.jpg)
ទ័ពមួកខៀវកម្ពុជាពេលរៀបចេញទៅអាហ្វ្រិកកណ្តាលពីខែកុម្ភៈ។ រូប សហការី
ភ្នំពេញៈ អង្គការសហប្រជាជាតិ (អសប) ប្រចាំកម្ពុជាបានកោតសរសើរដល់រាជរដ្ឋាភិបាលកម្ពុជាចំពោះការបន្តគាំទ្រប្រតិបត្តិការរក្សាសន្តិភាពរបស់ អសប ខណៈដែលកម្ពុជានៅខែសីហាខាងមុខនេះ គ្រោងបញ្ជូនកងទ័ពមួកខៀវ ដែលជាកងកម្ទេចគ្រឿងផ្ទុះ (EOD) ថ្មីចំនួន ៩៨ នាក់បន្ថែមទៀតទៅរក្សាសន្តិភាព នៅអាហ្វ្រិកកណ្តាល ដែលកំពុងប្រឈមខ្លាំងនឹងគ្រាប់មីន គ្រាប់យុទ្ធភណ្ឌមិនទាន់ផ្ទុះ និងគ្រឿងផ្ទុះកែច្នៃ។
លោកស្រី កុសល ម៉ាលីនដា អ្នកនាំពាក្យមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបានប្រាប់ភ្នំពេញប៉ុស្តិ៍ថា កង EOD ទាំងនេះនឹងឈរជើងនៅរដ្ឋធានីប៊ែងហ្គី (Bangui) ហើយនឹងបែងចែកចេញជា ២ ក្រុមទៅតាមទីតាំងដែល អសប កំណត់សម្រាប់ចល័តទៅតាម ២ ទីតាំងផ្សេងៗគ្នា។ ការគ្រោងបញ្ជូនកងកម្លាំងរក្សាសន្តិភាពទៅនៅខែសីហាជាគម្រោងបឋម។
លោកស្រីថ្លែងថា៖ «ស្ថានការណ៍បច្ចុប្បន្ននៅអាហ្វ្រិកកណ្តាលហ្នឹងគឺប្រឈមខ្លាំងទៅនឹងគ្រាប់មីន ហើយនិងគ្រាប់យុទ្ធភណ្ឌមិនទាន់ផ្ទុះ ហើយក៏មានការប្រើប្រាស់គ្រឿងផ្ទុះកែច្នៃនៅក្នុងហ្នឹងផងដែរ។ អ៊ីចឹងហើយបានអង្គការសហប្រជាជាតិ គឺតម្រូវកងកម្លាំងខាងកម្ទេចគ្រឿងផ្ទុះហ្នឹងទៅ ដើម្បីជួយកាត់បន្ថយហានិភ័យ ដែលកើតឡើងដល់ជនស៊ីវិល ក៏ដូចជារាំងស្ទះដល់ដំណើរការសន្តិភាពរបស់បេសកកម្មអង្គការសហប្រជាជាតិផងដែរ»។
លោកស្រី ផូលីន តាម៉េស៊ីស (Pauline Tamesis) តំណាងអង្គការសហប្រជាជាតិប្រចាំកម្ពុជាប្រាប់ភ្នំពេញប៉ុស្តិ៍ថា៖ «យើងសូមកោតសរសើរចំពោះការបន្តគាំទ្ររបស់រាជរដ្ឋាភិបាលកម្ពុជាចំពោះប្រតិបត្តិការរក្សាសន្តិភាពរបស់អង្គការសហប្រជាជាតិ»។ កាលពីខែកុម្ភៈកន្លងទៅកម្ពុជាបានបន្តបញ្ជូនកងទ័ពមួកខៀវប្តូរវេនចំនួន ២១៩ នាក់ទៅបំពេញបេសកកម្មមនុស្សធម៌ ក្រោមឆត្រ អសប នៅអាហ្វ្រិកកណ្តាលរួចមកហើយ។ កងនេះក៏ត្រូវបានបន្ថែមកម្លាំងចំនួន ១៥ នាក់ ដែលជាកងកម្ទេចគ្រឿងផ្ទុះលើកម្លាំងវិស្វកម្មមុនៗចំនួន ២០៤ នាក់ដែលធ្វើឱ្យកម្លាំងសរុបកើនឡើងចំនួន ២១៩ នាក់។ កម្ពុជាបានបញ្ជូនទ័ពមួកខៀវទៅបំពេញបេសកកម្មរក្សាសន្តិភាព អសប នៅតំបន់ Bria នៃអាហ្វ្រិកកណ្តាល លើកដំបូងនៅឆ្នាំ ២០១៥។ មកដល់ឆ្នាំ ២០២២ កម្ពុជាបានបញ្ជូនទ័ពមួកខៀវប្តូរវេនប្រចាំឆ្នាំ ១ ឆ្នាំម្តង មានចំនួនជាង ២០០ នាក់បានចំនួន ៨ លើក។
ដោយឡែកការបញ្ជូនកងកម្លាំងប្តូរវេនលើកទី ៨ កាលពីខែកុម្ភៈកន្លងទៅនេះ ភាគី អសប បានស្នើកម្ពុជាបន្ថែមកងកម្លាំងចំនួន ១៥ នាក់បន្ថែមទៀត ដើម្បីពង្រីកបេសកកម្មដូចជាសាងសង់សំណង់ផ្តេក សាងសង់សំណង់បញ្ឈរ ដោះមីន កម្ទេចគ្រឿងយុទ្ធភណ្ឌមិនទាន់ផ្ទុះ ជីកអណ្តូងទឹកជួយជនស៊ីវិលផ្នែកមនុស្សធម៌ និងការពារជនស៊ីវិលនៅតំបន់មានជម្លោះសង្គ្រាមនៅតំបន់ Bria ជាដើម។
លោកស្រី កុសល ម៉ាលីន ដាបញ្ជាក់ថា៖ «ស្ថានការណ៍ប្រឈមនឹងគ្រាប់មីន និងគ្រាប់យុទ្ធភណ្ឌមិនទាន់ផ្ទុះហើយនិងមានការប្រើប្រាស់មួយចំនួននូវគ្រឿងផ្ទុះកែច្នៃហ្នឹង គឺគាត់ [អសប] ស្នើសុំបន្ថែម ១៥ នាក់ហ្នឹងទទួលបន្ទុកក្នុងភារកិច្ច កម្ទេចគ្រាប់មិនទាន់ផ្ទុះហ្នឹងដូចគ្នាដែលអមជាមួយកម្លាំងវិស្វកម្មរបស់យើង»។
សម្រាប់គម្រោងឆ្នាំ ២០២៣ វិញលោកស្រី កុសល ម៉ាលីនដា ថ្លែងថា ក្នុងករណីកង EOD ថ្មី ចំនួន ៩៨ នាក់នេះបានចេញទៅបំពេញបេសកកម្មនៅឆ្នាំនេះ នោះកម្ពុជានឹងធ្វើការប្តូរវេនរយៈពេល ១ ឆ្នាំម្តង ដោយលោកស្រីបញ្ជាក់ថា៖ «និយាយរួមអាហ្វ្រិកកណ្តាលដែលបច្ចុប្បន្ន យើងមាន ២១៩ នាក់ហ្នឹង បូកនឹង ៩៨ នាក់ហ្នឹង គឺចំនួនរួមហ្នឹងប្តូរវេនរយៈពេល ១ ឆ្នាំម្តង។ អ៊ីចឹងឆ្នាំ ២០២៣ ធ្វើការប្តូរវេន។ បើសិនកងនេះចេញពិតប្រាកដខែ ៨ [សីហា] មែន ឧទាហរណ៍បើអត់មានអីប្រែប្រួលបានន័យថា ឆ្នាំ ២០២៣ ខែ ២ [កុម្ភៈ] គឺយើងប្តូរ ២១៩ នាក់ ហ្នឹង ១ សិន ហើយបានចុងឆ្នាំ ២០២៣ ខែ ៨ ឬខែណាមួយ ដែលគាត់ចេញគឺប្តូរវេន ៩៨ នាក់ហ្នឹងទៀត»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពថ្លែងថា នេះ គឺជាការចូលរួមនៅក្នុងការថែរក្សាសន្តិសុខសុវតិ្ថភាព របស់កម្ពុជា ជាមួយនឹង អសប ដែលនេះជារឿងមួយល្អ។ បញ្ហាមីននៅកម្ពុជា ដែលប្រជាពលរដ្ឋកម្ពុជាទទួលរងគ្រោះដោយសារគ្រាប់មីន ដោយអ្នកខ្លះដាច់ដៃដាច់ជើង បាត់បង់ជីវិត និងពិការរហូតមកដល់បច្ចុប្បន្ននេះធ្វើឱ្យកម្ពុជាមានបទពិសោធខ្ពស់នៅក្នុងការកម្ទេចគ្រឿងផ្ទុះទាំងអស់នេះ។
លោកបន្តថា កម្ពុជាក៏ទទួលបានជោគជ័យយ៉ាងច្រើនដែរ លើបញ្ហាមីន ដែលកប់នៅក្នុងដីហើយពេលនេះ ក៏ជារឿងមួយប្រសើរ ដែលកងទ័ពមួកខៀវកម្ពុជាទៅបំពេញបេសកកម្មនៅក្រៅប្រទេស។ វាក៏ជារឿងមួយដែលគួរលើកទឹកចិត្តផងដែរ ហើយកម្ពុជាត្រូវតែព្យាយាមពង្រីកនូវទំនាក់ទំនងការចូលរួមចំណែករបស់កម្ពុជាជាមួយ អសប ឱ្យបានកាន់តែទូលំទូលាយថែមទៀតនៅក្នុងការថែរក្សាសន្តិភាពក៏ដូចជាសុវត្ថិភាពរបស់មនុស្សជាតិនៅលើពិភពលោក។
លោក យង់ គិមអេង ថ្លែងថា៖ «នៅក្រោមឆត្រនៃអង្គការសហប្រជាជាតិ យើងមិនអាចយកសុខតែម្នាក់យើងបានទេ។ យើងត្រូវតែចូលរួមចែករំលែកសេចក្តីសុខទៅដល់ប្រជាជាតិផ្សេងៗទៀត។ ជាមួយគ្នានោះ កម្ពុជាក៏គួរតែធ្វើយ៉ាងណាឱ្យសុខសុវត្ថិភាពនេះ គឺមានសម្រាប់ពលរដ្ឋខ្មែរទូទៅតទៅមុខហើយយូរអង្វែងវែងឆ្ងាយ។ ទាំងអស់នេះជារឿងមួយសំខាន់ សម្រាប់ប្រជាពលរដ្ឋក៏ដូចជាសម្រាប់មនុស្សជាតិដែលនៅក្រោមឆត្ររបស់អង្គការសហប្រជាជាតិ»។
ចាប់ពីឆ្នាំ ២០០៦ រហូតមកដល់ឆ្នាំ ២០២២ កម្ពុជាបានបញ្ជូនកងកម្លាំងជាង ៨ ០០០ នាក់ក្នុងនោះមាននារីចំនួនជាង ៥០០ នាក់ទៅកាន់បេសកកម្មចំនួន ១១ ក្នុងប្រទេសចំនួន ៩។ ដោយឡែកនៅក្នុងឆ្នាំ ២០២២ នេះ កម្ពុជាមានកងទ័ពមួកខៀវចំនួនជិត ៨០០ នាក់កំពុងបំពេញបេសកកម្មរក្សាសន្តិភាពនៅតាមបណ្តាប្រទេសចំនួន ៤ រួមមាន ប្រទេសស៊ូដង់ខាងត្បូង លីបង់ អាហ្វ្រិកកណ្តាល និងប្រទេសម៉ាលី។
ក្នុងជំនួបជាមួយលោកស្រី Kathryn Campbell រដ្ឋលេខាធិការនៃក្រសួងការបរទេស និងពាណិជ្ជកម្មអូស្ត្រាលីកាលពីថ្ងៃទី ១៤ ខែមិថុនា លោក សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព និងជាអនុប្រធានទី ២ អាជ្ញាធរមីនបានស្នើឱ្យរដ្ឋាភិបាលអូស្ត្រាលីបន្តជួយគាំទ្រដល់មជ្ឈមណ្ឌលជាតិរក្សាសន្តិភាព និងការងារបោសសម្អាតមីនរហូតដល់កម្ទេចគ្រាប់មីនចុងក្រោយនៅកម្ពុជា ទោះបីកម្ពុជាមិនបានសម្រេចគោលដៅ ឆ្នាំ ២០២៥ ក៏ដោយ។
យោងតាមមជ្ឈមណ្ឌលជាតិរក្សាសន្តិភាពលោកស្រី Campbell បានកោតសរសើរ និងវាយតម្លៃខ្ពស់ចំពោះកងទ័ពមួកខៀវកម្ពុជាដែលទទួលបាននូវលទ្ធផលល្អប្រសើរផ្នែកប្រតិបត្តិការរក្សាសន្តិភាពបោសសម្អាតមីននៅកម្ពុជា និងការចូលរួមប្រតិបត្តិការរក្សាសន្តិភាពរបស់ អសប លើបណ្តាប្រទេសមួយចំនួនដែលមានជម្លោះដោយសារសង្គ្រាម។
ប្រភពដដែលបញ្ជាក់ថា៖ «លោកជំទាវ [លោកស្រី Campbell] នឹងបន្តគាំទ្រដល់ការងារបោសសម្អាតមីននៅកម្ពុជា និងជួយហ្វឹកហ្វឺនបណ្តុះបណ្តាលធនធានមនុស្សបង្កើនលើកម្លាំងស្ត្រីផ្នែករក្សាសន្តិភាព ព្រមទាំងពាំនាំនូវសំណើ និងលទ្ធផលនៃជំនួបពិភាក្សាការងារនេះជម្រាបដល់រដ្ឋាភិបាលអូស្ត្រាលីផងដែរ»។
លោកនាយករដ្ឋមន្ត្រី ហ៊ុន សែន កាលពីដើមខែមិថុនានេះបានប្រាប់ក្រុមអ្នកសង្កេតការណ៍អន្តរជាតិដែលមកសង្កេតការណ៍បោះឆ្នោតឃុំ សង្កាត់ នៅកម្ពុជាថា អសប ធ្លាប់បានបញ្ជូនកងទ័ពមកខៀវមកកម្ពុជា តែពេលនេះកម្ពុជាបានបញ្ជូនកងទ័ពមួកខៀវ ក្រោមឆត្រ អសប ទៅប្រតិបត្តិការនៅប្រទេសដទៃ៕
