ព្រះសីហនុៈ នគរបាលខេត្តព្រះសីហនុនៅថ្ងៃទី ២០ មិថុនា កំពុងបន្តស៊ើបពាក់ព័ន្ធសំណុំរឿងចាប់ខ្លួនបុរសជនជាតិខ្មែរម្នាក់ កាលពីថ្ងៃទី ១៩ មិថុនា ជាមួយអាវុធវែងខ្លីចំនួន ៣ ដើម ដែលការចាប់ខ្លួននេះក្រោយពីកើតមានអំពើបាញ់ប្រហារលើមន្ត្រីនគរបាលមួយរូបក្រុងព្រះសីហនុ បណ្តាលឱ្យរបួសជើងកាលពីរំលងអាធ្រាត្រឈានចូលថ្ងៃទី ១៦ ខែ មិថុនា ឆ្នាំ ២០២២។ នេះបើតាមលោក ជួន ណារិន្ទ ស្នងការនគរបាល ខេត្ត ព្រះសីហនុ។
លោក ជួន ណារិន្ទ ប្រាប់ ភ្នំពេញ ប៉ុស្តិ៍ នៅថ្ងៃទី ២០ មិថុនាថា ការឃាត់ខ្លួនជនសង្ស័យម្នាក់កាលពីថ្ងៃទី ១៩ មិថុនា គឺបន្ទាប់ពីត្រូវកម្លាំងសមត្ថកិច្ចរបស់លោកឃាត់ខ្លួនបានបុរសជនជាតិវៀតណាមម្នាក់កាលពីអំឡុងខែមិថុនានេះ។ រីឯបុរសជនជាតិវៀតណាមម្នាក់នោះក៏ត្រូវបានតុលាការខេត្តព្រះសីហនុ ឃុំខ្លួនរួចហើយដែរ។ ការឃាត់ខ្លួននេះដែរ គឺពាក់ព័ន្ធនឹងអំពើបាញ់ប្រហារមួយកាលពីរំលងអាធ្រាត្រឈានចូលថ្ងៃទី ១៦ ខែ មិថុនា ឆ្នាំ ២០២២ ដែលធ្វើឱ្យមន្ត្រីនគរបាលរបស់លោកមួយរូបត្រូវរបួសជើង។
លោកបន្តថា ចំពោះជនសង្ស័យម្នាក់ទៀតដែលសមត្ថកិច្ចរបស់លោកទើបចាប់ខ្លួនបាននេះក៏ជាបក្ខពួករបស់ជនជាតិវៀតណាមដែលត្រូវតុលាការឃុំខ្លួននោះដែរ។ ពេលនេះកម្លាំងសមត្ថកិច្ចរបស់លោកកំពុងបន្តធ្វើការស្រាវជ្រាវរកប្រភពថាតើគាត់បានអាវុធនេះពីណាមក។
លោកថ្លែងថា៖ «បុរសជនជាតិខ្មែរម្នាក់នេះគាត់ពាក់ព័ន្ធនឹងការកាន់កាប់ និងប្រើប្រាស់អាវុធខុសច្បាប់ហើយនិងធ្វើឱ្យរបួសស្នាមដល់សមត្ថកិច្ចតែប៉ុណ្នឹងទេ។ យើងកំពុងតែអនុវត្តវិធានការណ៍ជំនាញដើម្បីស៊ើបបន្តទៀត»។
លោក ជួន ណារិន្ទ ថ្លែងថា ករណីនេះក៏មានការបង្ហោះតាមបណ្តាញទំនាក់ទំនងសង្គមហ្វេសប៊ុកបន្តគ្នាដែលលោកយល់ថា អ្នកបង្ហោះនោះមិនមែនជាដែនសមត្ថកិច្ចរបស់ខ្លួនទេគ្រាន់តែគាត់ដឹងពីគេឬមួយទទួលបានរូបភាពពីគេហើយយកមកបង្ហោះបន្តដែលមិនទាន់មានប្រភពព័ត៌មានច្បាស់លាស់។ តាមពិតទៅ អ្នកដែលយកមកបង្ហោះនោះគាត់មានចេតនាល្អទេប៉ុន្តែពេលខ្លះក៏ធ្វើឱ្យប៉ះពាល់ដល់ជំនាញរបស់លោកធ្វើការងារដែរ។
ពាក់ព័ន្ធនឹងករណីនេះដែរ ត្រូវបានមន្ត្រីនគរបាល ក្រុងព្រះសីហនុមួយរូបស្នើសុំមិនឱ្យបញ្ចេញឈ្មោះបានប្រាប់ថា បុរសដែលសមត្ថកិច្ចចាប់ខ្លួនឈ្មោះ យិន ថារ៉ា ជាជនជាតិខ្មែរ ភេទ ប្រុស អាយុ ៣៥ ឆ្នាំ មានរបរជាជាងដែក រស់នៅក្នុងបុរីទួលសង្កែ ភូមិ អរិយក្សត្រ ឃុំ អរិយក្សត្រ ស្រុក ល្វាឯម ខេត្ដ កណ្ដាល។ ការចាប់ខ្លួននេះគឺ នគរបាលខេត្តព្រះសីហនុ សហការជាមួយ នគរបាលខេត្ត កណ្តាលស្រាវជ្រាវឃាត់ខ្លួនបានកាលពីព្រឹកថ្ងៃទី ១៩ មិថុនា ឆ្នាំ ២០២២ នៅផ្ទះជនសង្ស័យស្ថិតក្នុងបុរីទួលសង្កែ ភូមិអរិយក្សត្រ ឃុំអរិយក្សត្រ ស្រុក ល្វាឯម ខេត្ដ កណ្ដាល។
មន្ត្រីនគរបាលស្រុកល្វាឯមមួយរូបដែលស្នើសុំមិនឱ្យបញ្ចេញឈ្មោះដែរនោះបាននិយាយប្រាប់នៅថ្ងៃទី ២០ មិថុនាថា កាលពីថ្ងៃទី ១៩ មិថុនា ឆ្នាំ ២០២២ កម្លាំងនគរបាលខេត្ត ព្រះសីហនុ សហការជាមួយកម្លាំងនគរបាលស្រុកល្វាឯម និងនគរបាលព្រហ្មទណ្ឌខេត្តកណ្តាល បានឃាត់ខ្លួនបុរសឈ្មោះ យិន ថារ៉ា នៅផ្ទះរបស់គាត់ក្នុងបុរីទួលសង្កែ ភូមិអរិយក្សត្រ ឃុំអរិយក្សត្រ ស្រុក ល្វាឯម ពិតមែនហើយនាំយកទៅខេត្តព្រះសីហនុនៅថ្ងៃដដែលនោះ។
មន្ត្រីបន្តថា៖ «ករណីនេះសមត្ថកិច្ចនៅបន្តស្រាវជ្រាវទៀតព្រោះសង្ស័យថា រឿងនេះអាចនៅមានបណ្តាញរបស់វាឬបក្ខពួករបស់ជនសង្ស័យទៀត»។
មន្ត្រីដដែលបន្តទៀតថា ចំពោះវត្ថុតាងដែលសមត្ថកិច្ចឆែកឆេររកឃើញក្នុងផ្ទះរបស់ជនសង្ស័យមានកាំភ្លើងខ្លី ២ ដើមម៉ាក Glook 19 កាំភ្លើងវែងម៉ាក CZ SCORPION EVO3A1ដើម ,បំពង់ខ្ទប់សំឡេងមួយចំនួន គ្រាប់កាំភ្លើងខ្លីប្រភេទ 9mm ចំនួន ៤២៦ គ្រាប់ បង់កាំភ្លើងខ្លីចំនួន ៤ និងបង់កាំភ្លើងវែងចំនួន ២ រួមនឹងឧបករណ៍សម្រាប់ជួសជុលអាវុធមួយចំនួនទៀត៕