.jpg)
សកម្មភាពដាំដើមកោងកាងចំនួន ៥ ០០០ដើម នៅទីតាំងព្រៃកោងកាងនៅសហគមនេសាទភូមិថ្មី នៃខេត្តកែប។ រូបថត ក្រសួងបរិស្ថាន
ភ្នំពេញៈ សមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងបរិស្ថាន សហការជាមួយសាលាខេត្តកែប និងមន្ទីរបរិស្ថានខេត្តកែប ដាំដើមកោងកាងចំនួន ៥ ០០០ដើម នៅទីតាំងព្រៃកោងកាងនៅសហគមនេសាទភូមិថ្មី នៃខេត្តកែប។
ការដាំដើមឈើនេះធ្វើឡើងដើម្បីចូលរួមអបអរសាទរទិវាបរិស្ថានជាតិ បរិស្ថានពិភពលោក ៥ មិថុនា ឆ្នាំ ២០២២ ក្រោមប្រធានបទ «ថែទាំភពផែនដី ដើម្បីសុខភាពយើង»។
លោកស្រី ឌិត នីតា ភរិយាលោក សាយ សំអាល់ រដ្ឋមន្រ្តីក្រសួងបរិស្ថាន ថ្លែងក្នុងពិធីដើមកោងកាងនៅថ្ងៃនេះថា ដើមកោងកាងមានសារៈប្រយោជន៍សំខាន់ណាស់ចំពោះមនុស្ស សត្វ និងបរិស្ថាន ដូចជា ជារបាំងធម្មជាតិការពារឆ្នេរសមុទ្រពីគ្រោះធម្មជាតិ។
លោកស្រីបន្តថា វាជាកន្លែងស្តុកកាបោន ជាស្រទាប់ចម្រោះទឹក ជាកន្លែងសម្រាប់បង្កើតទេសចរណ៍ធម្មជាតិ ជាប្រភពអាហារដ៏សំខាន់ និងជាជម្រកត្រីពង-កូន និងសត្វស្លាប។ វាក៏ជាប្រភពប្រាក់ចំណូល ហើយក៏ជាកន្លែងទាក់ទាញភ្ញៀវទេសចរជាតិ អន្តរជាតិ មកលេងកម្សាន្តកាន់តែច្រើន ផ្ដល់នូវប្រាក់ចំណូលដល់ប្រជាសហគមន៍។
លោកស្រី ឌិត នីតា ចាត់ទុកព្រៃកោងកាង គឺជាសម្បត្តិរួមរបស់សហគមន៍ និងអំពាវនាវឱ្យមានការចូលរួមថែរក្សា ការពារ និងអភិរក្សព្រៃកោងកាងសម្រាប់ប្រយោជន៍រួមដល់កូនចៅជំនាន់ក្រោយ។
លោកស្រីថ្លែងថា៖ «ដើម្បីចូលរូមរក្សាលំនឹងអេកូឡូស៊ីជលផលកាន់តែសម្បូរបែប នៅក្នុងខេត្តកែប នៅថ្ងៃនេះ ក្រសួងបរិស្ថានបានផ្សារភ្ជាប់កម្មវិធីទិវាបរិស្ថានជាតិ បរិស្ថានពិភពលោក តាមរយៈសកម្មភាពដាំដើមកោងកាង ចំនួន ៥០០០ដើម ដោយមានការសហការគាំទ្រពីក្រុមហ៊ុនសម្ព័ន្ធអាយ អេស អាយ ចំនួន ២ ០០០ដើម»៕
