កំពង់ឆ្នាំងៈ កម្លាំងនគរបាលស្រុក បរិបូណ៌សហការជាមួយកម្លាំងចម្រុះគណៈបញ្ជាការ រដ្ឋបាល ស្រុកបរិបូណ៌បានចុះបង្ក្រាប បទល្មើសនេសាទនៅចំណុចកោះកំពង់អួរ ភូមិកំពង់អួរ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង ដកហូតរបាំងសាច់អួន ១៥០ ម៉ែត្រ និងឧបរកណ៍នេសាទផ្សេងទៀតនៅថ្ងៃទី ១៧ ខែមិថុនានេះ។
ប្រតិបត្តិការណ៍នេះដឹកនាំ ដោយលោក ផល សុភាព អភិបាលរងស្រុកបរិបូណ៌ និងលោក អ៊ូ សោភ័ណ នាយរងខណ្ឌរដ្ឋបាលជលផល កំពង់ឆ្នាំង ដែលមានកម្លាំងសរុបចំនួន ១៤ នាក់ ប្រើប្រាស់មធ្យោបាយកាណូត បាឡាស្មាច់ ចំនួន ២ គ្រឿង។
ជាលទ្ធផលក្រុមការងារនេះបានដកហូត របាំង សាច់អួនក្រឡាញឹកចំនួន ២ កន្លែងប្រវែង ១៥០ ម៉ែត្រ លូ សាច់អួនក្រឡាញឹកចំនួន ០៣ បង្គោល ចំនួន ២០០ ដើម លែងត្រីចម្រុះចំនួន ៥ គីឡូ។ សម្ភារដកហូតបានបំផ្លាញចោល នៅនឹងកន្លែង៕