កោះកុងៈ ក្មេងប្រុស ២ នាក់ ត្រូវបានរន្ទះបាញ់ស្លាប់នៅវាលស្រែក្នុងតំបន់ដាច់ស្រយាលមួយ ខណៈពួកគេកំពុងដើររើសខ្យងក្ដាមពីក្រោយគោយន្តឪពុកដែលកំពុងភ្ជូរស្រែនៅភូមិព្រៃង ឃុំដងពែង ស្រុកស្រែអំបិល ខេត្តកោះកុង កាលពីថ្ងៃទី ១៩ ខែ មិថុនា ឆ្នាំ ២០២២។ នេះបើតាមការឱ្យដឹងពីមន្ត្រីនគរបាលមូលដ្ឋាន។
លោក ធាន ភើប នាយនគរបាលប៉ុស្តិ៍ឃុំដងពែង បានប្រាប់ ភ្នំពេញ ប៉ុស្តិ៍ នៅថ្ងៃទី ២០ មិថុនាថា ក្មេងប្រុសរងគ្រោះដែលបានស្លាប់ដោយបាតុភូតគ្រោះធម្មជាតិរន្ទះបាញ់ខាងលើនេះ រួមមាន ឈ្មោះ បូ សំណាង អាយុ ១៤ ឆ្នាំ និងឈ្មោះ តេង រតនៈ អាយុ ១១ ឆ្នាំ។ អ្នកទាំង ២ ជាបងប្អូនជីដូនមួយនឹងគ្នានិងមានលំនៅឋានក្នុងភូមិព្រាំង ឃុំដងពែង ស្រុកស្រែអំបិល ខេត្តកោះកុង។
លោកបានបញ្ជាក់ថា៖ «មុនពេលកើតហេតុ ក្មេងប្រុសទាំង ២ នាក់ បាននាំគ្នាដើររើសក្ដាមខ្យងពីក្រោយ គោយន្តទន្លេថងដែលឪពុករបស់ពួកគេកំពុងភ្ជួរស្រែ។ លុះដល់វេលាម៉ោងប្រមាណជា ៤ រសៀលក៏មានភ្លៀងខ្យល់ និងផ្គររន្ទះកើតឡើង ហើយពួកគេក៏ត្រូវរន្ទះបាញ់ស្លាប់នៅកណ្ដាលដីស្រែនោះតែម្ដង»។
លោកបានបន្តថា បាតុភូតគ្រោះធម្មជាតិរន្ទះបាញ់នៅតែជាបញ្ហាប្រឈមរបស់ប្រជាកសិករព្រោះជាទូទៅ នៅរដូវវស្សាប្រជាកសិករតែងតែប្រញឹកលើការងារបង្កបង្កើនផលស្រូវ ដើម្បីទុកជាស្បៀងអាហារសម្រាប់ទ្រទ្រង់ជីវភាពគ្រួសារបើទោះជាប្រឈមនូវបញ្ហាគ្រោះធម្មជាតិក៏ដោយ។
យ៉ាងណាក៏ដោយ លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងថា ថ្វីដ្បិតតែគ្មាននរណាម្នាក់អាចហាមឃាត់បាតុភូតធម្មជាតិកុំឱ្យកើតបានក្ដី ប៉ុន្តែ «យើង» អាចបង្ការគ្រោះថ្នាក់ឬកាត់បន្ថយហានិភ័យទាំងនេះបានតាមរយៈការអនុវត្តតាមសេចក្ដីណែនាំរបស់មន្ត្រីជំនាញដែលបានហាមប្រើប្រាស់ឧបករណ៍សម្ភារដែលងាយចម្លងអគ្គិសនីនិងគ្រឿងអេឡិចត្រូនិកនានា ដូចជាទូរស័ព្ទដៃនិងវិទ្យុទាក់ទងជាដើម នៅពេលមេឃកំពុងភ្លៀង ជាពិសេសកុំឈរលេងក្រោមដើមឈើឬរត់លេងឬធ្វើការនៅតាមវាលស្រែ ដែលមានទឹកដក់ក្នុងពេលមេឃកំពុងភ្លៀង។
លោកថ្លែងថា៖ «ជាការពិតបាតុភូតគ្រោះធម្មជាតិភ្លៀងលាយឡំខ្យល់កន្ត្រាក់និងផ្គររន្ទះ គឺគ្មាននរណាម្នាក់ទៅហាមឃាត់ និងទប់ស្កាត់កុំឱ្យកើតមានបាននោះឡើយ តែយើងអាចបង្ការគ្រោះថ្នាក់ដល់អាយុជីវិតរបស់យើងបាននៅពេលដែលវាកើតឡើង ប្រសិនបើយើងអនុវត្តតាមគោលការណ៍ណែនាំរបស់មន្ត្រីជំនាញឱ្យបានត្រឹមត្រូវ»។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ក្នុងរយៈពេល ៥ ខែ នៃឆ្នាំ ២០២២ នេះ បាតុភូតរន្ទះបាញ់បានកើតឡើង ៤៦ លើក បណ្ដាលឱ្យមនុស្ស ២២ នាក់ស្លាប់ និង ១៧ នាក់ទៀតរងរបួស ងាប់គោក្របី ៥៣ ក្បាល និងធ្វើឱ្យខូចខាតផ្ទះ ១១ ខ្នង។ ក្នុងនោះខេត្តពោធិ៍សាត់មានមនុស្សស្លាប់ដោយករណីរន្ទះបាញ់ច្រើនជាងគេ គឺរហូតដល់ទៅ ៤នាក់ បន្ទាប់មក គឺខេត្តបាត់ដំបងមានមនុស្ស ៣ នាក់ស្លាប់ដោយករណីរន្ទះបាញ់៕