ភ្នំពេញៈ រន្ទះបាញ់បានកើតឡើង ៤៦ លើក ដោយបានសម្លាប់មនុស្សចំនួន ២២ នាក់ និងរបួស ១៧ នាក់ចាប់តាំងពីដើមរដូវភ្លៀងធ្លាក់រហូតដល់ខែឧសភា ឆ្នាំ ២០២២ នេះ។ នេះបើយោងតាមគណៈកម្មាធិការជាតិគ្រប់គ្រងគ្រោះមហន្តរាយ។
គ្រោះរន្ទះបាញ់ក៏បានសម្លាប់គោក្របី ៥៣ ក្បាល និងធ្វើឱ្យខូចខាតផ្ទះ ១១ ខ្នងផងដែរ។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងទៀតថា ខេត្តបាត់ដំបងមានរន្ទះបាញ់កើតឡើងច្រើនជាងខេត្តដទៃ ដែលមានដល់ទៅ ៨ លើក និងធ្វើឱ្យមនុស្សស្លាប់ ៣ នាក់។ ប៉ុន្តែខេត្តពោធិ៍សាត់គឺជាខេត្តដែលមានមនុស្សស្លាប់ ដោយសាររន្ទះបាញ់ច្រើនជាងគេរហូតដល់ទៅ ៤ នាក់ ខណៈរន្ទះបាញ់កើតឡើងត្រឹមតែ ៣ ដងប៉ុណ្ណោះ។ បើតាមគណៈកម្មាធិការជាតិគ្រប់គ្រងគ្រោះមហន្តរាយនៅក្នុងរយៈពេល ៥ ខែដើមឆ្នាំ ២០២២ ផលប៉ះពាល់ដោយសារអាកាសធាតុមានការថយចុះពាក់កណ្តាល បើប្រៀបធៀបនឹងរយៈពេល ៥ ខែ ដើមឆ្នាំ ២០២១។
ដោយឡែកស្ថានភាពអាកាសធាតុសម្រាប់ ៥ ខែ ដើមឆ្នាំ ២០២២ នេះមានភាពល្អប្រសើរជាងឆ្នាំ ២០២១ ដោយសារកម្ពុជាទទួលរងកម្រិតកម្ដៅខ្សោយពុំក្តៅខ្លាំងដូចឆ្នាំ ២០២១ ហើយភ្លៀងកក់ខែ កើតមានច្រើនក្នុងរដូវប្រាំង កាត់បន្ថយការប្រឈមនូវការខ្វះខាតទឹកប្រើប្រាស់ និងទឹកសម្រាប់ការបង្កបង្កើនផល ព្រមទាំងពុំសូវទទួលរងឥទ្ធិពលពីព្យុះក្នុងតំបន់។ ដូច្នេះផលប៉ះពាល់ដោយខ្យល់កន្ត្រាក់ និងរន្ទះបាញ់មានការថយចុះធៀបឆ្នាំ ២០២១ ក្នុងរយៈពេលដូចគ្នា។
ខ្យល់កន្ត្រាក់កើតឡើងចំនួន ៧៩ លើក បណ្តាលឱ្យផ្ទះរលំ និងខូចខាតធ្ងន់ចំនួន ៥២៧ ខ្នង, ផ្ទះរបើកដំបូលចំនួន ១ ៧៧៧ ខ្នង, មនុស្សស្លាប់ ២ នាក់ និងរបួស ១៦ នាក់។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕