ពោធិ៍សាត់ៈ យ៉ាងហោចណាស់មានពលរដ្ឋជិត ២០០ នាក់ បានសម្រេចចាកចេញពីក្នុងតំបន់ដែនជម្រកសត្វព្រៃភ្នំសំកុស និងមេខ្លោងម្នាក់ត្រូវបានចាប់ខ្លួននៅថ្ងៃទី ១៩ មិថុនា ខណៈមន្ទីរបរិស្ថានប្រកាសនៅថ្ងៃនោះឱ្យពលរដ្ឋប្រមាណ ៥០០ នាក់ ដែលបានចាញ់កលក្រុមជនខិលខូចឱ្យចូលទៅកាប់ឆ្ការដីព្រៃ និងសង់ខ្ទមយ៉ាងអនាធិបតេយ្យក្នុងតំបន់នោះ ត្រូវប្រញាប់រុះរើនិងចាកចេញជាបន្ទាន់។
ដែនជម្រកសត្វព្រៃភ្នំសំកុស មានទំហំជិត ៣ ពាន់ហិកតា [២ ៧៩០] ដែលជាទីតាំងដ៏សំខាន់ផ្នែកប្រព័ន្ធអេកូឡូស៊ី ព្រៃស្រោង និងសត្វព្រៃ។
សេចក្ដីប្រកាសនេះ បានធ្វើឡើង បន្ទាប់ពីក្រុមមន្ត្រីជំនាញ និងអាជ្ញាធរមូលដ្ឋានបានស្រាវជ្រាវរកឃើញមុខសញ្ញាជនខិលខូចមួយចំនួនបានធ្វើសកម្មភាពបំផុសបំផុលពលរដ្ឋពីបណ្ដាខេត្តផ្សេងៗឱ្យចូលមកកាប់រានដីព្រៃ ដាំដំណាំ និងមានការសង់ខ្ទមអនាធិបតេយ្យជាង ១៨០ ខ្នង នៅចំណុចស្ទឹងខៀវ ជាប់ជើងភ្នំខ្មោច ស្ថិតក្នុងភូមិសាស្ត្រ ភូមិចម្ការជ្រៃខាងត្បូង ឃុំអន្លង់រាប ស្រុកវាលវែង ខេត្តពោធិ៍សាត់។
លោក ផាន់ សុភារិន អនុប្រធានដែនជម្រកសត្វព្រៃភ្នំសំកុស បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១៩ ខែមិថុនាថា កាលពីខែឧសភាកន្លងទៅនេះ រដ្ឋបាលខេត្តពោធិ៍សាត់ បានចេញសេចក្ដីជូនដំណឹងដល់ពលរដ្ឋចំណាកស្រុកទាំងនោះឱ្យរុះរើខ្ទមចម្ការរបស់ពួកគេនិងចាកចេញពីតំបន់ខាងលើនេះម្ដងរួចមកហើយ ប៉ុន្តែពួកគេមិនចាកចេញឡើយ។ មិនតែប៉ុណ្ណោះ មានជនខិលខូចជាមេខ្លោង ៤ នាក់ បានដើរបំផុសបំផុលនិងកៀរគរពលរដ្ឋពីបណ្ដាខេត្តមួយចំនួនឱ្យចូលមករស់នៅប្រមូលផ្ដុំគ្នាយ៉ាងអនាធិបតេយ្យថែមទៀត។
លោក សុភារិន បានថ្លែងថា៖ «សកម្មភាពរបស់ពលរដ្ឋទាំងនោះ គឺជាសកម្មភាពខុសច្បាប់ ដោយពួកគេបានកាប់រានដីព្រៃក្នុងដែនជម្រកសត្វព្រៃភ្នំសំកុសដែលជាតំបន់ការពារធនធានធម្មជាតិរបស់រដ្ឋ»។
បើតាមលោក សុភារិន នៅពេលនេះ កម្លាំងសមត្ថកិច្ចចម្រុះខេត្តពោធិ៍សាត់បានឃាត់ខ្លួនជនសង្ស័យម្នាក់ក្នុងចំណោមបក្ខពួក ៤ នាក់ ដែលបានបំផុសបំផុលពលរដ្ឋទាំងនោះឱ្យចូលមកកាប់ទន្ទ្រានដីព្រៃនៃតំបន់ដែនជម្រកសត្វព្រៃភ្នំសំកុស និងកំពុងកសាងសំណុំរឿងបញ្ជូនទៅតុលាការ ដើម្បីចាត់វិធានការបន្តតាមនីតិវិធី។
លោកបានបន្តថា៖«នៅពេលនេះប្រជាពលរដ្ឋប្រមាណជិត ២០០ នាក់ ក្នុងចំណោម ៥០០ នាក់ ដែលបានលង់ចាញ់ក្នុងឧបាយកលនៃការញុះញង់របស់ក្រុមជនខិលខូចទាំងនោះបាននាំគ្នាចាកចេញពីតំបន់ព្រៃការពារនោះ ជាបន្តបន្ទាប់ »។
ទន្ទឹមនឹងនេះលោកបានណែនាំដល់ពលរដ្ឋដែលនៅមិនទាន់រុះរើសំណង់របស់ខ្លួនឱ្យប្រញាប់ប្រញាល់ រុះរើ និងចាកចេញពីតំប់ខាងលើនេះ ហើយវិលត្រឡប់ទៅលំនៅឋានខ្លួនវិញជាបន្ទាន់ កុំបន្តចាញ់កលការញុះញង់របស់មេខ្លោងទាំងនោះ ដោយនៅតវ៉ាទាមទារកាន់កាប់ដីក្នុងដែនជម្រកសត្វព្រៃភ្នំសំកុស ព្រោះវាពុំស្របទៅនឹងច្បាប់ភូមិបាលឆ្នាំ ២០០១ និងច្បាប់ស្ដីពីតំបន់ការពារធម្មជាតិឆ្នាំ ២០០៨ នោះទេ។
ជុំវិញករណីពលរដ្ឋចូលទៅកាប់រានដីក្នុងដែនជម្រកសត្វព្រៃភ្នំសំកុសនេះដែរ លោក សូ សាហុង អភិបាលស្រុកវាលវែងបានប្រាប់ ភ្នំពេញ ប៉ុស្តិ៍ថា ករណីនេះ មិនមែនទើបតែកើតក្នុងពេលថ្មីៗនេះទេ គឺបានកើតឡើងជាច្រើនឆ្នាំមកហើយដោយសមត្ថកិច្ចបានចុះផ្សព្វផ្សាយអប់រំណែនាំ និងបង្ក្រាបជាបន្តបន្ទាប់ផងដែរ។
លោកថ្លែងថា៖ «ពួកគេជាពលរដ្ឋទំនើងមិនគោរពច្បាប់និងការណែនាំរបស់អាជ្ញាធររដ្ឋាភិបាលទេ។ ពួកគេគួរត្រូវចាប់ផាកពិន័យ ឬផ្ដន្ទាទោសទៅតាមច្បាប់ដោយគ្មានការលើកលែង»។
បើតាមលោក សាហុង ពលរដ្ឋដែលចូលមកកាប់រានដីក្នុងតំបន់ដែនជម្រកសត្វព្រៃភ្នំសំកុស ភាគច្រើនមកពីខេត្តបាត់ដំបង ប៉ៃលិន បន្ទាយមានជ័យ ព្រះវិហារ ក្រចេះ និងខេត្តកំពង់ចាម។ ចំណែកអ្នកនៅក្នុងមូលដ្ឋានស្រុកវាលវែងគឺមានតិចតួចណាស់៕
វីដេអូ៖