ភ្នំពេញៈ ក្រសួងអប់រំបានចេញសេចក្តីប្រកាសទទួលស្គាល់សិស្សពូកែទូទាំងប្រទេសចំនួន ៦០ នាក់ផ្នែកអក្សរសាស្ត្រខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ សម្រាប់ឆ្នាំ ២០២២ បន្ទាប់ពីបានដំណើរការប្រឡងអស់រយៈពេល ១ សប្តាហ៍ ដែលមានសិស្ស ៤៨០ នាក់ចូលរួមប្រឡង។
យោងតាមសេចក្តីប្រកាសចុះថ្ងៃទី ១៩ មិថុនាបានឱ្យដឹងថា សិស្សពូកែទាំងនេះត្រូវទទួលបានរង្វាន់ និងការលើកទឹកចិត្តពីរាជរដ្ឋាភិបាលនូវមេដាយ ១ គ្រឿងសម្រាប់បេក្ខជនជយលាភីចំណាត់ថ្នាក់ពីលេខ ១ ដល់លេខ ៣ វិញ្ញាបនបត្របញ្ជាក់សិស្សពូកែទូទាំងប្រទេស ប្រាក់រង្វាន់តាមចំណាត់ថ្នាក់ និងប្រាក់រង្វាន់ ឬវត្ថុផ្សេងៗពីសប្បុរសជន។
ប្រកាសដែលចុះហត្ថលេខាដោយលោក ហង់ជួន ណារ៉ុន រដ្ឋមន្ត្រីក្រសួងអប់រំ បញ្ជាក់ថា ចំណាត់ថ្នាក់លេខ ១ ទទួលបានប្រាក់រង្វាន់ ៣ ៥០០ ០០០ រៀល (៨៧៥ ដុល្លារ) ខណៈចំណាត់ថ្នាក់លេខ ១០ ចុងក្រោយគេ គឺទទួលបានប្រាក់រង្វាន់ចំនួន ៨០០ ០០០ រៀល (២០០ ដុល្លារ)។
លោក ហង់ជួន ណារ៉ុន ថ្លែងក្នុងពិធីបិទការប្រឡងជ្រើសរើសសិស្សពូកែទូទាំងប្រទេសនាថ្ងៃទី ១៩ ខែមិថុនា នៅខេត្តសៀមរាបថា កន្លងមក អតីតជយលាភីសិស្សពូកែកម្ពុជាបានលើកកម្ពស់មុខមាត់ និងមោទនភាពជាតិតាមរយៈការចូលរួមប្រកួតប្រជែងសមត្ថភាព និងទទួលបានមេដាយជាបន្តបន្ទាប់ពីការប្រកួតប្រជែងកម្រិតតំបន់ និងអន្តរជាតិ។ ប្រការនេះបានបង្ហាញឱ្យឃើញថាសក្តានុពលនៃធនធានមនុស្សរបស់កម្ពុជាកាន់តែមានឧត្តមភាពប្រៀបធៀបនៅលើឆាកអន្តរជាតិ «គួរឱ្យស្ងប់ស្ងែង»។
ក្រសួងអប់រំបានរៀបចំការប្រឡងជ្រើសរើសសិស្សពូកែទូទាំងប្រទេសជារៀងរាល់ឆ្នាំ ដើម្បីជាឱកាសដល់សិស្សឆ្នើម និងពោរពេញដោយសមត្ថភាពបានបញ្ចេញសមត្ថភាព និងជាឱកាសសម្រាប់ក្រសួងអប់រំពិនិត្យមើលអាទិភាព និងអន្តរាគមន៍ ដើម្បីគាំទ្រដល់សិស្សពូកែឱ្យកាន់តែមានសមត្ថភាពខ្លាំងថែមទៀត និងមានឱកាសបន្តការសិក្សានៅមហាវិទ្យាល័យ។ ប៉ុន្តែការប្រឡងនេះត្រូវបានខកខានរយៈពេល ២ ឆ្នាំ ដោយសារវិបត្តិកូវីដ ១៩។
លោករដ្ឋមន្ត្រីបញ្ជាក់ថា គណៈកម្មការមេប្រយោគគ្រប់លំដាប់ថ្នាក់បានបំពេញការងារប្រឡងនេះប្រកបដោយវិជ្ជាជីវៈ និងគោរពនូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
លោក ហង់ជួន ណារ៉ុន បានជំរុញដល់អង្គភាពពាក់ព័ន្ធ និងមន្ទីរអប់រំរាជធានី ខេត្តទាំងអស់កំណត់អត្តសញ្ញាណសិស្សដែលមានឧបនិស្ស័យជាសិស្សពូកែរាប់ចាប់តាំងពីកម្រិតបឋមសិក្សាដល់មធ្យមសិក្សាទុតិយភូមិ និងរៀបចំជាការគាំទ្រ និងអន្តរាគមន៍ជួយដល់ពួកគេ។
លោកបានជំរុញឱ្យផ្តល់កិច្ចគាំទ្រចំពោះមុខដល់សិស្សពូកែ ដែលកំពុងជួបបញ្ហាទាំងក្នុងការរស់នៅ និងការរៀនសូត្រ និងផ្តល់នូវការតម្រង់ទិសសិក្សា ដើម្បីឱ្យសិស្សពូកែអាចឈានចូល និងបន្តការសិក្សានៅថ្នាក់បន្តបន្ទាប់ ដែលនឹងអាចក្លាយជាធនធានដ៏សំខាន់ក្នុងការអភិវឌ្ឍប្រទេសជាតិលើមុខជំនាញ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ លោកក៏ជំរុញដល់អង្គភាពពាក់ព័ន្ធ «ចងក្រងនូវបទពិសោធរបស់ក្មួយៗ ដែលជាសិស្សពូកែអំពីវិធីសាស្ត្រក្នុងការរៀនសូត្រឱ្យក្លាយជាសិស្សពូកែ ដើម្បីចែករំលែកដល់ក្មួយៗ សិស្សានុសិស្សដទៃទៀត [និង] បំពាក់បំប៉នបន្ថែមដល់ក្មួយៗជយលាភី និងសិស្សនិទ្ទេស A ឱ្យកាន់តែមានលទ្ធភាពប្រកួតប្រជែងខ្ពស់ជាងមុនក្នុងការប្រកួតប្រជែងកម្រិតតំបន់ និងអន្តរជាតិ»។
បើតាមមន្ទីរអប់រំខេត្តសៀមរាបដែលបានដកស្រង់សេចក្តីប្រកាសរបស់គណៈកម្មការរៀបចំការប្រឡងបានបង្ហាញថា នៅឆ្នាំនេះ សិស្សដែលមកប្រឡងមានចំនួន ៤៨០ នាក់ មកពី ២៩៤ សាលាលើគ្រឹះស្ថានមធ្យមសិក្សាសរុបចំនួន ១ ៨១២ នៅទូទាំងប្រទេសក្នុងនោះបេក្ខជនថ្នាក់ទី ៩ មានចំនួន ២៤០ នាក់ (ស្រី១៤៩ នាក់) និងបេក្ខជនថ្នាក់ទី ១២ មានចំនួន ២៤០ នាក់ (ស្រី ១២២ នាក់)។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពថ្លែងថា ការលើកទឹកចិត្តសម្រាប់សិស្សពូកែគឺជារឿងមួយល្អ ពីព្រោះសិស្សពូកែអាចមានលទ្ធភាពនៅក្នុងការជួយអភិវឌ្ឍប្រទេសទៅថ្ងៃក្រោយ។ ការបណ្តុះបណ្តាលធនធានមនុស្សដែលពូកែៗឱ្យកាន់តែមានលទ្ធភាពខ្លាំងទៀតនោះគឺរឹតតែប្រសើរ។
លោកថ្លែងថា៖ «ជាចាំបាច់ណាស់ ដើម្បីយើងបានអ្នកពូកែកាន់តែច្រើន គឺត្រូវការលើកទឹកចិត្ត ហើយការលើកទឹកចិត្តនេះទៀតសោត គឺនឹងធ្វើឱ្យក្លាយជាគំរូដល់យុវជន ឬក៏សិស្សនិស្សិតក្រោយៗទៀតឱ្យមានការប្រឹងរៀន ដើម្បីទទួលបានកិត្តិយសបានការលើកទឹកចិត្ត ពីក្រសួងពីរដ្ឋាភិបាល គឺធ្វើឱ្យពួកគាត់កាន់តែមានមោទនភាពក្នុងការប្រឹងប្រែងរៀនសូត្រ»។
បើតាមលោក គិមអេង កាលណាមានប្រព័ន្ធលើកទឹកចិត្តច្បាស់លាស់ និងមានការយកចិត្តទុកដាក់កាន់តែខ្លាំងថែមទៀតពីក្រសួងអប់រំ ក៏ដូចជារដ្ឋាភិបាល នឹងធ្វើឱ្យមានការរកឃើញនូវសិស្សពូកែកាន់តែច្រើនតទៅទៀត ហើយធនធានទាំងអស់នេះអាចមានលទ្ធភាពបន្តការសិក្សាទៅវែងឆ្ងាយទៀតអាចនឹងទទួលបានការអប់រំកាន់តែខ្ពស់តទៅទៀត ហើយក៏អាចជួយដល់សង្គមទៅថ្ងៃក្រោយទៀតផង៕