហការរួមគ្នាជាមួយអាជ្ញាធរអនុវត្តច្បាប់នៅថ្នាក់ខេត្ត ដើម្បីប្រយុទ្ធប្រឆាំង នឹងការដាក់អន្ទាក់ និងការជួញដូរសត្វព្រៃខុសច្បាប់។
យោងតាមសេចក្តីប្រកាសព័ត៌មាននេះ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បន្តអំពាវនាវដល់បុគ្គលគ្រប់រូបនៅក្នុងប្រទេសកម្ពុជាឱ្យនិយាយថា «ទេចំពោះការទិញ លក់ ឬបរិភោគសាច់សត្វព្រៃ»។
លោកលើកទឹកចិត្តឱ្យប្រជាពលរដ្ឋទាំងអស់ចូលរួមក្នុងការការពារសត្វព្រៃ និងធនធានធម្មជាតិកម្ពុជា ដើម្បីគាំទ្រការចូលរួមកសាងសេដ្ឋកិច្ចមូលដ្ឋានឱ្យប្រសើរឡើងថែមទៀត ជាពិសេសតាមរយៈការអភិវឌ្ឍវិស័យទេសចរណ៍ធម្មជាតិ និងសម្រាប់ជាប្រយោជន៍ដល់ប្រព័ន្ធអេកូឡូស៊ីនៅកម្ពុជា និងសកលលោក៕