ក្រចេះៈ មន្រ្ដីជាន់ខ្ពស់ក្រសួងបរិស្ថាន បានអំពាវនាវដល់ម្ចាស់ភោជនីយដ្ឋានអាហារដ្ឋាន ចូលរួមសហការជាមួយមន្ទីរបរិស្ថានខេត្ដ ក្នុងការបញ្ឈប់ការលក់ដូរសាច់សត្វព្រៃគ្រប់ប្រភេទ ដើម្បីថែរក្សាជីវៈចម្រុះ និងសត្វព្រៃនៅក្នុងប្រទេសកម្ពុជា ខណៈមានភោជនីយដ្ឋានចំនួន ១០ បានស្ម័គ្រចិត្ដ បញ្ឈប់រាល់ការជួញដូរសាច់សត្វព្រៃ។
លោក នេត្រ ភក្ត្រា រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ ថ្លែងក្នុងសន្និសីទសារព័ត៌មានស្ដីពីយុទ្ធនាការអន្ទាក់សូន្យ នៅមន្ទីរបរិស្ថានខេត្ដក្រចេះ កាលពីថ្ងៃទី ១៧ មិថុនាថា ក្នុងនាមជាប្រធានយុទ្ធនាការអន្ទាក់សូន្យ លោកមានសេចក្ដីរីករាយ និងមានមោទនៈភាព ដែលបានឃើញការចូលរួមរបស់អាជីវករ ជាពិសេស ម្ចាស់ភោជនីយដ្ឋាន ដោយស្ម័គ្រចិត្ដក្នុងការប្រកាសថា ភោជនីយដ្ឋានរបស់ខ្លួនគឺគ្មានការលក់សាច់សត្វព្រៃទៀតទេ។ ការងារនេះ គឺជាដំណើរមួយដ៏ជោគជ័យ ហើយក៏ជាការងារមួយដែលមានការលើកទឹកចិត្ដបំផុតពីក្រសួងបរិស្ថាន។
លោកថ្លែងថា៖ «យើងខ្ញុំសូមថ្លែងអំណរគុណចំពោះបងប្អូងទាំងអស់នោះ ដែលចូលរួមក្នុងការប្រកាសស្ម័គ្រចិត្ដអនុវត្ដការមិនលក់សាច់សត្វព្រៃនេះជាជាការចូលរួមដោយផ្ទាល់នៅក្នុងការទប់ស្កាត់ការជួញដូរសាច់សត្វព្រៃ និងការបរបាញ់សត្វខុសច្បាប់»។
លោកក៏បានអំពាវនាវទៅដល់ម្ចាស់ភោជនីយដ្ឋានផ្សេងៗទៀត សូមចូលរួមសហការជាមួយនឹងមន្ទីរបរិស្ថាននៅតាមខេត្ដ ហើយមន្ទីរបរិស្ថានក៏ដូចគ្នាដែរ នៅតាមខេត្ដដែលមានតំបន់ការពារធម្មជាតិ មិនចាំបាច់ទីតាំងដែលក្រសួងបានធ្វើយុទ្ធនាការទេ គឺសូមធ្វើកិច្ចការងារនេះ ជាមួយនឹងម្ចាស់ភោជនីយដ្ឋាននានា ដែលមានព័ត៌មានពីការលក់ដូរសាច់សត្វព្រៃ គឺថា សូមបញ្ចុះបញ្ចូល និងជម្រាបជូនពួកគាត់អំពីផលវិបាកនៃការលក់ដូរសាច់សត្វព្រៃចំពោះច្បាប់ និងចំពោះសុខភាពអតិថិជនរបស់គាត់។
លោក ភក្រ្ដា បញ្ជាក់ថា៖ «អ៊ីចឹងអាហ្នឹងគឺសូមឱ្យពង្រីកក្នុងក្របខណ្ឌហ្នឹង ហើយបើសិនជាសាធារណៈជនជាពិសេសម្ចាស់ភោជនីយដ្ឋានបានចូលរួមទាំងអស់ប្រកាសទាំងអស់ គឺជាជោគជ័យធំរបស់យើងហើយ»។
លោកក៏សូមឱ្យប្រជាពលរដ្ឋដែលទៅដាក់អន្ទាក់ សូមគិតថា ដាក់អន្ទាក់បានសត្វព្រៃ ១ ក្បាលមក អាចបរិភោគបាន ១ ថ្ងៃ ឬ ២ ថ្ងៃ ក៏ប៉ុន្ដែសកម្មភាពនេះ គឺបានធ្វើឱ្យបាត់បង់នូវតម្លៃមហាសាល នៃជីវៈចម្រុះរបស់ប្រទេសជាតិ។ បើសិនជានាំគ្នារក្សាទុកសត្វព្រៃ នៅក្នុងសហគមន៍ និងរួមគ្នាអភិរក្ស ជីវៈចម្រុះ និងសត្វព្រៃទាំងនោះ នឹងផ្ដល់ផលប្រយោជន៍យ៉ាងច្រើន និងយូរអង្វែង ដល់ដល់ប្រជាពលរដ្ឋតកូនតចៅ ប្រៀបបានទៅនឹងប្រភពធនធានមួយ ដែលប្រើប្រាស់មិនចេះអស់។
លោកបថ្លែងទៀតថា៖ «អ៊ីចឹងនេះគឺជាកិច្ចការងារមួយ ដែលយើងចង់ស្នើសុំបន្ថែម ឱ្យប្រជាពលរដ្ឋជាពិសេសម្ចាស់ភោជនីយដ្ឋាន សូមអំពាវនាវពីទីនេះ សូមចូលរួម។ ឥឡូវយើងបាន ១០ ភោជនីយដ្ឋានហើយនៅទូទាំងប្រទេសមានច្រើនណាស់ជាពិសេសខេត្តដែលមានតំបន់ការពារធម្មជាតិ គឺសូមឱ្យចូលរួមឱ្យបានសកម្មបំផុត»។
លោក លំ សេរីកត់ ម្ចាស់អាហារដ្ឋានភ្នំត្បែង ស្ថិតក្នុងខេត្ដព្រះវិហារ បានបង្ហាញសេចក្ដីរីករាយដែលបានចូលរួមជាមួយយុទ្ធនាកាអន្ទាក់សូន្យ ដែលរៀបចំឡើង ដោយក្រសួងបរិស្ថាន ក្នុងការប្ដេជ្ញាចិត្ដបញ្ឈប់ការលក់សាច់សត្វព្រៃគ្រប់ប្រភេទ។
លោកថា៖ «ខ្ញុំយល់ឃើញថា យុទ្ធនាការនេះ ពិតជាមានសារប្រយោជន៍ដោយបានបញ្ជ្រាបចំណេះដឹង និងព័ត៌មានអំពីអត្ថប្រយោជន៍នៃជីវៈចម្រុះ និងសត្វព្រៃទៅដល់ប្រជាពលរដ្ឋនៅមូលដ្ឋាន។ ការបញ្ឈប់ការដាក់អន្ទាក់សត្វព្រៃ គឺមានប្រយោជន៍យ៉ាងច្រើនក្នុងការថែរក្សាជីវៈចម្រុះ និងសត្វព្រៃរបស់យើង»។
លោកបន្តថា បើប្រជាពលរដ្ឋនៅបន្តការដាក់អន្ទាក់ និងបរបាញ់សត្វព្រៃ កម្ពុជា នឹងបន្តបាត់បង់នូវជីវៈចម្រុះ និងសត្វព្រៃនាថ្ងៃអនាគត និងបាត់បង់នូវភ្ញៀវទេសចរ បែបធម្មជាតិ ដែលជាផ្នែកសំខាន់មួយ ក្នុងការផ្ដល់ចំណូលទៅដល់សហគមន៍។
លោក សេរីកត់ បញ្ជាក់ថា៖ «អីចឹង ក្នុងនាមខ្ញុំជាម្ចាស់អាហារដ្ឋានភ្នំត្បែង ដើម្បីលើកកម្ពស់យុទ្ធនាការអន្ទាក់សូន្យនេះ ខ្ញុំសូមចូលរួមប្ដេជ្ញាតាំងចិត្ដថា បញ្ឈប់រាល់កការជួញដូរសាច់សត្វព្រៃគ្រប់ប្រភេទនៅអាហារដ្ឋានខ្ញុំបាទ និងបញ្ឈប់ការបញ្ជាទិញពីតំបន់នៅតាមមូលដ្ឋាននានា ទោះបីជាមានការញុះញង់ការលួងលោមការគំរាមកំហែងយ៉ាងណាក្ដី គឺខ្ញុំមិនលក់ដូរសាច់សត្វព្រៃជាដាច់ខាត»។
លោកសង្ឃឹមថា រាជរដ្ឋាភិបាល ក្រសួងបរិស្ថាន និងក្រសួងទេសចរណ៍ បន្តបង្កើនការរៀបចំវិស័យទេសចរណ៍បែបធម្មជាតិនៅតាមតំបន់ដែលមានធនធានធម្មជាតិដើម្បីបង្កើនប្រាក់ចំណូលទៅដល់សហគមន៍ និងឆ្លើយតបចំពោះការបញ្ឈប់ការដាក់អន្ទាក់ផងដែរ។
លោក ថាច់ មេត្រី តំណាងអង្គការ រីខូហ្វ (RECOFTC) លើកឡើងថា ការបញ្ឈប់ការបរបាញ់ ការដាក់អន្ទាក់ និងការបរិភោគសាច់សត្វព្រៃ គឺត្រូវផ្ដើមចេញពីខ្លួនឯងជាមុនសិន។ ក្នុងនោះត្រូវឱ្យយល់ច្បាស់ថា សាច់សត្វព្រៃមិនមែនជាឱសថបូរាណ សាច់សត្វព្រៃមិនមែនមានរស់ជាតិឆ្ងាញ់ សាច់សត្វព្រៃមែនជាអ្វីដែលមិនបរិភោគមិនបាននោះទេ។
លោកបញ្ជាក់ថា«ខ្ញុំយល់ខ្លួនឯងថា វាពិតជាមានផលប៉ះពាល់ ដោយខ្ញុំជឿថា សត្វព្រៃវារស់នៅក្នុងព្រៃមិនដឹងថា វាស៊ីអ្វីខ្លះ មិនដឹងថា វាមានមេរោគអ្វីខ្លះនៅក្នុងខ្លួនវា»។
លោកបន្តថា៖ «សត្វស្រុកយើងចិញ្ចឹមមានការថែទាំ មានវ៉ាក់សាំងចាក់ការពារសុខភាព ក្នុងកសិដ្ឋាននៅពេលសត្វចិញ្ចឹមមានជំងឺបន្តិបន្តួច មានពេទ្យគេទៅពិនិត្យព្យាបាល ចុះសត្វព្រៃ វារស់នៅក្រៅតំបន់យើង បែបផែននៃការរស់នៅខុសពីយើង អ៊ីចឹង មានន័យថា ពិតជាមានមេរោគ ពិតជាមិនល្អទេសម្រាប់យើង ត្រូវយល់ឱ្យច្បាស់អាហ្នឹងមួយ»។
ក្រសួងបរិស្ថាន និងអង្គការអន្តរជាតិជាដៃគូក្នុងវិស័យបរិស្ថាន កាលពីថ្ងៃទី ៣ ខែ មីនា ឆ្នាំ ២០២២ បានរួមគ្នាប្រកាសបើកយុទ្ធនាការអន្ទាក់សូន្យក្នុងតំបន់ការពារធម្មជាតិកម្ពុជា ហើយបានប្តេជ្ញាចិត្តរួមគ្នាថា នឹងចាត់វិធានការចាំបាច់នានា ដើម្បីឈានទៅបញ្ចប់វិបត្តិអន្ទាក់និងការជួញដូរសត្វព្រៃខុសច្បាប់នៅកម្ពុជា ។
តាមរយៈយុទ្ធនាការនេះ មានភោជនីយដ្ឋានចំនួន ១០ បានស្ម័គ្រចិត្ដ ប្ដេជ្ញាចិត្ដក្នុងការចូលរួមដោយបញ្ឈប់រាល់ការជួញដូរ សាច់សត្វព្រៃគ្រប់ប្រភេទក្នុងទីតាំងរបស់ខ្លួន។ យុទ្ធនាការអន្ទាក់សូន្យនេះ នឹងប្រព្រឹត្តទៅក្នុងរយៈពេល ៦ ខែ នៅតាមបណ្តាខេត្តគោលដៅដូចជា ស្ទឹងត្រែង ព្រះវិហារ ក្រចេះ មណ្ឌលគិរី កំពង់ធំ និងរតនៈគិរី៕
វីដេអូ៖