ភ្នំពេញៈ លោកនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិបានឲ្យដឹងថា ការអនុវត្តវិធានការពិន័យតាមអនុក្រឹត្យលេខ ៣៩ អនក្រ.បកគួបផ្សំនឹងការអបរំនឹងធ្វើឲ្យស្មារតីគោរពច្បាប់ស្តីពីចរាចរណ៍ផ្លូវគោកមានភាពល្អប្រសើរជាងមុន ខណៈពេលនេះសមត្ថកិច្ចមានការសម្រួលលើការផាកពិន័យខ្លះដោយប្ដួរមកអប់រំវិញ។ ប៉ុន្តែអង្គការសង្គមស៊ីវិលធ្វើការផ្នែកនេះអះអាងថាយន្តការអប់រំមិនមានប្រសិទ្ធភាព ដូចការរឹតបន្តឹងច្បាប់ទេ។
លោកនាយឧត្តមសេនីយ៍ ហ៊ឹម យ៉ាន បានឲ្យដឹងតាមរយៈតេឡេក្រាមនៅថ្ងៃទី ២០ ខែមិថុនាថា វិធានការពិន័យគួបផ្សំការអប់រំ នឹងត្រូវបន្តអនុវត្តឲ្យកាន់តែមានវឌ្ឍនភាពថែមទៀតប្រកបដោយភាពទន់ភ្លន់ តែម៉ឺងម៉ាត់ គួបផ្សំការពិន័យ និងការអប់រំលើទោចក្រយានយន្ត ទោចក្រយានយន្តសណ្តោងរ៉ឺម៉ក ឬត្រីចក្រយានយន្ត ឬម៉ូតូកង់៤ ដែលប្រព្រឹត្តអំពើល្មើសចំនួន ៧ និងចំពោះយានយន្តធុនស្រាល យានយន្តធុនធ្ងន់ ដែលប្រព្រឹត្តអំពើល្មើសចំនួន ៩។
លោកបញ្ជាក់ថា៖ «សូមមេត្តាចូលរួមគោរពច្បាប់ស្តីពីចរាចរណ៍នៅគ្រប់ពេល និងគ្រប់ទីកន្លែង ព្រោះការធ្វេសប្រហែស ឬការប្រព្រឹត្តល្មើសច្បាប់ដោយចេតនា ឬអចេតនានឹងនាំឲ្យមានគ្រោះថ្នាក់ដល់ជីវិតក្នុងស្ថានភាពដែលចរាចរណ៍កាន់តែមមាញឹក»។
លោក ចាន់ សុធី នាយការិយាល័យនគរបាលចរាចរណ៍ផ្លូវគោក ខេត្តបាត់ដំបង ថ្លែងនៅថ្ងៃទី ២០ ខែមិថុនាថា បន្ទាប់ពីទទួលបានការណែនាំពីការសម្រួលការអនុវត្តរឹតបន្តឹងច្បាប់ស្តីពីចរាចរណ៍ផ្លូវគោកតាមអនុក្រឹត្យលេខ ៣៩ លោកបានបើកការប្រជុំភ្លាមៗ ដើម្បីផ្សព្វផ្សាយឲ្យមន្ត្រីនគរបាលបានដឹងនិងអនុវត្តឲ្យមានប្រសិទ្ធភាពខ្ពស់។
លោកបញ្ជាក់ថា ការអប់រំចំពោះបទល្មើសរថយន្តយន្តមាន ៩ ចំណុច ក្នុងនោះត្រូវធ្វើការអប់រំ ៥ ចំណុច រួមមាន បើកបរមិនគោរពភ្លើងសញ្ញា និងស្លាកសញ្ញា បើកបរវ៉ាជែង បើកបរមិនពាក់ខ្សែក្រវាត់ ដឹកលើសចំណុះ ការប្រើទូរស័ព្ទ និងពិន័យ ៤ ចំណុច រួមមាន បើកបរលើសល្បឿន បើកបរស្រវឹង គ្មានបណ្ណបើកបរ និងគ្មានបណ្ណសម្គាល់ ឬគ្មានស្លាកលេខ។
ចំណែកបទល្មើសចំពោះម៉ូតូមាន ៧ ចំណុច ក្នុងនោះត្រូវធ្វើការអប់រំ ៤ ចំណុច រួមមាន បើកបរមិនគោរពភ្លើងសញ្ញា និងស្លាកសញ្ញា ល្មើសការបត់និងវ៉ាជែង ការប្រើទូរស័ព្ទ និងដឹកលើសចំណុះ និងធ្វើការពិន័យ៣ចំណុច រួមមាន មិនពាក់មួកសុវត្ថិភាព បើកបរស្រវឹង និងអត់ស្លាកលេខ។ លោកថ្លែងថា៖«ពីមុនរថយន្តយើងផាកពិន័យ ៩ ចំណុច តែឥឡូវយើងមកផាកពិន័យ តែ ៤ ចំណុចវិញ ចំណែកម៉ូតូពីមុនយើងផាកពិន័យ៧ចំណុច តែឥឡូវយើងផាកពិន័យតែ ៣ ចំណុចទេ»។
លោក គឺម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា ថ្លែងនៅថ្ងៃទី ២០ ខែមិថុនាថា ការប្រើយន្តការអប់រំផ្សព្វផ្សាយ គឺមិនទទួលបានជោគជ័យទេ ថែមទាំងនាំឲ្យមានចំនួនអ្នកស្លាប់ និងរបួសដោយគ្រោះថ្នាក់ចរាចរណ៍កើនឡើងវិញផងដែរ។ មួយវិញទៀត នៅពេលដែលកម្ពុជាកំពុងទទួលបានជោគជ័យក្នុងការកាត់បន្ថយចំនួនអ្នកស្លាប់និងរងរបួសនៅក្នុងឆ្នាំ ២០២០ និង ២០២១ ហើយ គួរតែបង្កើនការរឹតបន្តឹងការអនុវត្តច្បាប់ថែមទៀត។
លោកថ្លែងថា៖ «បញ្ហាគ្រោះថ្នាក់ចរាចរណ៍មិនដូចបញ្ហាសង្គមផ្សេងៗនោះទេ បើដកដៃបទពិសោធយើងឃើញហើយ កាលពីឆ្នាំ ២០១៦ យើងជោគជ័យ ក្នុងការរឹតបន្តឹងការអនុវត្តច្បាប់ ប៉ុន្តែ ២០១៧ ២០១៨ និង ២០១៩ គឺហក់ឡើងវិញ។ ហេតុអីព្រោះមានយានយន្តចុះបញ្ជីថ្មីច្រើន ហើយអ្នកដែលកាន់ចង្កូតយានយន្តក៏ថ្មីដែរ គាត់អត់ទទួលបានការរៀនបើកបរអីស្រួលទេ» ៕