.jpg)
មន្ត្រីនគរបាលជាជនសង្ស័យនិងជនរងគ្រោះកាលពីថ្ងៃទី១៩ មិថុនា ។ រូបថត ប៉ូលិស
បាត់ដំបងៈ នគរបាលព្រហ្មទណ្ឌខេត្តបាត់ដំបងបានកសាងសំណុំរឿងបញ្ជូនមន្ត្រីនគរបាលម្នាក់ទៅសាលាដំបូងខេត្តបាត់ដំបង នៅថ្ងៃទី ២០ មិថុនា បន្ទាប់ពីឃាត់ខ្លួនបាន ១ ថ្ងៃ ពាក់ព័ន្ធនឹងការវាយមន្ត្រីនគរបាលរួមការងារនៅច្រកទ្វារអន្តរជាតិដូង ក្នុងស្រុកកំរៀង ខេត្តបាត់ដំបង បណ្តាលឱ្យបែកក្បាល។
លោក លឹម ពុទ្ធីឡា ស្នងការរងនគរបាលខេត្តបាត់ដំបងឱ្យដឹងនៅថ្ងៃទី ២០ មិថុនា ថា ជនសង្ស័យឈ្មោះ ហេង គឹមសៀង ជានាយរងប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិដូង ស្ថិតក្នុងស្រុកកំរៀង។ ចំណែកជនរងគ្រោះឈ្មោះ ហែម វិបូណា ជានាយរងប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិដូងដូចគ្នា។
លោកបានប្រាប់ថា៖ «ករណីនេះតាមពិតទៅខាងជំនាញយើងបានបញ្ជូនជនសង្ស័យទៅអយ្យការពីម្សិលមិញម្ល៉េះ (ថ្ងៃទី ១៩ មិថុនា) ប៉ុន្តែដោយសារតុលាការចាត់ការមិនទាន់ក៏ផ្ញើជនសង្ស័យមកការិយាល័យយើងសិនហើយថ្ងៃនេះ (ថ្ងៃទី ២០ មិថុនា) ទើបខាងអយ្យការប្រាប់យើងឱ្យនាំជនសង្ស័យទៅម្តងទៀត»។
លោក ង៉ែត វណ្ណា អធិការរងនគរបាលស្រុកកំរៀងបានឱ្យដឹងនៅថ្ងៃទី ២០ មិថុនាថា តាមសម្តីលោក ហែម វិបូណា ការងាររបស់គាត់គឺយាមផ្លាស់ប្តូរវេនគ្នានៅពេលយប់ថ្ងៃទី ១៦ ខែមិថុនា ហើយនៅម៉ោងប្រមាណជា ៨ យប់ គឺគាត់បានផុតម៉ោងកំណត់ត្រូវយាម ហើយត្រូវប្តូរឱ្យឈ្មោះ ហេង គឹមសៀង យាមម្តង។
លោកបន្តថា នៅពេលនោះ ជនរងគ្រោះបានប្រាប់ឈ្មោះ ហេង គឹមសៀង ឱ្យស្លៀកពាក់ជាឯកសណ្ឋានកងកម្លាំង ដោយសារតែជាពេលវេលាបំពេញការងារ។ ប៉ុន្តែមិនត្រឹមតែមិនទទួលយកការប្រាប់នោះទេ តែថែមទាំងខឹងនឹងជនរងគ្រោះ ហើយបានទាស់ពាក្យសម្តីគ្នា តែជនរងគ្រោះមិនតបតទេ ហើយក៏ជិះម៉ូតូត្រឡប់ទៅផ្ទះ។ លុះរំលងបាន ១ ថ្ងៃ គឺនៅថ្ងៃទី ១៨ មិថុនា វេលាម៉ោងជាង ៦ ព្រឹក ស្រាប់តែភាគីជនសង្ស័យបានទៅសួរជនរងគ្រោះថា ហេតុអ្វីបានជាចេះតែរករឿងគាត់ហើយពួកគេទាំង ២ នាក់ ក៏ទាស់សម្តីគ្នារហូតបង្កជាជម្លោះវាយតប់គ្នាតែម្តង។
បើតាមលោកអធិការរង វណ្ណា ពេលនោះភាគីជនសង្ស័យបានយកស្បោងក្រណាត់ពណ៌ខ្មៅ ដែលមានដាក់វត្ថុរឹងក្នុងនោះវាយក្បាលជនរងគ្រោះបែកចេញឈាម។ភ្លាមៗនោះភាគីរងគ្រោះមិនទាន់បានដាក់ពាក្យបណ្តឹងទេ តែប៉ុន្មានម៉ោងក្រោយមកទើបគាត់ដាក់ពាក្យបណ្តឹងមកអធិការដ្ឋាននគរបាលស្រុកកំរៀង។
លោកបានបន្តថា ក្រោយពីទទួលបានពាក្យបណ្តឹង នៅថ្ងៃទី ១៩ មិថុនា សមត្ថកិច្ចរបស់លោកបានអញ្ជើញលោក ហេង គឹមសៀង ឱ្យចូលខ្លួនមកកាន់អធិការដ្ឋាននគរបាលស្រុកកំរៀង។ក្រោយពីសមត្ថកិច្ចរបស់លោកសាកសួរជនសង្ស័យនិងផ្អែកលើវត្ថុតាងបង្កបទល្មើស រួមនឹងស្លាកស្នាមរបួសផងនោះ សមត្ថកិច្ចបានសុំគោលការណ៍ពីលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ហើយបានឃាត់ខ្លួនជនសង្ស័យតែម្តង។
លោកប្រាប់ថា៖ «ពួកគាត់មានជម្លោះនៅកន្លែងការងាររបស់គាត់ទេ ប៉ុន្តែដោយសារភាគីខាងជនរងគ្រោះមិនព្រមក៏មកដាក់ពាក្យបណ្តឹងនៅអធិការដ្ឋាននគរបាលយើង»។
ពាក់ព័ន្ធរឿងនេះ ភ្នំពេញ ប៉ុស្តិ៍ បានទូរស័ព្ទទៅលោក ហែម វិបូណា ដើម្បីសុំការបកស្រាយបន្ថែមដែរនៅថ្ងៃទី ២០ មិថុនា ប៉ុន្តែទូរស័ព្ទរបស់លោកគ្មានអ្នកទទួល៕
